«استانا» كومانداسى وسى كەزگە دەيىن توپتىق كەزەڭدە ونەر كورسەتىپ كەلگەنىنە ريزا ەدى عوي. ەندى جىل سايىنعى تاجىريبيەدەن ەلوردالىق ۇجىمنىڭ بەلى بەكىپ, بۋىنى قاتايا تۇسكەنى كورىنەدى. توپ جارىپ شىعىپ, كەلەسى كەزەڭگە ءوتۋ قول جەتەتىن مەجەگە اينالدى. الايدا, سوڭعى تۋرلاردا سوعىلماي قالعان گولدار مەن الىنباي كەتكەن ۇپايلار وزەكتەگى وكىنىشتى ودان ءارى ويىن الدىندا ورتەي تۇسۋدە. ارينە, قىجىلدى كەتىرەتىن تەك قانا ءبىر شەشىم بار. ول – سوڭعى ويىندا جەڭىستى جۇلۋ. تەڭ ناتيجەنىڭ ءوزى بىزگە ەش كومەك بەرە المايدى.
اتتەڭ, ءوز الاڭىمىزدا «ۆيلياررەالمەن» تەڭ تۇسكەنىمىزدە جاعداي وزگەشە بولار ەدى. ويىنعا دەگەن تاكتيكادا باسقا ارناعا بۇرىلىپ, «سلاۆيانىڭ» الاڭىنداعى ويىندا جەڭىس بىزگە ەمەس, كەرىسىنشە الاڭ يەلەرىنە كەرەك بولاتىن-دى. ونداي جاعدايدا ويىننىڭ تۇزى جەڭىلدەيتىن. قورعانىسقا بەكەم بولىپ, جاۋاپتى شابۋىلدى كوزدەيتىن ەدىك. ال ەندى ستانيمير ستويلوۆتىڭ ويى مۇلدە باسقا. جەڭۋدىڭ امالىن قاراستىرۋ قاجەت. وسى ءۇشىن دە بولگاريالىق باپكەر كوماندانى اپتا بۇرىن چەحياعا الىپ كەلدى. كۇنىگە تەوريالىق جاتتىعۋ جاساپ, «ۆيكتوريا» جيجكوۆ كومانداسىمەن جولداستىق ماتچ تا وتكىزدى. سول ويىندا «استانا» شابۋىلدىڭ شەبىن شىڭداپ, ستاندارتتى جاعدايلاردى ءبىر پىسىقتاپ الىپتى. ويىن الدىنداعى ءباسپاسوز ءماسليحاتىندا باپكەردىڭ ايتقانى دا وسى بولدى.
- بۇل سوڭعى ويىندا بىزگە تەك قانا جەڭىس كەرەك. جىگىتتەر ىشكى چەمپيوناتتا ويىندارى جوق بولعاندىقتان اپتا بۇرىن كەلىپ وسىندا جاتتىقتى. بۇل ءبىزدىڭ ويىنعا دەگەن دايىندىعىمىزدى ءسال دە بولسا جاقسارتا ءتۇستى. قولىمىزدان كەلگەندى ەش اياماي ويناساق, كوزدەگەن ناتيجەگە جەتىپ تە قالارمىز. بارلىعىن ويىن كورسەتەدى.
چەحيالىق كلۋبتار مەن قازاقستاندىق ۇجىمداردىڭ اراسىنداعى ەۋروكۋبوك اياسىنداعى ويىندارعا كوز جۇگىرتسەك, چەحتاردىڭ ۇستەم بولعانىن انىق بايقايمىز. بۇرىننان كارى قۇرلىقتا ونەر كورسەتەتىن چەحيا كوماندالارى مول تاجىريبيەگە يە. مىسالى, «استانا» ەۋروپادا نەبارى 46 كەزدەسۋ وتكىزسە, «سلاۆيا» 150 ويىن ويناعان. سالىستىرساڭىز ءۇش ەسە كوپ ەكەنىنە كوزىڭىز جەتەدى. الايدا, تاعى ءبىر ماسەلەگە توقتايتىن بولساق, «استانا» بيىلعى ماۋسىمدا سىرتتاعى ويىنداردا جەڭىسكە جەتە باستادى. الدىمەن, «سپارتاك» يۋرمالانى, سوسىن «ماككابيدى» جەڭدى. دەمەك, تەك ۇيدە عانا ەمەس, تۇزدە دە ۇپاي الاتىن جاعدايعا جەتكەنىمىز. ال وسى توپتىق كەزەڭنىڭ وزىندە «استانامىز» سىرتتاعى ويىنداردا مىندەتتى تۇردە گول سوعىپ ءجۇر. بالكىم ءۇشىنشى ويىندا دا داستۇردەن اينىمايتىن شىعار دەگەن ءۇمىت باسىم.
