10 قاڭتار كۇنى تۇندە انا اتانعان وسكەمەن قالاسىنىڭ تۇرعىنى ۆالەنتينا كونوپلەۆا بۇل قىزمەت ءتۇرىن ەڭ العاش پايدالانۋ باقىتىنا يە بولىپ, وعان تۋ تۋرالى كۋالىك سالتاناتتى تۇردە تابىستالدى.
ەندى «ازاماتتارعا ارنالعان ۇكىمەت» مەملەكەتتىك كورپوراتسياسى ءاربىر بوسانعان اناعا قۇتتىقتاۋى جانە قىزمەت ءتۇرىن پايدالانۋ نۇسقاۋلىعى بار سمس جولدايتىن بولادى. بۇل ءۇشىن اۋەلى پەرزەنتحانا قىزمەتكەرى بالانىڭ دۇنيەگە كەلگەنىن ەلەكتروندى جۇيەگە تىركەۋى كەرەك. سول كەزدە اتا-انا ۇيالى تەلەفون ارقىلى كەلگەن سمس-كە جاۋاپ بەرىپ (جاۋاپ بەرگەندە بالانىڭ اتى-ءجونىن جازادى), قۇجاتتى كۇتەدى. «الىس اۋىلداردا تۇراتىن ايەلدەر كوبىنەسە قالاعا كەلىپ بوساناتىنى بەلگىلى. ولار بۇل قۇجاتتى بىردەن الا المايدى. بىراق ولار سمس ارقىلى كەيىن قاي جەردەن الاتىنىن كورسەتۋگە مۇمكىندىگى بار. ماسەلەن, ءوزىنىڭ تۇرعىلىقتى اۋدانىن كورسەتىپ, پەرزەنتحانادان شىققاننان كەيىن كەلىپ الۋىنا بولادى. سونىمەن قاتار قۇجاتتى باسقا ادام, ماسەلەن, كۇيەۋى كەلىپ السا دا بولادى. بۇل ءۇشىن سمس-تە ونىڭ اتى-ءجونى مەن جسن-ءىن كورسەتۋ قاجەت», – دەيدى وبلىستىق حالىققا قىزمەت كورسەتۋ ورتالىعىنىڭ ديرەكتورى ازامات ەسەمبولوۆ.
ازامات قاسىم,
«ەگەمەن قازاقستان»
وسكەمەن
