وسى ورايدا قازاقستان حالقى اسسامبلەياسى ۇستىمىزدەگى جىلدىڭ 12 قاڭتارىندا قازاقستان رەسپۋبليكاسى پرەزيدەنتى ن.ءا.نازارباەۆتىڭ ء«تورتىنشى ونەركاسىپتىك رەۆوليۋتسيا جاعدايىندا دامۋدىڭ جاڭا مۇمكىندىكتەرى» اتتى جولداۋىن تالقىلاۋ بويىنشا رەسپۋبليكالىق بىرىڭعاي كۇن وتكىزگەنىن اتاپ كورسەتكەن ءجون.
اسسامبلەيا وتكەن جۇما كۇنى الماتىداعى دوستىق ۇيىندە ەلباسىنىڭ قازاقستان حالقىنا جولداۋىن تالقىلاپ, ءتۇسىندىرۋ ءۇشىن بىرىڭعاي تاقىرىپتىق كۇنىن وتكىزدى.
الماتىداعى ءىس-شاراعا قازاقستان حالقى اسسامبلەياسى توراعاسىنىڭ ورىنباسارى ابيلفاس حامەدوۆ تاۋەلسىز قازاقستان ومىرىندە, تولاسسىز زۋلاپ جاتقان ۋاقىت بەدەرىندە ءتۇرلى ماقساتتار مەن كوپ قىرلى, جان-جاقتى جوسپارلى تاپسىرمالار تۋىنداپ جاتاتىنىن جانە مۇنىڭ ءبارى جولداۋدا كورىنىس تاباتىتىن ايتا كەلە ءبىزدىڭ ەلىمىز ناقتى تابىستارعا يە: قازاقستان بۇۇ قاۋىپسىزدىك كەڭەسىنە مۇشە بولدى, دۇنيەجۇزىلىك قىسقى ۋنيۆەرسيادانى اتقاردىق ەكسپو-2017 حالىقارالىق كورمەسى دە ءساتتى ۇيىمداستىرىلدى, جىل باسىندا ەلباسىنىڭ باستاماسىمەن كونستيتۋتسيالىق رەفورما ءوتتى, ەل ەكونوميكاسىن جاڭا بەلەسكە شىعاراتىن قازاقستاننىڭ ءۇشىنشى جاڭعىرۋىنا سەرپىن بەرىلدى, مازمۇنى تەرەڭ, اۋقىمدىلىعى بويىنشا اسا قۇندى «بولاشاققا باعدار: رۋحاني جاڭعىرۋ» باعدارلامالىق قۇجاتى بويىنشا جۇمىستار جالعاسۋدا, دەدى.
– پرەزيدەنت نۇرسۇلتان نازارباەۆتىڭ بيىلعى جولداۋى قازاقستاننىڭ كەلەشەگى ءۇشىن ولشەۋسىز ماڭىزعا يە دەپ ەسەپتەيمىن. ەلباسى بەلگىلەپ بەرگەن مەملەكەتتىك ساياساتتىڭ ستراتەگيالىق باعىتتارى بارلىق سالانىڭ باستى ساۋالدارىنا جاۋاپ بەرە الادى. بۇل كەزەكتى جولداۋ كوپۇلتتى, كوپكونفەسسيالى قازاقستاندى جاڭا كەزەڭگە, جاڭا بەلەسكە باستايدى. پرەزيدەنت پارمەن بەرىپ وتىرعان ءاربىر تاپسىرما زامانا ناقتىلىعىن بەزبەندەيدى. ەلىمىز ۇلكەن ماقساتتارعا جەتۋ جولىنداعى تاريحي مۇمكىندىكتەرگە يە, – دەدى الماتى قالالىق قحا توراعاسىنىڭ ورىنباسارى كازبەك مامسۋروۆ.
– ادام كاپيتالى تۋرالى ايتقان كەزدە, تەك ءبىلىم مەن دەنساۋلىق سالاسىن مەڭزەمەۋ كەرەك. بۇل «بولاشاققا باعدار: رۋحاني جاڭعىرۋ» باعدارلاماسىنىڭ جالعاسى ەكەنىن دە ۇمىتپاعان ءجون. مۇنداي جالعاستى جوسپارلار قوعامدى بىرتىندەپ جاڭا بەلەستەرگە كوتەرەدى. جولداۋ ازاماتتارىمىزدىڭ بارلىق بۋىنىن قامتيتىن ءبىلىم بەرۋ سالاسىنىڭ كوكجيەگىن ناقتى بەلگىلەپ وتىر. ءبىزدىڭ قوعامنىڭ نەگىزگى كۇشى تاريحتى دا, ءتىلدى دە, مادەنيەتتى دە بىلەتىن قازاقستاندىق بولۋى كەرەك, – دەدى قازاقستان كۇردتەرىنىڭ «باربانگ» قاۋىمداستىعىنىڭ توراعاسى كنياز ميرزوەۆ.
وسىلايشا قازاقستان حالقى اسسامبلەياسىنىڭ ەلىمىزدىڭ تۇكپىر-تۇكپىرىندەگى جولداۋدى تالقىلاۋعا قاتىستى بىرىڭعاي كۇنى – الەۋمەتتىك-ەكونوميكالىق تابىستىڭ نەگىزىندە ازاماتتىق تاتۋلىق, ۇلتارالىق جانە كونفەسسياارالىق كەلىسىم جاتقانىن كەزەكتى رەت ايقىنداپ وتىر.
