مەموراندۋم بويىنشا ينۆەستيتسيالىق قور Aina Holdings B.V. بىرلەسكەن كومپانياسىن قۇرۋدى, سونىمەن قاتار 1 500 باسقا دەيىن ءىرى قارا مال ۇستايتىن, جىلىنا 4 000 توننا ءسۇت ونىمدەرىن شىعاراتىن فەرماسى بار «اينا» ءسۇت فەرماسى» كومپانياسىن ساتىپ الۋدى جوسپارلاپ وتىر. كومپانيانى دامىتۋ جونىندەگى جوبا اياسىندا فەرمانىڭ جۇمىس قۋاتىن ارتتىرىپ, تابيعي ءسۇت ءوندىرىسىن ۇلعايتۋ ءۇشىن ۆەنگريادان اسىل تۇقىمدى مال ساتىپ الىنباق.
«قازاگرو» حولدينگى باسقارما توراعاسى نۇرلىبەك مالەلوۆ ايتقانداي, ەلدىڭ اگرارلىق سەكتورىنا ينۆەستيتسيا تارتۋدىڭ وسىنداي تاسىلىنە شەتەلدىك ينۆەستورلار قىزىعۋشىلىق تانىتىپ وتىر ەكەن. بيىل قازاقستان-ۆەنگريا قورى گوللانديالىق FoodVentures كومپانياسىمەن جانە قازاقستاندىق «Green Capital Kazakhstan» كومپانياسىمەن بىرلەسىپ اقتوبە وبلىسىندا 20 گەكتارعا سوزىلىپ جاتقان جىلىجاي كەشەنىن سالۋعا 12 ميلليون دوللار ينۆەستيتسيا سالعانىن ايتا كەتەيىك.
قازاقستان-ۆەنگريا قورىن 2015 جىلى ەل ۇكىمەتىنىڭ تاپسىرماسى بويىنشا ۆەنگريالىق HungarianExport-ImportBank كومپانياسى مەن قازاقستاندىق «قازاگرو» ۇلتتىق باسقارۋشى حولدينگى بىرلەسە وتىرىپ قۇرعان بولاتىن. ونىڭ ماقساتى قازاقستاندا اۋىل شارۋاشىلىعى جوبالارىن قارجىلاندىرۋ بولىپ تابىلادى.
ارنۇر اسقار,
«ەگەمەن قازاقستان»
