تارازدىڭ 2000 جىلدىق مەرەكەسىنە وراي جانە «مادەني مۇرا» باعدارلاماسى اياسىندا ايشا ءبيبى كەسەنەسى تولىقتاي قايتا جاڭعىرتۋدان وتكەن بولاتىن. ارادا ۋاقىت ءوتىپ, مەكەمە جوسپارىنا سايكەس, 2017 جىلعى 8 جەلتوقساننان باستاپ رەسپۋبليكالىق ماڭىزداعى تاريحى مۇرا ايشا ءبيبى مەن بابادجا حاتۋن كەسەنەلەرىنىڭ كۇمبەزدەرىنە اعىمداعى جوندەۋ جۇمىستارى جاسالۋدا. جاڭعىرتۋ جۇمىستارىن قازاقستان رەسپۋبليكاسى مادەنيەت جانە سپورت مينيسترلىگىنىڭ «قازقايتاجاڭعىرتۋ» رمك تاراز فيليالىنىڭ ماماندارى اتقارۋدا. ايشا ءبيبى كەشەنى ادەتتەگىدەي قالىپتى جاعدايدا جۇمىس جاساپ تۇر.
ايشا ءبيبى كەسەنەسى — ءحى-XII عاسىرلارداعى ساۋلەت ونەرىنىڭ كورنەكتى ەسكەرتكىشى. جامبىل وبلىسى جامبىل اۋدانىندا ايشا ءبيبى اۋىلىندا ورنالاسقان. سىرتى كەراميكالىق پليتالارمەن قالانىپ, ويىپ جاسالعان ورنەكتىڭ ءسان-سالتاناتى مەن سان تۇرلىلىگى جاعىنان قازاقستانداعى باسقا مەموريالدىق-داستۇرلىك ەسكەرتكىشتەر ىشىندە وعان تەڭ كەلەتىنى جوق, باستاپقىدا كەسەنەنىڭ تەك باتىس قابىرعاسى عانا ساقتالعان.
