14.02.2007. بۇگىن ۇمىتىلماس كۇن! وقىرماندارىممەن كەزدەسكەن كۇنىم. بۇل ءوتىنىش استاناداعى №51 قازاق ورتا مەكتەبىنىڭ 9 «ب» سىنىبى اتا-انالارىنىڭ اتىنان تۇسكەن ەدى. اڭگىمە تاقىرىبىنا مەنىڭ «ماحاببات جىرشىسى» كىتابىم ارقاۋ بولۋعا ءتيىستى ەكەن.
ءدال توردەگى «ەربول مەن مەڭتايسىز – بۇل ماحاببات بايانسىز!» دەگەن ايشىقتى جازۋ كوزىمە شالىندى. بويىم قىزىنىپ كەتتى.... ەسىمە ازاعاڭ ءتۇستى...
...ۇيگە كەلگەن سوڭ ازاعاڭمەن حابارلاستىم. «بۇگىن قۇلاعىڭىز شۋلاعان شىعار» دەسەم, ء«يا, شۋلاعانداي بولدى» دەيدى, ازاعام ازىلمەن. مەن وقىرماندارىممەن كەزدەسكەنىمدى ايتتىم.
– وتە دۇرىس جاساعانسىڭ! – دەدى ازاعا. – كەزدەسكەن دەگەن جاقسى. جەلپىنىپ جۇرەسىڭ. كوڭىل ءوسىپ جۇرەدى. مەن قازىر كەزدەسۋگە بۇرىنعىدان دا ىنتىعىپ باراتىن بولدىم. كەزدەسۋ – وقىرماندارىڭدى دا, ءوزىڭدى دە ومىرگە عاشىق ەتە تۇسەتىن بىردەن-ءبىر اسەرى كۇشتى رۋحاني ىقپال. قايسار, ساعان ايتار اقىلىم – كەزدەسۋلەردەن قاشا كورمە!
– قۇپ بولادى, ازاعا!
17.06.2007. سولتۇستىك قازاقستان وبلىستىق سوتىنىڭ توراعاسى بەكەت تۇرعاراەۆتىڭ 60 جاسقا تولۋ تويى استانانىڭ سالتانات سارايىندا ءوتتى. الماتىدان ازاعاڭ كەلىپ قاتىستى. ون تومدىق تاڭدامالى شىعارمالار جيناعىن «قازىعۇرت» باسپاسىنان شىعارۋعا دەمەۋشىلىك جاساعان بەكەت ءىنىسىنىڭ تويىندا ازاعاڭ كەلىستىرىپ ءسوز سويلەدى.
كەلەسى كۇنى ازاعاڭ ءبىزدىڭ ءۇيدىڭ قۇرمەتتى قوناعى بولدى. تورىمىزدەگى وتىرىسى قانداي! ءاز مەيماندى قاۋمالاسىپ جايعاسقاندار: جازۋشى-اۋدارماشى كەڭەس يۋسۋپ, جۋرناليست-جازۋشى ءادىل دۇيسەنبەك, اقىندار سەرىك تۇرعىنبەكوۆ پەن قونىسباي ءابىل, «فوليانت» باسپاسىنىڭ ديرەكتورى نۇرلان يسابەكوۆ – زايىپتارىمەن. ءابۋ قۇدام دا بولدى.
تاعىلىمدى وتىرىس ەستە قالارلىقتاي ەدى. ءبارى دە كەڭ جايلاۋدا جايعاسقانداي ارقا-جارقا بولىستى. ءازىل-قالجىڭ, قاعىتپا سوزدەر... ءان كەتتى اۋەلەپ...
...ازاعاڭ حاليماسىن اراكىدىك ەسكە تۇسىرگەندە, كوزىنەن مولتىلدەپ جاس كەلەدى. «ماحاببات جاس تالعامايدى» دەگەننىڭ سىرىنا تەرەڭىرەك بويلاي تۇسكەندەيمىز.
... ازاعاڭنىڭ باتاسى ۇزاق ءارى ماعىنالى ەكەن!
