«ماسلودەل» جشس ەلىمىز بويىنشا ىرگەلى كومپانيالاردىڭ ءبىرى سانالادى. ونىڭ مايلى داقىلدار وڭدەيتىن قۇرىلىمى ع.مۇسىرەپوۆ اۋدانىندا ورنالاسقان. ال پەتروپاۆل قالاسىندا پايدالانۋعا بەرىلگەن ءوندىرىس وشاعىندا سيىر ءسۇتى تەرەڭدەتىپ وڭدەلىپ, كۇنىنە 320 توننا ءونىم شىعارىلادى. سۋ جاڭا قوندىرعىلار شۆەتسيا كورولدىگىنەن جەتكىزىلگەن. بارلىق ۇدەرىس اۆتوماتتى تۇردە جۇزەگە اسىرىلادى. تەترا پاك جەلىسى تەحنولوگيالىق ۇنەمدىلىگىمەن ەرەكشەلەنەدى, ەلەكتر ەنەرگياسى ءۇش ەسە از تۇتىنىلادى, ال ءوندىرىس قۋاتتى ەكى ەسە ارتاتىن بولادى. ەڭ باستىسى, گەرمەتيكالىق قاپتامالارعا قۇيىلعان ءونىم ءتورت ايعا دەيىن ساقتالادى.
«وزىق جوبانىڭ ارتىقشىلىقتارى كوپ. ءونىمنىڭ سانىن عانا ەمەس, ساپاسىن دا جاقسارتاتىن مۇمكىندىكتەرگە يە بولىپ وتىرمىز. 120 تۇراقتى جۇمىس ورنى قۇرىلدى. تسەحتار تولىق قۋاتىنا كوشكەندە جەرگىلىكتى قازىناعا 10 ميلليارد تەڭگە مولشەرىندە سالىق تولەنبەك. شيكىزات سولتۇستىك قازاقستان, قوستاناي وبلىستارىنان الىنادى. كەلەشەكتە قويىلتىلعان ءتاتتى ءسۇت شىعارۋ دا جوسپارلانعان», دەدى «ماسلودەل» سەرىكتەستىگىنىڭ باس ديرەكتورى پاۆەل سەليۆانوۆ.
ۇدەمەلى يندۋستريالىق-يننوۆاتسيالىق دامۋ باعدارلاماسى اياسىندا قايتا جاڭعىرتۋ جۇمىستارىنا 3 ميلليارد تەڭگەدەن استام قاراجات جۇمسالىپ, مەملەكەتتىڭ قولداۋىنا يە بولعان.
بيىل وبلىس بويىنشا 555 مىڭ توننا ءسۇت ونىمدەرىن ءوندىرىپ, قايتا وڭدەۋ كورسەتكىشىن 17 پايىزعا كوبەيتۋ مىندەتى العا قويىلسا, مەجە قازىردىڭ وزىندە ورىندالىپ وتىر. قايتا وڭدەلەتىن ءونىمنىڭ كولەمى 65 پايىزدى قۇرايدى. 72 تاۋارلى-ءسۇت فەرمالارىنىڭ تورتتەن ءبىرى سوڭعى ۇلگىدەگى قۇرالدارمەن جۇمىس ىستەيدى. ەندى يندۋستريالاندىرۋ كارتاسى اياسىندا 2,7 ميلليارد تەڭگە ءبولىنىپ, تاعى 8 فەرما اشۋ بەلگىلەنگەن. وسىلايشا وتاندىق ءسۇت ونىمدەرى ەكسپورتقا ۇزدىكسىز جونەلتىلەتىن بولادى.
ءومىر ەسقالي,
«ەگەمەن قازاقستان»
سولتۇستىك قازاقستان وبلىسى
سۋرەتتى تۇسىرگەن
تالعات تانىباەۆ
