فوتو: inform.kz
– ايدوس ىدىرىس ۇلى, مەملەكەت باسشىسىنىڭ ءباسپاسوز حاتشىسى رەتىندە ءسىز قازاقستان پرەزيدەنتىنىڭ جۇمىس كەستەسىنەن ۇدايى حاباردارسىز. جاقىندا عانا ءسىز نۇرسۇلتان نازارباەۆتىڭ الداعى جوسپارلارىمەن بولىسكەن ەدىڭىز. ءسىزدىڭ ويىڭىزشا, الداعى كۇندەردەگى ەڭ ماڭىزدى وقيعا نە بولماق؟
– البەتتە, مەملەكەت باسشىسىنىڭ قىزمەتىندەگى نەگىزگى وقيعا اقش-قا رەسمي ساپارى بولادى. وسى ساپار اياسىندا جوعارى دەڭگەيدەگى كەلىسسوزدەر وتەدى دەپ كۇتىلۋدە. نۇرسۇلتان نازارباەۆتىڭ اقش پرەزيدەنتى دونالد ترامپپەن كەزدەسۋىنىڭ كۇن تارتىبىندە دە كەڭ اۋقىمداعى ماسەلەلەر بەلگىلەنگەن. بۇندا ودان ارعى ەكىجاقتى ساياسي دامۋ, ساۋدا-ەكونوميكالىق ءوزارا ارەكەتتەستىكتەر, قازاقستان ەكونوميكاسىنا امەريكالىق ينۆەستيتسيالاردى تارتۋ ماسەلەلەرىنە ەرەكشە نازار اۋدارىلادى. بۇدان بولەك, بۇۇ قاۋىپسىزدىك كەڭەسىنە ەلىمىزدىڭ توراعالىعى اياسىندا مەملەكەت باسشىسى اتالعان كەڭەستىڭ وتىرىسىنا قاتىسىپ, وسىناۋ جاھاندىق ورگاندا ءسوز سويلەيتىن بولادى. تۇتاستاي العاندا, بۇل تاريحي ساپاردىڭ باعدارلاماسى ماڭىزدى شارالارعا تولى. قازاقستان پرەزيدەنتىنىڭ امەريكالىق جەتەكشى ساياساتكەرلەرىمەن جانە بيزنەس وكىلدەرىمەن كەزدەسۋى دە جوسپارلانعان. وسىعان بايلانىستى قر پرەزيدەنتىنىڭ ءباسپاسوز قىزمەتى تاريحي ساپاردىڭ بارىسى مەن ناتيجەلەرىنەن اقپاراتتار ۇسىناتىنىن اتاپ وتكىم كەلەدى.
– قازاقستان پرەزيدەنتىنىڭ اقش-قا رەسمي ساپارىنان قانداي ەكونوميكالىق تيىمدىلىك كۇتۋگە بولادى؟
– ساپار قورىتىندىسى بويىنشا ەكى مەملەكەت پرەزيدەنتتەرىنىڭ كەڭەيتىلگەن ستراتەگيالىق ارىپتەستىك تۋرالى بىرلەسكەن مالىمدەمەسى قابىلدانادى دەپ كۇتىلەدى, وندا ءححى عاسىرداعى قازاقستاندىق-امەريكالىق بايلانىستاردى ودان ءارى تەرەڭدەتۋ ماسەلەلەرى قامتىلادى. سونىمەن قاتار, كەلىسسوزدەر اياسىندا بىرنەشە ميلليارد دوللاردى قۇرايتىن بىرقاتار كەلىسىمگە قول قويۋ جوسپارلانعان. امەريكالىق كاپيتالدىڭ قاتىسۋىمەن جۇزەگە اساتىن بىرلەسكەن جوبالار قازاقستان ەكونوميكاسىنىڭ ءارتۇرلى سالالارىن قامتيدى. مەملەكەت باسشىسىنىڭ اقش-قا رەسمي ساپارى ەكىجاقتى قارىم-قاتىناستارعا جاڭا سەرپىن بەرىپ, وعان ۇزاقمەرزىمدى وڭ ديناميكا قالىپتاستىرادى دەپ ويلايمىن.
– بيىلعى جىلدىڭ قاڭتارىنان باستالعان قازاقستاننىڭ بۇۇ قاۋىپسىزدىك كەڭەسىنە توراعالىعىنىڭ مانىنە توقتالىپ وتسەڭىز؟
– بۇل وقيعا ەلىمىزدىڭ حالىقارالىق ارەناداعى مارتەبەسى مەن بەدەلىن كوتەرەدى. بۇل - ءبىزدىڭ ديپلوماتيامىز ءۇشىن دە باعا جەتپەس تاجىريبە, وسى ارقىلى الەمدەگى جانە وڭىرلەردەگى جاعدايعا اسەر ەتەتىن شەشىمدەر قابىلداۋ پروتسەسىنە ەلىمىزدىڭ قاتىسۋ مۇمكىندىگى تۋىپ وتىر. بۇۇ قاۋىپسىزدىك كەڭەسى كوميتەتتەرىندە باسشىلىق جاساۋ قازاقستاننىڭ الەمنىڭ ءارتۇرلى ەلدەرىمەن زاماناۋي قاتەرلەر مەن قاۋىپتەرگە قارسى كۇرەستە ءوزارا ءىس-قيمىلدى ودان ءارى كۇشەيتۋىنە جاردەمدەسەتىنى انىق. قازاقستان وسى ارقىلى قاۋىپسىزدىك سالاسىنىڭ اعىمداعى جاھاندىق كۇن ءتارتىبىن قالىپتاستىرۋعا, سونداي-اق ورتالىقازيالىق ءوڭىردىڭ اسا ماڭىزدى پروبلەمالارى مەن مۇددەلەرىن حالىقارالىق ارەنادا ىلگەرىلەتۋگە تىكەلەي قاتىسۋدىڭ جاڭا مۇمكىندىگىنە يە بولىپ وتىر.
– سۇحباتىڭىزعا راقمەت!