03.08.2007. باسپاگەر نۇرلان يسابەكوۆ ەكەۋىمىز ازاعاڭدى قىدىرتتىق. قالا سىرتىنداعى قابانباي باتىر باباسىنىڭ باسىنا اپاردىق. ءتاۋ ەتتىك. شاھار ىشىندە جۋىردا (05.06.2007) اشىلعان بوگەنباي باتىر ەسكەرتكىشىن كورسەتتىك. ازاعاڭ «فوليانت» باسپاسىنىڭ ۇجىمىمەن كەزدەسۋ وتكىزدى. بەتىنەن گۇلجاھان مەن راۋشان ءسۇيىپ الىپ ەدى, رازى بولىپ «ماڭگىلىك ماحاببات جىرى» كىتابىن سىيلادى.
... «بايتەرەك» قاسىندا ازاعاڭ مەنىڭ نەمەرەلەرىممەن, كەلىندەرىممەن, بالالارىممەن, ءوزىنىڭ نەمەرەسى اليامەن سۋرەتكە ءتۇستى.
... ءسويتىپ تامىز باسى ءبىزدىڭ وتباسىمىز ءۇشىن بەرەكەلى دە مەرەكەلى بولدى. بۋرابايدىڭ سۇلۋلىعىنا ءتانتى بوپ ورالعان ازاعاڭدى مەيرامحاناعا شاقىرىپ, اسەم نەمەرەمىزگە باتاسىن الدىم!
15.02.2008. «ماحاببات. وتانسۇيگىشتىك!» بۇل بەينەلى ناقىشتى ءسوز 85 جاسقا تولۋ (2007 جىلدىڭ 15 جەلتوقسانىندا تولعان) مەرەيتويىن بۇكىل حالقى مەيىرلەنىپ اتاپ, مارقايىپ قالىپ جاتقان وسى كەزەكتى ءبىر اسەرلى شاقتا – وڭتۇستىك استانا جۇرتشىلىعىمەن ىستىق كەزدەسۋ الدىندا قادىرمەندى جازۋشى ءازىلحان نۇرشايىقوۆتىڭ ءوز اۋزىنان شىققان ەدى. سەبەبى, وزگەسىن بىلاي قويعاندا, «ماحاببات, قىزىق مول جىلدار» مەن «اقيقات پەن اڭىز» روماندارى عانا ءار جۇرەككە ماحاببات پەن وتانسۇيگىشتىك پاك سەزىمدەردى ۇيالاتاتىنىن ايتىپ جاتۋدىڭ ءوزى ارتىق سەكىلدى.
قازاق ونەرىنىڭ قارا شاڭىراعىندا ينە شانشار ورىن بولماعانىن كوردىك. الاتاۋداي اق باستى زيالىلارمەن قاتار ستۋدەنتتەر, «ۇلاندىق» جاۋىنگەرلەر, ءتىپتى, وزگە ۇلت وكىلدەرى دە مولىنان كورىنەدى. ءبارىن ءبىر تىلسىم سەزىم شىرماپ تاستاعانداي. ول – كىتاپ قۇدىرەتى, وقۋعا دەگەن ىنتىزارلىقتىڭ بەلگىسى ەدى. ول – قازاق ەلىنىڭ كىتاپ وقۋعا دەگەن ىستىق ىقىلاسى ەدى.
...كەزدەسۋدە ءبىراز تۇلعالار جۇرەكجاردى لەبىز ءبىلدىردى. ماسەلەن, حالىق جازۋشىسى ق.ءجۇمادىلوۆ: ء«ازىلحان اعا بىزدەرگە ولجا ادامدار, سوعىس ولجاسى», دەدى.
...بۇل جولى ازاعاڭدى جاقىنىراق, تەرەڭىرەك تاني تۇسكەندەي بولدىم. سول سالماقتى, ماڭعاز قالپى. ساحنادا دا كوبىنە تىكەسىنەن تىك تۇرىپ وزىنە ارنالعان ءىلتيپاتتى لەبىزدەردى قابىلداۋدان جالىقپاعان ازاعاڭ مەيرامحانادا دا ءار تىلەكتى سولداتشا قازديىپ ەلگەزەكتىكپەن تىڭداۋدان جاڭىلعان جوق.
