كۇن تارتىبىندەگى نەگىزگى ماسەلە بويىنشا حابارلاما جاساعان وبلىستىق ەكونوميكا جانە بيۋدجەتتىك جوسپارلاۋ باسقارماسىنىڭ باسشىسى گۇلدانا جاۋىنبەكوۆا 2018 جىلعى وبلىستىق بيۋدجەت كىرىستەرى 208,3 ميلليارد تەڭگە كولەمىندە جوسپارلانىپ وتىرعانىن ايتتى. ونىڭ 22 ميلليارد تەڭگەسى نەمەسە 12,2 پايىزى وزىندىك كىرىستەرگە تيەسىلى ەكەن.
ماسەلەن 20 ميلليارد تەڭگە وزىندىك كىرىستەردىڭ قۇرىلىمىندا سالىقتىق تۇسىمدەردى, 1,4 ميلليارد تەڭگە سالىقتىق ەمەس تۇسىمدەردى, ال 500 ميلليون تەڭگە نەگىزگى كاپتيالدى ساتۋدان تۇسەتىن تۇسىمدەردى قۇرايدى.
سەسسيا بارىسىندا دەپۋتاتتار 2018-2020 جىلدارعا ارنالعان وبلىستىق بيۋدجەت جوباسىن ءبىراۋىزدان بەكىتتى. سونىمەن قاتار, جوبادا الەۋمەتتىك سالانىڭ الەۋەتىن ارتتىرا تۇسەتىن جوسپارلار دا قاراستىرىلىپتى. وبلىستىق ءماسليحاتتىڭ ەكونوميكا, بيۋدجەت, سالىق جانە جەرگىلىكتى ءوزىن-ءوزى باسقارۋدى دامىتۋ ماسەلەلەرى جونىندەگى تۇراقتى كوميسسيانىڭ توراعاسى ماسات بەرىك 2018-2020 جىلدارعا ارنالعان وبلىستىق بيۋدجەتتىڭ جوباسىندا 2018 جىلى سالىناتىن ءبىلىم نىساندارىنا رەسپۋبليكالىق بيۋدجەتتەن 2,5 ميلليارد, وبلىستىق بيۋدجەتتەن 2 ميلليارد تەڭگە ءبولۋ جوسپارلانعانىن ايتتى. سونداي-اق, تاراز قالاسىنان بوي كوتەرەتىن 200 ورىندىق ونكولوگيالىق ديسپانسەر قۇرىلىسىنا رەسپۋبليكالىق بيۋدجەتتەن 250 ميلليون, ال 1 دارىگەرلىك امبۋلاتوريا, 2 فەلدشەرلىك جانە 6 مەديتسينالىق پۋنكت قۇرىلىسىنا جەرگىلىكتى بيۋدجەتتەن 655,5 ميلليون تەڭگە ءبولۋ كوزدەلۋدە ەكەن. وبلىستاعى 6 سپورت نىسانىنىڭ قۇرىلىسىن اياقتاۋعا 1,2 ميلليارد, تالاس, سارىسۋ اۋداندارىنىڭ بىرنەشە اۋىلدارىن گازداندىرۋعا 2 ميلليارد تەڭگە بولىنبەك. ونىڭ 344,6 ميلليون تەڭگەسى وبلىستىق بيۋدجەتتەن بولىنەدى.
حاميت ەسامان,
«ەگەمەن قازاقستان»
جامبىل وبلىسى
