سوناۋ 90-شى, ودان كەيىنگى جىلداردا دا اۋداندىق, اۋىلدىق جەرلەردە اۋرۋحانالار جابىلىپ جاتتى, ماماندار ءتىپتى جەتىسپەدى. سونداي قيىن كەزدە قوستاناي وبلىسىنىڭ فەدوروۆ اۋداندىق اۋرۋحاناسى قالىپتى جۇمىس ىستەپ تۇردى. قازاق كسر-ءنىڭ ەڭبەك سىڭىرگەن دارىگەرىنىڭ ەسىمى «قازاقستان دەنساۋلىق ساقتاۋ سالاسىنىڭ ەليتاسى» كىتابىنا ەنگەن بولاتىن. اتاقتى حيرۋرگ 15 مىڭ ءساتتى وتا جاساعان ەكەن, دەمەك, 15 مىڭ ادامنىڭ ءومىرىن ساقتاپ قالدى دەگەن ءسوز عوي. ول دارىگەرلەر ديناستياسىنىڭ نەگىزىن قالادى, بالالارىن وسى كۇردەلى دە جاۋاپكەرشىلىگى مول ماماندىققا تارتتى. ۆيكتور ۆيلگەلموۆيچ وبلىس دەنساۋلىق ساقتاۋ سالاسىنا سىڭىرگەن ەڭبەگى ءۇشىن ەۋروپالىق عىلىمي-ونەركاسىپتىك پالاتاسىنىڭ التىن مەدالىمەن ماراپاتتالعان ەدى, حالىقارالىق بەيبىتشىلىك سىيلىعىنىڭ لاۋرەاتى بولعان. بىراق قانشا ادامنىڭ ءومىرىن ۇزارتقان دارىگەردىڭ ءوزى اجالعا قارسى تۇرا المادى, 2014 جىلى ۆيكتور فينك دۇنيەدەن وزدى.
ۆيكتور ۆيلگەلموۆيچ بىلىكتى دارىگەر عانا ەمەس, اينالاسىنا شۋاق شاشىپ تۇراتىن جانى تازا, ادام رەتىندە دە كوپتىڭ ەسىندە قالدى. اۋداندىق اۋرۋحانادا ۆيكتور فينككە ارناپ ەسكەرتكىش بۇرىش اشۋ تۋرالى باستامانى كوتەرگەن دە ءوزى ەمدەگەن قاراپايىم ادامدار, ارداگەرلەر بولاتىن.
– ۆيكتور ۆيلگەلموۆيچتىڭ ەرەن ەڭبەگىنىڭ ارقاسىندا اۋداندىق اۋرۋحانا قيىن جىلداردىڭ وزىندە قالالىق اۋرۋحانا دارەجەسىندە جۇمىس ىستەدى. قازىر ونىڭ ۇلدارى ەۆگەني مەن ەدۋارد تا وسى اۋرۋحانادا اكەسىنىڭ جولىن جالعاستىرىپ وتىر. ولار «Karl Storz» اتتى نەمىس فيرماسىنىڭ زاماناۋي جاڭا قۇرىلعىسىمەن وتە كۇردەلى وپەراتسيالاردى جاسايدى, – دەدى اۋرۋحانا باس دارىگەرىنىڭ مىندەتىن اتقارۋشى مىلتىققالي سىرعاباەۆ.
سۇيىكتى دارىگەرگە ارنالعان ەسكەرتكىش بۇرىشتىڭ اشىلۋىندا ونىڭ جەرلەستەرى, اۋىلداعى قاراپايىم جاندار تەبىرەنە سويلەدى.
– ۆيكتور ۆيلگەلموۆيچپەن اڭگىمەلەسۋدىڭ ءوزى ءبىر رۋحاني راحاتقا بولەر ەدى. ول كىسى ادام تاڭدامايتىن, جۇرتتىڭ بارلىعىنا بىردەي قارايتىن, – دەيدى ۆلاديمير زاۆەرۋحا. قاراقوپا سەلوسىنان كەلگەن ۆالەنتينا دروبىشەۆا سۇيىكتى دارىگەرىنە ارناپ ولەڭ جازعان ەكەن. دارىگەردىڭ دوسى ءسۇلتانماجيت سارسەنباەۆ ۆيكتور ۆيلگەلموۆيچتىڭ ەسىمىن ەستە قالدىرۋ ءۇشىن كوپ جۇمىس ىستەپتى. ەسكەرتكىش بۇرىشتان دارىگەردىڭ ءومىر جولىنداعى ەلەۋلى بەلەستەردى كورۋگە بولادى. ءار جىلدارعى سۋرەتتەرى, قۇجاتتارى, العان ماراپاتتارىمەن قاتار, ۆيكتور ۆيلگەلموۆيچتىڭ ءوزى اعاشتان ويىپ جاساعان ءتۇرلى ءمۇسىن-شىعارمالارى دا قويىلىپتى. ول ونەردى ءپىر تۇتاتىن.
– تابيعاتتى كەرەمەت جاقسى كورەتىن. اۋرۋحانانىڭ اينالاسىنا ءتۇرلى اعاشتار وتىرعىزاتىن. ءوزى تەرىپ كەلگەن اعاش بۇتالارىن كەپتىرىپ, قولى قالت ەتكەندە جونىپ, مۇسىندەر جاساپ وتىراتىن, – دەيدى مەدبيكە تاتيانا كۋتلينا.
«حيرۋرگيا – ناعىز ەرلەردىڭ ءىسى» دەپ وتىرادى ەكەن دارىگەر ۆيكتور فينك كوزى تىرىسىندە. ول وسى ءسوزىن ومىرىندە دالەلدەپ تە كەتكەن ادام. سودان دا حالىقتىڭ ىستىق ىقىلاسىنا بولەندى.
ءنازيرا جارىمبەت,
«ەگەمەن قازاقستان»
قوستاناي وبلىسى,
فەدوروۆ اۋدانى