جالپى, ازاعاڭدى ۇلىقتاندىرىپ تۇرعان ونىڭ وتە قاراپايىم, كوپشىل, كىشىلىك, اسا كىسىلىك مىنەزى ەكەنىنە تاعى ءبىر كوزىم جەتتى.
29.05.2008. استانادان الماتىعا كەلگەن كۇنى جازۋشىلار وداعى دايىنداپ قويعان قوناق ۇيدە ءسال تىنىستاپ الىپ, ازاعاڭا (نۇرشايىقوۆ) تەلەفون شالىپ, قاشان كىرىپ شىعۋعا مۇمكىندىك بولاتىنىن سۇرادىم. تۇسكى كەزەڭگە ۋاعدالاستىق.
ۇيدە جالعىز ەكەن. كابينەتىنە باستادى. ءتورت بولمەلى ءۇيدىڭ ەڭ ۇلكەنىن – جازۋ وتاۋىنا ىڭعايلاپ العان ەكەن. ءتورت قابىرعا كىتاپپەن جابىلعان. تەك كىرەر ەسىك پەن بالكون ويماسى جالاڭاش. جاشىك ۇستىندە ءارالۋان پورترەتتەر قويىلعان. بولمە ورتاسىندا ۇلكەن ۇستەل. وعان جانامالاپ تاعى بىرەۋى قوساقتالعان. ەكەۋىنىڭ ءۇستى تولعان جازۋ-سىزۋ تەحنيكالىق قۇرالدارى: كومپيۋتەر, فاكس, تەلەفون,ت.ب. پاپكىگە سالىنعان قولجازبالار, كىتاپ بۋمالارى ديۆان ۇستىندە ۇيمە بولىپ جاتىر. وسى «تاۋدىڭ» اراسىندا ازاعاڭ ءوزىن جوعالتىپ الماي قالاي ءجۇر ەكەن دەپ تاڭ قالاسىڭ ەرىكسىز.
كابينەتتە ازاعاڭ ەكەۋىمىز ءبىر-ءبىرىمىزدى سۋرەتكە باسىپ الدىق الدەنەشە رەت.
جاتىن بولمەگە اكەلدى. تەلەۆيزور, كيىم جاشىگى, قوس توسەكتىك كەرەۋەت. ونىڭ ۇستىندە گازەتتەر جايراپ جاتىر. ورتاسىنداعى كوزىلدىرىك بەينە ءبىر ازاعاڭدى گازەت وقىپ شالقاسىنان جاتقانداي ەلەستەتەدى.
ەسىكتىڭ كىرەبەرىس وڭ جاعىندا ەنى 1,5 مەترلىك, ۇزىندىعى توبەگە ءسال تىرەلمەي تۇرعان تەمىر جاشىك ورنالاسقان.
– مىنە, مۇندا مەنىڭ بلوكنوت-جازبالارىم, سۋرەت نەگاتيۆتەرى, ءتۇرلى قۇجاتتارىم ساقتالادى, – دەپ ازاعاڭ جاشىكتىڭ كىلتىن سىلدىرلاتىپ اشىپ قالعاندا, كوزىمە الۋان جيھاز وتتاي باسىلعانداي بولدى... شىرت ەتكىزىپ سول كورىنىستى ءتۇسىرىپ الدىم.
22-24.12.2009. «ەگەمەن قازاقستان» گازەتىنىڭ شىعا باستاعانىنا – 90 جىل تولۋىنا ارنالعان ءۇش كۇندىك سالتاناتتى شارالارعا الماتىدان ارنايى كەلىپ ءازىلحان نۇرشايىقوۆ تا قاتىستى. 87 جاستاعى قارت جازۋشى, تىپ-تىڭ, ەلگەزەك, جىلى جىميىسپەن ماڭايىن نۇرلاندىرىپ ءجۇر. جول باستاۋشى ەتىپ, قاسىنا مەنى ءبولىپ قويعان ەدى. ەكەۋىمىز ەگىزدەي قوسارلانىپ, ءبىر ەلى اجىرامايمىز.
