ەمحاناعا قازاقستاننىڭ وزگە ايماقتارىنان جوعارى ساناتتى تەراپەۆت, كارديولوگ, نەۆروپاتولوگ, گينەكولوگ, وكۋليست, لور سەكىلدى التى دارىگەر شاقىرىلدى. بۇل مامانداردىڭ بارلىعى بىردەي قالاداعى ەمحانالاردا جەتىسپەيدى, ءتىپتى كەيبىرى جوق بولاتىن.
«ارسەنال» جاۋاپكەرشىلىگى شەكتەۋلى سەرىكتەستىگى ەمحانا ءۇشىن قالاداعى بۇرىننان قالعان, بوس تۇرعان ءۇش قاباتتى ءۇيدى تۇگەلدەي قايتا جاڭعىرتىپ, جوندەۋدەن وتكىزدى. 50 ميلليون تەڭگە جۇمسالعان جۇمىستار بارىسىندا عيماراتتىڭ شاتىرى قايتا سالىندى, تەرەزە, ەسىكتەرى اۋىستىرىلدى, كوممۋنالدىق جەلىلەر ورنىنا كەلتىرىلدى.
«بۇرىن قالا تۇرعىندارى لور, وكۋليست سەكىلدى تار سالالىق ماماندارعا قارالۋى ءۇشىن قوستانايعا جۇگىرەتىن. مىنە, ەمحانانىڭ ارتىقشىلىعى دا وسى بولىپ وتىر, سالالىق ماماندار قامتىلعان. سونىمەن قاتار, ۋزي سەكىلدى زاماناۋي مەديتسينالىق جابدىقتار الىندى, ونىمەن دارىگەرلەر اۋرۋ دياگنوزىن ءدال انىقتاۋعا مۇمكىندىك بار», دەيدى مەدبيكە تامارا سەرگەەۆا.
«ارسەنال» جاۋاپكەرشىلىگى شەكتەۋلى سەرىكتەستىگىنىڭ ديرەكتورى ءسابيت ابدىقادىر مۇندا مەديتسينالىق جابدىقتاردىڭ وزىنە 50 ميلليون قارجى جۇمسادى.
«مونوقالا بولعانىمەن ارقالىقتىڭ 28 مىڭ تۇرعىنى بار. ارقالىق ورتالىقتان شەتتەۋ جاتقاندىقتان بۇرىن باسى اۋىرىپ, بالتىرى سىزداعاندار دارىگەرگە كورىنۋ ءۇشىن باسقا قالالارعا بارۋ قيىن بولاتىن. سوندىقتان جەكەمەنشىك ەمحانا اشۋ ويىمدا كوپتەن جۇرگەن ماقسات ەدى. ەمحانا قالا تۇرعىندارىنىڭ قاجەتىن وتەيدى دەپ ويلايمىن», دەيدى ءسابيت ابدىقادىر ۇلى. كاسىپكەر مۇنىڭ سىرتىندا ەمحاناعا شاقىرىلعان دارىگەرلەردى باسپانامەن قامتاماسىز ەتتى.
ءنازيرا جارىمبەت,
«ەگەمەن قازاقستان»
