- ماردان قولا جۇلدە قۇتتى بولسىن! بيىلعى ماۋسىمدى قورىتىندىلاساق. قولانى قاناعات تۇتتىڭىزدار ما الدە ودان دا جاقسى ناتيجەگە جەتۋگە بولار ما ەدى...
- قۇتتىقتاۋىڭىزعا كوپ راحمەت. كلۋب باسشىلارىنىڭ ماۋسىم الدىندا قويعان تالاپتارىن ورىندادىق دەپ ويلايمىن. ارينە, وڭاي بولمادى. قازىرگى قازاق فۋتبولىندا «استانا» مەن «قايراتقا» قايرات كورسەتۋ قيىن. قوس كلۋبتىڭ قارجىلىق مۇمكىندىگى, قۇرامىنداعى فۋتبولشىلاردىڭ دەڭگەيى, الەۋەتى قالعان كوماندالاردان الدەقايدا ارتىق. مۇنى مويىنداۋعا ءتيىسپىز. بىزگە «ەرتىس» پەن «توبىلدى» تىزە بۇكتىرۋ ماڭىزدى بولدى. بارلىق ويىنداردا مۇمكىندىگىنشە ۇپاي جوعالتپاۋعا كۇش سالدىق. شۇكىرشىلىك ەتەمىز. قولاعا قول جەتكىزگەنىمىز اۋەلى قولداۋ كورسەتكەن قالىڭ جانكۇيەرلەرىمىزدىڭ ارقاسىندا.
- دەگەنمەن, «وردابىسى» Europe league ىرىكتەۋ كەزەڭىندە ءساتسىز وينادى. بىلتىر دا سولاي بولعان. سەبەبى نەدە دەپ ويلايسىڭ؟
- راس. ءساتسىز وينادىق. «شيروكي بريەگ» كومانداسىن وتۋگە ءتيىس ەدىك. سونشالىقتى مىقتى قارسىلاس ەمەس تۇعىن. فۋتبول بولعان سوڭ جەڭىس تە جەڭىلىس تە قاتار جۇرەدى. كەلەر ماۋسىمدا بۇل ساتسىزدىكتى بولدىرماۋعا تىرىسامىز. «استانا» كومانداسى سەكىلدى قازاق جانكۇيەرلەرىن جەتىستىكتەرىمىزبەن قۋانتقىمىز كەلەدى.
- «استانا» دەمەكشى, ەلوردالىق كلۋبتىڭ جەتىستىكتەرىن قالاي باعالايسىز. باسقا كوماندالارىمىزعا ەۋروپا الاڭدارىنا جوعارعى دەڭگەيدە ويناۋعا نە كەدەرگى؟
- بىرىنشىدەن ەلوردالىق ۇجىمدى Europe league كەلەسى كەزەڭىنە وتۋىمەن قۇتتىقتايمىن. كەرەمەت جەتىستىك. «سلاۆيامەن» بولعان ويىندى كوردىك. جانكۇيەر بولدىق. قازاق كومانداسى مىقتىلاردىڭ قاتارىنا قوسىلعانىنا قۋاندىق. قازاق فۋتبولىنىڭ تاريحىندا وسىنداي ۇلكەن جەڭىستەر كوپ بولسىن.
ەكىنشىدەن, بۇل باسقا كوماندالارىمىزعا سەرپىن بەرەدى دەپ ويلايمىن. «قايراتتى» دا بولاشاقتا بيىكتەردەن كورەتىنىمىز انىق. بىزدە قاراپ قالمايمىز. ءبىزدىڭ اۋىلدا دا ۇلكەن تويلار بولادى دەپ ۇمىتتەنەمىن. سول ماقساتتا بار كۇش-جىگەرىمىزدى سالۋعا دايىنبىز. وتكەن ويىنداردان قورىتىندى شىعارىپ, كەلەر جىلى بارىنشا بيىك بەلەستەردى باعىندىرۋعا جۇمىس ىستەيمىز.
- ساتتىلىك تىلەيمىز. ماردان, ەندى جەكە ءوزىڭىزدىڭ ويىندارىڭىزعا توقتالساق. ماۋسىمدا 26 ويىن وتكىزىپ, 4 گول سوقتىڭىز. ويىندارىڭىزعا كوڭىلىڭىز تولادى ما؟
- بىرجاقتى جاۋاپ بەرۋ قيىن. ءساتتى دە, ءساتسىز دە كەزدەسۋلەر بولدى. نەگىزى, قالاي ويناعانىمنىڭ ناقتى باعاسىن فۋتبول جانكۇيەرلەرى بەرەدى دەپ ويلايمىن. باپكەر مەن جانكۇيەرلەردىڭ سەنىمىنەن شىعۋ ءۇشىن وينايمىز. جەكە ءوزىمىنىڭ كورسەتكىشتەرىمدى ەمەس, كوماندامىزدىڭ جەڭىسىن باستى نازاردا ۇستايمىن. ەگەر مۇكىندىك بولىپ جاتسا, گول سوعۋعا دا تىرىسامىن.
- ماردان بارلىق گولدارىڭدى ايىپ دوبىن ورىنداۋ ارقىلى سوعىپسىڭ. كەرەمەت. ايىپ دوبىن سوعۋدىڭ سىرلارىمەن بولىسسەڭ؟ ارنايى جاتتىعۋ جاسايتىن بولارسىڭ...
- سىرى جوق (ك ۇلىپ). جاسىرمايمىن, جاتتىعۋدان سوڭ, ءوزىم قالىپ جارتى ساعاتتاي دايىندىعىمدى پىسىقتايمىن. جالپى, جاتتىعۋسىز ەشقانداي ناتيجەگە قول جەتكىزۋ مۇمكىن ەمەس. مەنىڭشە, بارلىعى ەڭبەكتىڭ ارقاسىندا كەلەدى. سوندىقتان شەبەرلىگىمدى ارتتىرۋ ءۇشىن قوسىمشا ەڭبەكتەنەمىن.
- تاۋەلسىزدىك كۇنى ەڭ باستى مەرەكەمىز. فۋتبول جانكۇيەرلەرىنە تىلەگىڭىز بار شىعار. جاڭا جىلدا جاقىنداپ كەلەدى.
- بارلىق قازاقستاندىقتاردى ۇلىق مەرەكەمەن قۇتتىقتايمىن. ەلىمىز امان, حالقىمىز تىنىش بولسىن. مەملەكەتىمىز ۇلكەن جەتىستىكتەرگە جەتە بەرسىن. كەلەر جىلى ۇلكەن جەتىستىكتەر جەتە بەرەيىك. گازەتتەرىڭىزدىڭ وقىرماندارى كوپ بولسىن!
اڭگىمەڭىزگە راحمەت
ەركەبۇلان جومارت
