ءباسپاسوز ءماسليحاتىندا جۋرناليستەردىڭ ساۋالىنا جاۋاپ بەرگەن ءبىلىم جانە عىلىم ۆيتسە-ءمينيسترى بيبىگۇل اسىلوۆا پەداگوگتاردىڭ جالاقىسى بىرتىندەپ كوتەرىلەتىنىن جەتكىزدى. ونىڭ ايتۋىنشا, مۇعالىمدەردىڭ جالاقىسىن كوتەرۋ ءبىلىم بەرۋدىڭ جاڭا مازمۇنىنا كوشۋمەن تىكەلەي بايلانىستى. ايتالىق, 2018 جىلدىڭ 1 قاڭتارىنان باستاپ ءبىلىم بەرۋدىڭ جاڭارتىلعان مازمۇنىنا كوشكەن 1-ءشى, 2-ءشى, 5-ءشى جانە 7-ءشى سىنىپ ۇستازدارىنىڭ لاۋازىمدىق جالاقىسى كوبەيەدى. ال قىركۇيەك ايىنان باستاپ, 3-ءشى, 6-شى جانە 8-ءشى سىنىپ مۇعالىمدەرىنىڭ جالاقىسى كوتەرىلەدى. وسىلايشا, 2019 جىلدىڭ قىركۇيەگىندە 4-ءشى, 9-شى جانە 10-شى سىنىپ ۇستازدارىنىڭ جالاقىسى ارتسا, 2020 جىلى 11-سىنىپ مۇعالىمدەرىنىڭ ەڭبەكاقىسى جوعارىلايدى. جولداۋدا ايتىلعانداي, ۇستەمەاقى كولەمى 30 پايىزدى قۇرايدى. ۆيتسە-ءمينيستردىڭ سوزىنەن تۇسىنگەنىمىز, مىسالى, 15 جىلدىق ەڭبەك ءوتىلى بار ءبىرىنشى ساناتتاعى قالا مۇعالىمىنىڭ بۇرىنعى الىپ جۇرگەن جالاقىسىنىڭ ۇستىنە 24 مىڭ تەڭگە قوسىلادى. ءدال وسىنداي ەڭبەك ءوتىلى بار 1-ساناتتاعى اۋىل مۇعالىمىنىڭ جالاقىسىنا 25 860 تەڭگە قوسىلادى.
قازىرگى تاڭدا ەش ساناتى جوق مۇعالىمدەردىڭ لاۋازىمدىق جالاقىسى 56 مىڭ تەڭگەنى قۇرايدى ەكەن. ونىڭ ۇستىنە داپتەر تەكسەرگەنى جانە كابينەتكە جەتەكشىلىك ەتكەنى بار قوسىمشا 22 مىڭ تەڭگە ۇستەمەاقى قوسىلادى. وسىلايشا, ولاردىڭ بۇگىنگە دەيىنگى جالاقىسى 78 مىڭ تەڭگەنى قۇراعان. ەندى وسى مۇعالىمدەر ءبىلىم بەرۋدىڭ جاڭارتىلعان مازمۇنى بويىنشا وقىتسا, قالالىق مۇعالىمدەر جالاقىسىنا – 16 مىڭ, اۋىل دەڭگەيىندە – 21 مىڭ تەڭگە قوسىمشا الادى. ءسويتىپ, قالادا جۇمىس ىستەيتىن پەداگوگتاردىڭ ايلىعى – 96 مىڭ تەڭگە, اۋىل مۇعالىمدەرىنىڭ جالاقىسى 115 مىڭ تەڭگەنى قۇرايتىن بولادى.
ال ەڭبەك ءوتىلى 25 جىلدان جوعارى ۇستازدار قاۋىمىنىڭ جالاقىسى بۇگىندە 83 مىڭ تەڭگە بولسا, ەندى ولاردىڭ ۇستىنە قوسىمشا 25 مىڭ تەڭگە قوسىلىپ, ەڭبەكاقىسى 133 مىڭ تەڭگەگە جەتتى.