23 جەلتوقساندا ەلباسى ن.ءا.نازارباەۆتىڭ «ەگەمەن قازاقستان» گازەتىنىڭ رەداكتسياسىندا بولاتىنى كۇنىبۇرىن بەلگىلى ەدى. ول كىسىنى قارسى الۋ مەزەتىندە ءسوز سويلەۋ ازاعاڭا جۇكتەلگەن-ءتىن. «دانيار» قوناق ۇيىندە الدىن الا جازىپ قويعان سول ءسوزىن پىسىقتاپ وقۋدان جالىقپايدى. ماعان تىڭداتادى. «نە دەيسىڭ؟» دەگەندەي, باسىن كوتەرىپ, يەگىن قاعادى. «جاقسى ەكەن!» دەيمىن ىزەتپەن.
27.06.2010. دوس-اعام ءا.نۇرشايىقوۆپەن سويلەستىم. تەلەفوننان داۋىسى جارقىن شىقتى. «شالدارشا ءجۇرىپ جاتىرمىن» – دەيدى لەكىتە ك ۇلىپ. «ەگەمەن قازاقستان» گازەتىندە شىققان «زامانداسقا حات» ماقالاسىنا وراي ەلباسى ن.ءا.نازارباەۆ تەلەفونمەن حابارلاسىپتى. ريزالىعىن ءبىلدىرىپتى.
ۇكىمەت باسشىسى ك.ماسىموۆكە حات جازىپ, «ماحاببات, قىزىق مول جىلدار» كىتابىنىڭ جارىق كورگەنىنە 40 جىل تولۋىنا وراي رەسپۋبليكالىق دەڭگەيدە ءىس-شارا وتكىزۋدىڭ جاي-جاپسارىن مالىمدەپتى.
22-24.09.2010. وسى كەزەڭدە تاراز قالاسىنداعى حالىق باتىرى ب.مومىش ۇلىنىڭ تۋعانىنا 100 جىل تولۋىنا ارنالعان عىلىمي-پراكتيكالىق كونفەرەنتسيا وتكەن ەدى. سونىڭ جايىن ءا.نۇرشايىقوۆ تەلەفونمەن حاباردار ەتتى. باتىردىڭ كەلىنى زەينەپ بىلاي دەپتى. ء«سىز تورالقادا وتىردىڭىز عوي. ءبىر ءسات كوزىم سىزگە ءتۇسىپ كەتكەندە, ونە بويىم شىمىرلاپ جۇرە بەردى. اق كوبەلەكتەر ءسىزدىڭ باسىڭىزعا قونىپ, ۇشا جونەلىپ, قايىرا جىپىرلاي ۇيمەلەيدى. كەنەت باسىڭىز اپپاق شارداي بوپ, ىلە جەر بەتىندەگى الىپ باققا اينالىپ, توبەڭىزبەن كۇندى كوتەرىپ تۇرعانداي اسەرگە بولەتتىڭىز...»
«قاراعىم-اۋ! بۇل نەندەي ءتۇس؟ ءتۇس دەپپىن عوي. وڭىڭدە كورگەنىڭ ەكەن» – دەپ تاڭ قالىپتى ازاعاڭ.
«سىزدە ءبىر كەرەمەت ماگيالىق كۇش-قۋات بار شىعار دەيمىن», دەپ زەينەپ قارىنداسى جاراسىمدى جىميىسىن تەجەي الماپتى.
07.02.2011. حالىق جازۋشىسى ءازىلحان نۇرشايىقوۆ الماتىدا ەلباسىنىڭ قولىنان ستيپەنديا العالى تۇرىپ, كۇتۋ زالىندا ينسۋلت بولىپتى. سويلەمەك ءسوزى قالتاسىندا قالعان...
