بايراقتى باسەكەگە توعىزقۇمالاقتىڭ قىرى مەن سىرىن جەتىك مەڭگەرگەن كانىگى سپورتشىلارمەن قاتار, ۇمىتتەرىن ۇكىلەگەن جاس بۋىن وكىلدەرى دە باس قوستى. قاتىسۋشىلار قاتارىندا حالىقارالىق دارەجەدەگى 10 سپورت شەبەرى, 1 قازاقستان رەسپۋبليكاسىنىڭ ەڭبەك سىڭىرگەن سپورت شەبەرى, 22 سپورت شەبەرى, 13 سپورت شەبەرلىگىنە كانديدات جانە ءى رازريادتى دارەجەسى بار 11 سپورتشىنىڭ بولۋى باسەكە كورىگىن ايرىقشا قىزدىرا ءتۇستى. ناتيجەسىندە, بابى مەن باعى كەلىسكەن سپورتشىلار جەڭىمپازدار مەن جۇلدەگەرلەر ساناتىنا ىلىكتى.
ەرلەر اراسىنداعى سىندا ءى ورىندى استانا قالاسى كومانداسىنىڭ قۇرامىنداعى سپورتشى عالىمجان تەمىرباەۆ جەڭىپ الدى. ءىى ورىننىڭ جۇلدەسىن پاۆلودارلىق جانات قايمولدين قانجىعاسىنا بوكتەرسە, ونىڭ كوماندالاسى باۋىرجان ابىلايحان ءىىى ورىنعا تابان تىرەدى.
قىزدار اراسىندا وڭتۇستىك قازاقستان وبلىسىنىڭ وكىلى لينا كارىموۆانىڭ باعى جانىپ, باس جۇلدەنى ەنشىلەدى. ونىڭ جەرلەسى سالتانات ساپاربەكوۆا ءىى ورىنعا تيەسىلى تۇعىرعا كوتەرىلدى. ال ءىىى ورىننىڭ جۇلدەسى پاۆلودارلىق روزا رايىمبەكوۆاعا بۇيىردى.
باعى جانىپ, مەرەيى وسكەن سپورتشىلارعا مادەنيەت جانە سپورت مينيسترلىگىنىڭ ديپلومدارى مەن ەستەلىك مەدالدارى تابىس ەتىلىپ, تيىستىلىگىنە سايكەس, 500 000, 300 000 جانە 200 000 تەڭگەدەن بايگە سىياقىلارى بەرىلدى. بۇدان تىسقارى, جەڭىمپازدارعا باستى جۇلدە – ارنايى كۋبوك تابىستالدى.
دۇنيەجۇزىلىك جانە ەلىمىزدىڭ توعىزقۇمالاق سپورتى فەدەراتسياسىنىڭ پرەزيدەنتى ءاليحان بايمەنوۆتىڭ ايتۋىنشا, الەمدەگى بارلىق ۇلتتىڭ بولمىسىنىڭ قالىپتاسۋىنا اسەر ەتەتىن, ولاردىڭ ارقايسىسىنىڭ تەك وزىنە عانا ءتان سپورت ويىندارىنىڭ تۇرلەرى بار.
– سونداي سيپاتتاعى ۇلتتىق ويىندار بىزدە دە بارشىلىق. كوكپار, ات بايگەسى, توعىزقۇمالاق جانە باسقالارى سولاردىڭ قاتارىندا. ولاردىڭ ءبىرى باتىلدىققا باۋلىسا, ەكىنشىسى ەپتىلىككە ۇيرەتكەن, ال ءۇشىنشىسى اقىل-وي باسەكەسىنە بەيىمدەگەن, – دەيدى ءا.بايمەنوۆ.
توعىزقۇمالاق – ءبىزدىڭ ۇلتىمىزدىڭ الەمدىك وركەنيەتكە قوسقان بىرەگەي ۇلەسى. قازىرگى تاڭدا وسىناۋ زياتكەرلىك ويىن تۇرىنەن قۇرلىق دەڭگەيىندەگى چەمپيوناتتار, حالىقارالىق سايىستار, الەم چەمپيوناتتارى وتكىزىلۋدە. بۇل ويىنعا قىزىعۋشىلىق تانىتۋ ءۇردىسى كۇن ساناپ ارتىپ كەلەدى. قازاقستاندا 10 مىڭ ادام ءار دەڭگەيلى سايىستارعا تۇراقتى تۇردە قاتىسىپ جۇرسە, 200 مىڭ ادام توعىزقۇمالاق ۇيىرمەلەرىندە شەبەرلىكتەرىن شىڭداۋ ۇستىندە.
ميراس اسان,
«ەگەمەن قازاقستان»
قاراعاندى وبلىسى,
ساتباەۆ قالاسى
