فوتو: motor.kz
سالتاناتتى تۇردە وتكىزىلگەن شارادا تىنىشتىق پەن تارتىپكە قىزمەت ەتۋگە بەل بۋىپ, جاڭادان قىزمەتكە تۇرعان بىرنەشە جاس مامان انت قابىلدادى. بىرقاتار قىزمەتكەرگە وفيتسەرلىك شەن تابىس ەتىلدى. قوعامدىق ءتارتىپتى ساقتاۋ, تۇرعىنداردىڭ قاۋىپسىزدىگىن قامتاماسىز ەتۋ بويىنشا ءمىنسىز قىزمەت اتقارعان 120-دان استام پوليتسيا قىزمەتكەرى ىشكى ىستەر ءمينيسترىنىڭ قۇرمەت گراموتاسىمەن جانە وبلىستىق ىشكى ىستەر دەپارتامەنتى باسشىسىنىڭ العىس حاتىمەن ماراپاتتالدى.
كولىك كىلتىن تابىس ەتۋ ءۇشىن ارنايى كەلگەن وبلىس اكىمى اماندىق باتالوۆ قۇتتىقتاۋ ءسوز سويلەدى.
– 2017 جىلى وبلىستىڭ ىشكى ىستەر ورگاندارىنا 11,9 ميلليارد تەڭگە ءبولىندى. وسى قارجىنىڭ 3,2 ميلليارد تەڭگەسى ماتەريالدىق-تەحنيكالىق بازانى نىعايتۋعا جۇمسالىپ وتىر. وسىنداي قولداۋ قىلمىس پەن قۇقىق بۇزۋشىلىقتىڭ دەڭگەيىن تومەندەتەدى دەپ سەنەمىن. ويتكەنى وبلىس تۇرعىندارىنىڭ ءومىرى مەن تىنىشتىعى سىزدەردىڭ قىزمەتتەرىڭىزگە تىكەلەي بايلانىستى. سوندىقتان قوعام مەن مەملەكەتتىڭ مۇددەسىن جانە ازاماتتاردىڭ قۇقىعىن ساقتاۋدا مۇلتىكسىز قىزمەت ەتكەندەرىڭىز ءۇشىن سىزدەرگە ريزاشىلىق بىلدىرگىم كەلەدى, – دەدى ول.
بۇل كۇنى ىشكى ىستەر دەپارتامەنتىنىڭ كولىك بازاسى 29 ارنايى قۇرىلعىلارمەن جابدىقتالعان اۆتوكولىكپەن, ال توتەنشە جاعدايلار قىزمەتىنىڭ يەلىگى جول تالعامايتىن 10 كولىكپەن تولىقتى. جيىن بارىسىندا وسى كۇنگە دەيىن اتقارىلعان بىرقاتار شارۋالار جونىنەن ەسەپ بەرگەن وبلىستىق جەرگىلىكتى پوليتسيا قىزمەتىنىڭ باسشىسى مارات كۇشتىباەۆ اۋىلدىق جەرلەردە ەرىكتىلەر توپتارى قۇرىلىپ, جەتىسۋ جەرىندەگى قىلمىس پەن قۇقىق بۇزۋشىلىقتى ازايتۋعا ۇلەس قوسىپ جاتقانىن ايتادى. ودان بولەك, وبلىس ورتالىعىندا قوعامدىق ءتارتىپتى ساقتاۋ ءۇشىن قالا اكىمدىگى 100 ەرىكتى جاساقشىنى ايلىق جالاقىمەن قامتاماسىز ەتۋ ءۇشىن 100 ميلليون تەڭگە ءبولىپتى. سونىڭ ارقاسىندا بيىلعى 10 ايدىڭ ىشىندە قالا كوشەلەرىندە جاسالاتىن قىلمىس پەن قوعامدىق ورىندارداعى ءتارتىپ بۇزۋشىلىق ازايعان.
بۇدان بولەك, بيىل جەكە قۇرامدى تاسىمالداۋ ءۇشىن جەرگىلىكتى پوليتسيا قىزمەتكەرلەرىنە 5 اۆتوبۋس جانە 95 اۆتوكولىك الىنعان. پوليتسيا جاساقتارىن ارنايى جانە بەلسەندى قورعانىس قۇرىلعىلارىمەن قامتاماسىز ەتۋ دە كۇن ساناپ جولعا قويىلىپ كەلەدى. ماسەلەن, 772 ءپورتاتيۆتى بەينەجازبا قۇرىلعىسى وڭىردەگى پوليتسيا قىزمەتكەرلەرىنىڭ 93%-نىڭ قولدانۋىنا بەرىلىپتى. اۋداندار مەن قالالارعا, حالىق كوپ جينالاتىن قوعامدىق ورىندارعا 346 بەينەباقىلاۋ كامەراسى ورناتىلىپ, ءار ايماقتاعى ءتارتىپ بۇزۋشىلىقتى وبلىستىق ىشكى ىستەر دەپارتامەنتىنەن تىكەلەي باقىلاۋعا جاعداي جاسالعان. الداعى ۋاقىتتا وسىنداي 420 بەينەكامەرا ورناتۋ جوسپارى تۇر. ونىڭ 396-سى وبلىس ورتالىعى تالدىقورعان قالاسىنا قويىلادى. سونداي-اق وبلىستىڭ قاپشاعاي, تەكەلى, قاسكەلەڭ, جاركەنت سىندى 4 قالاسىنا 550 بەينەباقىلاۋ كامەراسىن ورناتۋ تۋرالى قۇجاتتاما دايىندالۋدا.
تاعى ءبىر جاقسىلىقتىڭ نىشانى – وبلىس بويىنشا ەكى ارنايى قابىلداۋ مەكەمەسىنىڭ قۇرىلىسى باستالىپتى. بۇل, ءوز كەزەگىندە, اتقارۋشى بيلىك پەن قاراپايىم حالىق اراسىنداعى بايلانىستى نىعايتىپ, قىلمىستىق ىستەرگە قاتىستى پروتسەستەردىڭ اشىق جۇرگىزىلۋىنە مۇمكىندىك تۋعىزادى.
وسىعان دەيىن جۇمىس ىستەپ تۇرعان تۇرعىن ۇيىمەن قوسا سالىنعان 44 بەكەتتىڭ سانى 30-عا ارتتى. وبلىس اكىمىنىڭ ايتۋىنشا, ەندى 26 بەكەتتىڭ قۇرىلىسى جۇرگىزىلىپ جاتىر. ودان بولەك, 34 پوليتسيا بەكەتىن تۇرعىزۋعا قاجەتتى قارجى بولىنگەن. سونىڭ ءبارىن قوسقاندا وبلىس بويىنشا 220 زاماناۋي ۋچاسكەلىك پوليتسيا بەكەتى جاقىن ارادا پايدالانۋعا بەرىلەتىن بولادى.
الماس ءنۇسىپ,
«ەگەمەن قازاقستان»
الماتى وبلىسى