09.02.2011. نەمەرەسى اليامەن سويلەستىم. اۋىر سوعىپتى, 6 ايداي جاتۋى مۇمكىن دەيدى.
س.دوسانوۆ حابارلاستى. ازاعاڭ كىرپىگىن ارەڭ قاعىپ جاتقاندا: «الداعى 90 جىلدىعىڭىزعا باياندامانى ءوزىم جاسايمىن!» دەپتى.
10.02.2011. ازاعاڭا جاقىن ءىنى بوپ كەلەتىن, استاناداعى جازۋشى كەڭەس يۋسۋپقا حابارلاستىم. قاتتى قايعىردى. س.دوسانوۆپەن سويلەسىپ, ازاعاڭنىڭ حال-جايىن سۇراستىردىم. كوڭىل تۇشىتاتىن ەشتەڭە ايتا المادى. ءحالى وتە اۋىر بولسا كەرەك.
11.02.2011. س.دوسانوۆپەن سويلەسىپ ەدىم, ازاعاڭ دەنساۋلىعىندا ىلگەرۋشىلىك جوق سەكىلدى. «قيىن, قيىن!», دەدى ءسابيت شاراسىزدىقپەن. ازاعاڭنىڭ نەمەرەسى ءاليادان سۇراستىرىپ ەدىم, «كەشە باردىق, ۇيقىدا جاتىر», دەدى.
12.02.2011. ساعات 18.20-دا الماتىدان قوڭىراۋ ءتۇستى. وكسىك... تەلەفون ءۇزىلىپ قالدى. مەن دەرەۋ جالعاستىم. جۇرەگىم ءبىر سۇمدىقتى سەزدى... ازاعاڭ جارتى ساعات بۇرىن ومىردەن ءوتىپتى...
دەرەۋ ۇلكەن ۇلى ارنۇرمەن سويلەستىم. س.دوسانوۆپەن حابارلاستىم. ءمان-جاي بەلگىلى.
ساعات 20.30-دا قىزى جاننات شىعىپ, 15 اقپان – سەيسەنبىدە م.اۋەزوۆ اتىنداعى دراما تەاترىندا قوشتاسۋ ءراسىمى بولاتىنىن ايتتى.
05.02.2012. ءا.نۇرشايىقوۆتىڭ ومىردەن وزعانىنا – جىل تولدى. جىلىنا ارنالعان اسى الماتىنىڭ «ەسىك» مەيرامحاناسىندا ءوتتى. استى جۇرگىزۋ ماعان جۇكتەلدى.
كوپ ادام جينالدى. ءبىرازىنا ءسوز بەرىلدى. كەزەك تيمەگەندەرى وكپەلەپ قالدى.
ءا.نۇرشايىقوۆتىڭ «ەستەلىكتەرىنىڭ» 2 تومدىعى, ء«از-اعا» ەستەلىكتەر جيناعى (قۇراستىرعان ن.قۋانتاي), «ايگىلى ءاز-اعا» (قۇراستىرعان م.توقتاعازى) كىتاپتارى تاراتىلدى.
... استان سوڭ مەيرامحانا الدىنان تاكسي ۇستاپ مىنسەم, مانا سالدەگە ورانىپ قۇران وقىعان ءتۇرىن كورگەنمىن عوي, ازاماتتىق كيىمىنەن جىعا تاني الماپپىن, مولدانىڭ ناق ءوزى بوپ شىقتى جۇرگىزۋشىم. مەنى كورىپ توقتاعان عوي. باراتىن جەرىمە اپارىپ تاستادى. جولدا: «ابايلاڭىز!..» – دەپ قامقورسىپ وتىردى. بەينە ءبىر ونىڭ جۇرەگىنەن ازاعاڭنىڭ اق تىلەگى اقتارىلىپ جاتقانداي ەدى... ماعان ونى قۇدايىم ادەيى جولىقتىرعانداي ەدى...
