– بىردەن ايتايىن, كوماندامىزدا جاراقات العان فۋتبولشىلار بار. سوندىقتان دا ءبىز وسى ويىنعا تولىق قۇراممەن شىعا الامىز دەپ ايتا المايمىن. دەگەنمەن, ياكۋب گرومادا مەن يوزەف حۋشباۋەر بۇگىن جاتتىعۋعا قاتىستى. ولاردىڭ ويىنعا قانشالىقتى دايىن ەكەنى ەرتەڭ بەلگىلى بولادى.
– ءسىزدىڭ كومانداڭىز ىشكى بىرىنشىلىكتە سۇرەڭسىز ونەر كورسەتىپ كەلەدى. قازىر «ۆيكتوريادان» 14 ۇپايعا قالىپ كەلە جاتىر. سوندىقتان دا, ەۋروپا ليگاسىن قۇربان ەتپەيسىز بە؟
– چەحيا ليگاسى تۋرالى ايتاتىن بولساق, كۇزگى ويىندارىمىز جاقسى ءوتتى. ال ەۋروپا ليگاسى بىزگە وتە ماڭىزدى. ءبىز ناتيجەلەرىمىزدى ودان ءارى جاقسارتا تۇسكىمىز كەلەدى. سوندىقتان دا, ەرتەڭگى ويىندا جەڭىسكە جەتىپ, كەلەسى كەزەڭگە ءوتۋدى كوزدەيمىز. بۇل ويىندار چەمپيونتاتتاعى ويىندارعا ەش كەدەرگى كەلتىرمەيدى.
– ەرتەڭگى ويىندى قالاي جۇرگىزەسىز؟ تەڭ ناتيجەنىڭ ءوزى جەتكىلىكتى عوي. بالكىم, ءبىرىنشى مينۋتتان شابۋىلعا شىعۋدىڭ قاجەتى جوق شىعار!؟
– تەڭ ناتيجەنى ۇستاۋ ءۇشىن ويناساق قاتەلىك بولادى. ءبىز بەلسەندى قيمىلداۋىمىز كەرەك. تەك ماتچتىڭ سوڭىنا قاراي تەڭ ەسەپ ساقتالىپ تۇرسا, وندا ءبىز ەسەپتى ساقتاۋ ءۇشىن ۋاقىتتى سوزۋعا بارامىز.
– بۇل ويىن كومانداڭىزدىڭ وسى جىلدىڭ باستى ويىنى دەپ ايتا الاسىز با؟
– ارينە, ەرتەڭگى ناتيجە ءبىزدىڭ كوماندامىزدىڭ باعاسىن بەرەدى. ءبىز قارسىلاستار تۋرالى ايتا المايمىز. «ۆيكتوريا» دا ءبىزدى وسىنشاما ارتتا قالدىرادى دەپ ويلامادىق. ەندى ەۋروكۋبوككە كوز تىگەمىز.
– قىتايلىق كومپانيا «سلاۆيا» ءۇشىن ۇلكەن قارجى سالدى. الايدا, بىرىنشىلىكتە چەمپيون اتانا المايتىنعا ۇقسايسىزدار. سوندىقتان دا, ماۋسىمنىڭ العاشقى بولىگى ءساتسىز ءوتتى دەپ ويلامايسىز با؟
– ءبىز باپكەرلەر شتابى وتكەن جىلى كەلىپ چەمپيون اتاندىق. بيىل دا ەكىنشى ورىندامىز. بۇل ساتسىزدىك ەمەس. ونىڭ ۇستىنە ەۋروپا ليگاسىندا تاماشا ويناپ ءجۇرمىز. وسىنىڭ ءوزى ءبىز ءۇشىن جەتىپ جاتىر.
– العاشقى ويىندا ويناماعان دانني ەرتەڭگى ويىنعا شىعا ما؟ «استانا» فۋتبولشىلارىنان كىمدى ەرەكشەلەيسىز؟
– دانني ەرتەڭ ويناي ما جوق پا, ءالى ءوزىم دە بىلمەيمىن. ونىڭ ورنىن قازىر ميرولساۆ ستوح الىپ وتىر. ال «استانا» كومانداسىنىڭ فۋتبولشىلارىنان ەشكىمدى ەرەكشەلەمەي-اق قويايىن, دەگەنمەن قازاقستاندىق كوماندانىڭ كۇشىن بايقاپ قالدىق. سوندىقتان دا, ساق بولعىمىز كەلەدى.
– «استانا» كومانداسىنىڭ ويىنىن باقىلاۋعا ادام جىبەرگەنىڭىز راس پا؟
– مەن ميروسلاۆ بەرانەكپەن سويلەستىم. ول بۇرىن قازاقستاندا جۇمىس ىستەگەندىكتەن كوپ اقپارات بەردى. ال «استانانىڭ» «ۆيكتوريا» جيجكوۆپەن وتكەن ويىنىن ءوزىم بارىپ ارنايى تاماشالادىم.
– «استانانىڭ» ەۋروكۋبوكتەگى سوڭعى 7 گولىن سوققان ەكى ويىنشى كابانانگا مەن ءتۆۋماسيدى قالاي ۇستاۋعا تىراسىز؟
– ارينە, وسى ەكى ويىنشىنى قاتتى باعالايمىز. ءبىز ولاردى كوپ قيمىلداتپاۋعا تىرىسامىز. قورعانىستا بوس كەڭىستىك بولماۋى ءتيىس. سەبەبى, ەكەۋى دە جىلدام ءارى تەحنيكاسى مىقتى اياقدوپشى. ال جالپى ويىنعا قاتىستى جوسپارىمدى قازىر ايتا المايمىن.
ەرمۇحاممەد ماۋلەن,
«ەگەمەن قازاقستان»