ەندىگى ماسەلە سول سوعىلعان گولىمىز جەڭىستى بولا ما؟ گول سوعاتىن فۋتبولشىمىز شىنىن ايتقاندا ەكەۋ عانا. «استانانىڭ» ەۋروپا ليگاسىنداعى سوڭعى 7 گولىن سوققان دا وسى ەكۋى. تۆۋماسي مەن كابانانگا. الايدا, سوڭعى سۇقباتىندا پاتريك «كومانداداعى كەيبىر جىگىتتەردىڭ سۇرەڭسىز ويىنى بولماعاندا «ۆيلياررەالدى» جەڭىپ كەتەر ەدىك», دەپتى. بۇل ءسوز يگور شيتوۆ سەكىلدى قورعاۋشىلارىمىزدىڭ شامبايىنا باتىپ كەتكەنى انىق. پسيحولوگيالىق جاعدايدى رەتتەپ, كوماندا ىشىندەگى كوڭىل-كۇيدى ءجىتى قاداعالايتىن ستانيمير باپكەر بۇل ماسەلەنى بەي-جاي قالدىرماس. ەگەر قالدىرسا, كومانداداعى فۋتبولشىلار ەرتەڭ الاڭدا كورپەنى اركىم وزىنە تارتىپ, ويىننىڭ بەرەكەسىن قاشىراتىنى ءسوزسىز. دەمەك, كوماندا ىشىندە بارلىعى دا 100 پايىز كەرەمەت دەپ ايتۋ قيىن. دەي تۇرعانىمەن, «استانا» جەڭىسكە جەتىپ, ەۋروپا ليگاسىنىڭ پلەي-وفف كەزەڭىنە شىقسا, وندا بۇل دا ءبىر قازاق فۋتبولىنىڭ تاريحي جەڭىسى بولادى. وسىعان دەيىن قازاقستاندىق كلۋبتار مۇنداي دەڭگەيگە دەيىن شىعىپ كورمەگەن ەدى. سوندا «سلاۆيانىڭ» «استانادان» ارتىق جەرى قايسى دەيسىز عوي. ارينە ءبىز تاجىريبيەنى العا قويىپ وتىرمىز.
دەگەنمەن, فۋتبولدا جالعىز تاجىريبيەگە سەنىپ, قامال الا المايسىز. ەۋروپانىڭ ءىرى چەمپيوناتتارىندا دوپ تەپكەن مىقتى فۋتبولشىلارى بار. ودان وزگە ماسەلەگە كەلگەندە چەحيالىقتاردىڭ «استانادان» اسىپ تۇرعان دانەڭەسى دە جوق. ەرتەڭگى ويىننىڭ قالاي اياقتالعانىنا قاراماستان ايتارىمىز وسى. ياعني, قازاقستاندىق كلۋبتاردىڭ ەشتەڭەدەن شىمىرىكپەستەن, مۇنداي قارسىلاستاردى جەڭىپ, ەۋروپادا توپ جاراتىن دەڭگەيگە جەتىپ قالعانى بايقالادى. بارىنە باستاۋ سالاتىن سونداي ءبىر داڭقتى جەڭىس كەرەك.
ەرمۇحامەد ماۋلەن
«ەگەمەن قازاقستان»
پراگا, چەحيا.