27.09.2013. ەلورداداعى ل.ن.گۋميلەۆ اتىنداعى ەۋرازيا ۇلتتىق ۋنيۆەرسيتەتىندە قازاقستاننىڭ حالىق جازۋشىسىنا ارنالعان ء«ازىلحان نۇرشايىقوۆ جانە قازاقستاندىق جۋرناليستيكانىڭ وزەكتى ماسەلەلەرى» اتتى رەسپۋبليكالىق عىلىمي كونفەرەنتسيا ءوتتى.
18.11.2013. «ەشتەن كەش جاقسى» دەگەن قازاعىمنىڭ دانالىعىنا تاعى ءبىر ايقىن كوز جەتىپ, كوڭىل سەنگەندەي بولدى. اسا كورنەكتى قالامگەر ءا.نۇرشايىقوۆتىڭ 90 جىلدىعىنا ارنالعان سالتاناتتى جيىن مەرزىمى سىرعىتىلعانىمەن تاعىلىمدى ءوتتى.
قازاق ونەرىنىڭ قاراشاڭىراعى وسى «اكەمتەاتردا» ازاعاڭنىڭ 85 جاسقا تولۋ مەرەيتويى ماڭگىلىك ماحابباتقا باعىندىرىپ, ەربول مەن مەڭتايدى ساعىندىرىپ, باۋىرجان باتىر ەرلىگىنە تابىندىرىپ, ەل ءىشى وقىرماندارىن سابىلدىرىپ ءبىر دەمدە وتكەنىنىڭ كۋاسى بولعان ەدىك.
كەشتى قورىتىندىلاعان ازاعاڭنىڭ نەمەرەسى دينا جاننۇرقىزى اتاسىنىڭ مول دەرەكتى مۇراعاتىنىڭ حالىق يگىلىگىنە اينالۋى ورايىندا اتقارىلىپ جاتقان تولىمدى ىستەر تۋرالى, سونىڭ ءبىر پاراسى – عالامتوردا ارنايى پاراقشا اشىلعانىن حاباردار ەتتى.
27-30.04.2014. الماتىدا «بەيبىتشىلىك الەمى» حالىقارالىق قازاق تۆورچەستۆولىق بىرلەستىگىنىڭ 5 جىلدىعىنا ارنالعان 1-ءشى قۇرىلتايىنا قاتىستىم. بىرلەستىك جۇمىسىنا بەلسەنە ارالاسقانىم جانە قازاقستاننىڭ حالىق جازۋشىسى, مەملەكەتتىك سىيلىقتىڭ لاۋرەاتى ءازىلحان نۇرشايىقوۆتىڭ شىعارماشىلىعىن ناسيحاتتاۋعا قوسقان ۇلەسىم ءۇشىن ء«ازىلحان نۇرشايىقوۆ» مەدالىنىڭ يەگەرى اتاندىم.
...كەۋدەمە ازاعاڭنىڭ بەينەسى بەدەرلەنگەن مەدال تاعىلدى. بەتكى بەتىندە ء«ازىلحان نۇرشايىقوۆ» دەگەن جازۋ بار. سىرتقى بەتىندە: «جۋرناليستيكا سالاسىنا سىڭىرگەن ەڭبەگى ءۇشىن» دەپ جازىلعان.
...قايران مەنىڭ ازاعام! ءوزى ا.ا.فادەەۆ اتىنداعى حالىقارالىق سىيلىقتىڭ لاۋرەاتى رەتىندە «فادەەۆ» بەينەسىن ومىراۋىنان تاستاماي تاعىپ جۇرەتىن. ەندى مەنىڭ كەلىپ كەۋدەمە ءوزى – «نۇرشايىقوۆ» ورناي قالعانىن قاراشى!..
03-05.11.2014. «بۇل ءۇيدى ەندى تاريح ەنشىلەدى», – دەپ باستادىم جازۋشى ءازىلحان نۇرشايىقوۆتىڭ الماتىداعى تۇرعان ءۇيىنىڭ قابىرعاسىنا ەسكەرتكىش تاقتا قويىلعانداعى سالتاناتتا ايتىلعان ءسوزىمدى. – بۇل ۇيدە ازاعاڭ 26 جىل ءومىر ءسۇرىپ, ەڭبەك ەتكەن ەكەن.
