قازاقستان رەسپۋبليكاسى ورتالىق سايلاۋ كوميسسياسىندا وسك وتىرىسى بولىپ, وندا ورتسايلاۋكومنىڭ جاڭا مۇشەلەرى تانىستىرىلدى.
وسك توراعاسى بەرىك ءماجيتوۆ كوميسسيانىڭ بۇرىنعى مۇشەلەرى مارات الدانعور ۇلى سارسەمباەۆ پەن ۆلاديمير كارلوۆيچ فووسقا ورتسايلاۋكومداعى جەمىستى جۇمىسى ءۇشىن العىسىن ءبىلدىردى.
زاۋرەش حاميتقىزى بايمولدينا 1956 جىلى 15 قاڭتاردا اقمولا وبلىسىندا دۇنيەگە كەلگەن. قارمۋ زاڭ فاكۋلتەتىن «قۇقىقتانۋ» ماماندىعى بويىنشا, ساراتوۆ زاڭ ينستيتۋتى جانىنداعى كۇندىزگى اسپيرانتۋرانى جانە رەنو قالاسىنداعى (اقش) ۇلتتىق سۋديالار كوللەدجى جانىنداعى كۋرستى بىتىرگەن. زاڭ عىلىمدارىنىڭ كانديداتى. 1985 جىلدان باستاپ قارمۋ زاڭ فاكۋلتەتىنىڭ وقىتۋشىسى جانە دەكان ورىنباسارى بولىپ جۇمىس جاسادى.
1994 جىلدان باستاپ - قازاقستان رەسپۋبليكاسى ادىلەت مينيسترلىگى باس باسقارماسى ەكونوميكالىق زاڭناما ءبولىمىنىڭ باستىعى. 2005 جىلدان باستاپ قازاقستان رەسپۋبليكاسى قورشاعان ورتانى قورعاۋ مينيسترلىگىنىڭ نورماتيۆتىك قامتاماسىز ەتۋ باسقارماسىنىڭ باستىعى قىزمەتىن اتقاردى, سونداي-اق نورماتيۆتىك قۇقىقتىق قامتاماسىز ەتۋ جانە حالىقارالىق ىنتىماقتاستىق دەپارتامەنتى ديرەكتورىنىڭ ورىنباسارى بولىپ جۇمىس ىستەدى. 2006 جىلدان باستاپ پرەزيدەنت اكىمشىلىگىنە قۇقىق قورعاۋ جانە سوت جۇيەلەرى ءبولىمىنىڭ باس ينسپەكتورى لاۋازىمىنا تاعايىندالدى, ال 2008 جىلدان باستاپ مەملەكەتتىك- قۇقىقتىق ءبولىمنىڭ ينسپەكتورى بولدى. 2012 جىلدىڭ 24 اقپانىنان باستاپ قازىرگى ۋاقىتقا دەيىن ادىلەت ءمينيسترىنىڭ ورىنباسارى قىزمەتىن اتقاردى.
ناتاليا نيكولاەۆنا گودۋنوۆا 1972 جىلى 24 مامىردا ورال قالاسىندا دۇنيەگە كەلگەن. باتىس قازاقستان اۋىل شارۋاشىلىعى ينستيتۋتىن (ەكونوميست) جانە رف ۇكىمەتى جانىنداعى قارجى اكادەمياسىن بىتىرگەن. ەكونوميكا عىلىمدارىنىڭ كانديداتى. ەڭبەك جولىن «ورال» اگروپرومبانك» نەسيە بولىمىندە ەكونوميست لاۋازىمىنان باستاعان. 1997 جىلدان باستاپ 2009 جىلعا دەيىن ماڭعىستاۋ وبلىسىنىڭ اكىمدىگىندە اكىم اپپاراتىنىڭ ءبولىم باستىعىنان اكىمنىڭ كەڭەسشىسىنە دەيىن ءتۇرلى لاۋازىمداردا قىزمەت ەتكەن. 2009-2011 جىلدارى قازاقستان رەسپۋبليكاسىنىڭ رەسەي فەدەراتسياسىنداعى ساۋدا وكىلىنىڭ كونسۋلتانتى, ورىنباسارى, مىندەتىن اتقارۋشى بولىپ جۇمىس ىستەگەن.
2012-2013 جىلدارى قر پرەمەر-ءمينيسترى ورىنباسارىنىڭ ەكونوميكا جونىندەگى كەڭەسشىسى بولىپ جۇمىس جاساعان. 2015 جىلدىڭ جەلتوقسان ايىنان باستاپ قازىرگى ۋاقىتقا دەيىن «نۇر وتان» پارتياسىنىڭ حاتشىسى بولعان.