سوندىقتان دا بۇكىل ەل بويىنشا دوستىق ۇيلەرىنىڭ بازاسىندا اسسامبلەيا كەڭەستەرى, عىلىمي-ساراپشىلىق توپتار, قوعامدىق كەلىسىم, اقساقالدار, انالار كەڭەستەرى, قحا جاستار قاناتتارىنىڭ وتىرىستارى, كونفەرەنتسيالار, دوڭگەلەك ۇستەلدەر, ساراپشىلارمەن كەزدەسۋلەر سىندى ءىس-شارالار ءوتتى. بۇل جيىندار تەك وبلىس ورتالىقتارىندا جانە ءىرى قالالاردا عانا ەمەس, سونداي-اق اۋدانداردا, كاسىپورىندار مەن جوعارى وقۋ ورىندارىندا دا جالعاستى.
ەل پرەزيدەنتىنىڭ جولداۋىن تالقىلاۋعا قازاقستان كۇردتەرىنىڭ «باربانگ» قاۋىمداستىعى, الماتى قالالىق قحا فيليالى, الماتى كورەيلەرى ۇلتتىق ورتالىعى, قازاقستاندىق ورىستاردىڭ مادەني ورتالىعى, الماتى قالالىق «احىسكا» تۇرىك ورتالىعى قاتىستى.
تاپ سول كەزدە اقتوبە قالاسىندا, قازاقستان حالقى اسسامبلەياسى توراعاسىنىڭ ورىنباسارى سەرگەي ۆيشنياكتىڭ جانە قازاقستان حالقى اسسامبلەياسى مۇشەلەرىنىڭ, عىلىمي-ساراپتامالىق توپ, قوعامدىق كەلىسىم, انالار كەڭەسى, 19 ەتنومادەني بىرلەستىك وكىلدەرىنىڭ قاتىسۋىمەن وبلىستىق قحا كەڭەسىنىڭ كەڭەيتىلگەن وتىرىسى بولىپ ءوتتى.
اتىراۋ, شىعىس قازاقستان, قوستاناي جانە باسقا دا وبلىستاردا بىرىڭعاي كۇن شەڭبەرىندە اۋداندىق ماڭىزى بار قالالار مەن اۋىلداردا ءوزىن-ءوزى باسقارۋدىڭ دەربەس بيۋدجەتى مەن كوممۋنالدىق مەنشىگىن ەنگىزۋ سىندى حالىقتىڭ وزەكتى ماسەلەلەرىن شەشۋ جولدارى تالقىلاندى. قحا ءۇشىن اۋىلدىق وكرۋگتەر مەن اۋىلدار دەڭگەيىندە قۇرىلعان قوعامدىق كەلىسىم كەڭەستەرى جەرگىلىكتى مىندەتتەردى شەشۋدە جاڭا مۇمكىندىكتەرگە يە بولاتىندىعى ماڭىزدى.
بىرنەشە وبلىستا (قاراعاندى, قىزىلوردا, ماڭعىستاۋ جانە ت.ب.) پارلامەنت ءماجىلىسىنىڭ اسسامبلەيادان سايلانعان دەپۋتاتتارىنىڭ (س.ابدراحمانوۆ, ن.جۇمادىلداەۆا, ا.مۋرادوۆ, ش.نۋرۋموۆ جانە ت.ب.) قاتىسۋىمەن وبلىستىق سەلەكتورلىق جيىن وتكىزىلدى. ولار جولداۋدىڭ ءتۇيىندى ماسەلەلەرىنە قاتىستى ءوز كوزقاراستارىن ءبىلدىرىپ, تۇرعىن ءۇي قۇرىلىسى, بانك سالاسى, ءبىلىم بەرۋ مەن الەۋمەتتىك سالاعا زاماناۋي تەحنولوگيالاردى بەلسەندى ەنگىزۋ ماسەلەلەرىنىڭ ماڭىزدىلىعىن اتاپ كورسەتتى. بىرەگەي ەلەكتروندى ەڭبەك بيرجاسىن ەنگىزۋدىڭ ماندىلىگىن, وندا بوس ورىندار مەن جۇمىس ىزدەپ جۇرگەن تۇلعالار تۋرالى بارلىق اقپارات شوعىرلاندىرىلۋى ءتيىس ەكەندىگىن, «بارشاعا ارنالعان تەگىن كاسىپتىك-تەحنيكالىق ءبىلىم بەرۋ» جوباسىن ىسكە اسىرۋدىڭ قوعامعا قاجەتتىلىگىن ءسوز ەتىپ, الەۋمەتتىك دامۋ ماسەلەلەرىنە كوڭىل ءبولدى.
بىرىڭعاي كۇن شەڭبەرىندە وتكەن قازاقستان حالقى اسسامبلەياسىنىڭ 147 ءىس-شاراسىنا 7300-دەن استام ادام قاتىستى.
ايناش ەسالي,
«ەگەمەن قازاقستان»
الماتى