بۇل ۇيدە جازۋشىنىڭ مول مۇرالى كىتاپحاناسىن ۇرپاقتارى اسپەتتەپ ساقتاپ وتىر. سول پاتەردى «ماحاببات مازداعى» دەپ اتالاتىن ادەبي مۇراجايعا اينالدىرسا دەگەن وقىرماندار تىلەگىن الماتى اكىمدىگىنە جەتكىزگىمىز كەلەدى.
26.05.2016. «ەگەمەن قازاقستان» گازەتىندە «ماحاببات مۇراجايى اشىلسا» دەگەن ماقالا (26 جەلتوقسان 2015) شىققان ەدى. ول «الماتى قالاسىنىڭ اكىمى ب.بايبەك نازارىنا» دەگەن ايدارمەن جاريالانعان بولاتىن.
27.10.2016. اۋعان سوعىسىنىڭ ارداگەرى ق.ءپارماشوۆ راديودان سويلەپ, ءا.نۇرشايىقوۆتىڭ «ماحاببات, قىزىق مول جىلدار» كىتابىن وق استىندا وقىعانىن, ءبىر جولى ۇرىستا تۇتەلەنىپ 18 بەتى عانا قالعانىن, سونى ء«سىمىرىپ» جاتىپ جاۋىنگەردىڭ وپات بولعانىن اڭگىمەلەدى. كەيىن وسى وقيعانى ازاعاڭا ايتقاندا جازۋشى: ء«پالى, سوندا مەنىڭ كىتابىم دا سوعىسقا قاتىسقان با؟» – دەپتى تاڭدانىپ.
31.10.2016. ءا.نۇرشايىقوۆتىڭ «ماحاببات, قىزىق مول جىلدار» رومانىنىڭ كەيىپكەرى ەسىمىن العان ەربول ايەلى ليما (ازاعاڭنىڭ جارى حاليماعا ۇقساستىرعان) ەكەۋى قوس ۇلىنىڭ اتىن اقيقات جانە اڭىز دەپ قويىپتى («اقيقات پەن اڭىز» رومانىنىڭ اتاۋىنا ەلىكتەپ).
18.11.2016. الماتىنى دا قار قالىڭ باسىپتى. ۇلتتىق كىتاپحانادا ازاعاڭنىڭ مەموريالدىق كابينەتى جاقسى جابدىقتالىپتى. قىزىل كەرگىش ءجىپتى زامانىمىزدىڭ تالانتتى اقىنى ۇ.ەسداۋلەتوۆ پەن ءسوز زەرگەرى م.ءراش قيىپ, ىشىنە كىردىك. ازاعاڭنىڭ ءوز ۇيىندەگى جازۋ بولمەسىنەن اينىماي قالىپتى.
03.03.2017. ءازىلحان نۇرشايىقوۆ اعاممەن كوپ جىلعى دوستىق ارالاس-قۇرالاستىعىمدا ول كىسىنى كوزىنشە ماقتايمىن دەپ, ءبىر جولى كوڭىلىن ءپاس ەتىپ العانىم بار ەدى. كوزگە ماقتاۋدى ۇناتپاي كەتتى. ءوزى كەتكەسىن از-ازداپ ماقتاۋ ءسوز ايتىپ قويامىن. اسپانداتىپ ەمەس, ءوزىنىڭ جەر بەتىندەگى باياعى جاۋىنگەرشە باساتىن نىق قادامىنداي اپ-انىق, تاقۇل-تۇقىل ەتىپ قانا ماقتايمىن... نەسى بار, قانداي ماقتاۋعا دا تۇراتىن ازاعام ەمەس پە!
قايسار ءالىم,
قازاقستان رەسپۋبليكاسىنىڭ پرەزيدەنتى سىيلىعىنىڭ لاۋرەاتى,
قازاقستان جۋرناليستيكا اكادەمياسىنىڭ اكادەميگى