سونداي-اق, بيىل مۇعالىمدەردىڭ بىلىكتىلىك دەڭگەيىن انىقتاۋ ارقىلى قوسىمشا اقى تاعايىندايتىن جاڭا جۇيە ەنگىزىلىپتى. جاڭا جۇيەگە سايكەس, ۇلتتىق بىلىكتىلىك تەستىن تاپسىرىپ, وزدەرىنىڭ ءبىلىمىن راستاعان مۇعالىمدەر جالاقىسىن 20-50 پايىزعا دەيىن كوتەرە الادى.
سونداي-اق جيىندا ءبىلىم سالاسىنا جەكە ينۆەستورلاردى تارتۋ ماسەلەسى دە ءسوز بولدى. ءبىلىم جانە عىلىم مينيسترلىگى وكىلدەرىنىڭ مالىمەتىنشە, «بالاپان» باعدارلاماسى جۇزەگە اسىرىلعالى جەكەمەنشىك ينۆەستورلاردىڭ قاتىسۋىمەن 2 336 بالاباقشا مەن شاعىن ورتالىق اشىلعان. اتالعان باعدارلاما جۇمىس ىستەگەن 7 جىلدىڭ ىشىندە وعان 900 ملرد تەڭگە بولىنگەن ەكەن. ەندى وسى جۇمىستاردى ءارى قاراي جالعاستىرىپ, جەكەمەنشىك مەكتەپتەردە مەملەكەتتىك ءبىلىم بەرۋ تاپسىرىسىن ورنالاستىرۋ ماسەلەسى قاراستىرىلىپ وتىر. وسىعان سايكەس ءبىلىم تۋرالى زاڭعا وزگەرىستەر دە ەنگىزىلگەن. ب.اسىلوۆانىڭ ايتۋىنشا, بۇل باعىتتا قازىردىڭ وزىندە جاقسى ناتيجەلەر بار. شىمكەنت قالاسىندا 2018 جىلدىڭ قىركۇيەك ايىنان باستاپ جەرگىلىكتى بيۋدجەت قاراجاتى ەسەبىنەن جەكەمەنشىك مەكتەپتەردە 3310 ورىنعا مەملەكەتتىك تاپسىرىستى ورنالاستىرۋ جوسپارلانسا, بيىلعى قىركۇيەك ايىنان باستاپ, استانا قالاسىندا رەسپۋبليكالىق بيۋدجەت قاراجاتى ەسەبىنەن 3721 ورىنعا مەملەكەتتىك تاپسىرىس ورنالاستىرۋ كوزدەلىپ وتىر. مەكتەپتەردى باسقارۋدىڭ بۇل تاجىريبەسى كەيىن وزگە وڭىرلەردە دە قولدانىلاتىن بولادى.
بۇعان قوسا, الداعى ۋاقىتتا ءبىلىم بەرۋ ۇيىمدارى شارۋاشىلىق باسقارۋ قۇقىعىنداعى مەملەكەتتىك كاسىپورىندار رەتىندە قايتا قۇرىلۋى مۇمكىن. وسىعان سايكەس زاڭنامالارعا ەنگىزىلگەن وزگەرىستەر بۇگىندە پارلامەنت قاراۋىندا جاتىر. مينيسترلىكتىڭ جوبالاۋىنشا, مۇنداي ۇيىمداستىرۋشىلىق-قۇقىقتىق وزگەرىستەر مەكتەپتەردى ەكونوميكالىق تۇرعىدان نەعۇرلىم تاۋەلسىز ەتىپ, قارجىلاندىرۋعا جانە مۇعالىمدەردى ىنتالاندىرۋعا بايلانىستى بىرقاتار ماسەلەلەردى شەشۋگە مۇمكىندىك بەرمەك.
قىمبات توقتامۇرات,
«ەگەمەن قازاقستان»
