سەنات كوميتەتىنىڭ توراعاسى داريعا نازارباەۆا كەزدەسۋدى اشا كەلىپ, جاھاندىق دامۋعا كومەكتەسۋ ءبىزدىڭ ەلىمىزدىڭ سىرتقى ساياساتىنىڭ ماڭىزدى سالالالارىنىڭ ءبىرى ەكەنىن اتاپ ءوتتى. 20 جىل ىشىندە قازاقستان 450 ميلليون اقش دوللارى كولەمىندە كومەك كورسەتتى.
«بۇل سالادا جۇيەلى كوزقاراس پەن ءتيىستى ۇيلەستىرۋ بولماعاندىقتان قازاقستان زاڭناماسىندا دامۋعا رەسمي كومەك ۇعىمى رەتتەلمەگەن. «دامۋعا رەسمي كومەك تۋرالى» زاڭ قابىلدانعاننان كەيىن بۇل ماسەلەلەر رەتتەلەتىن بولادى», - دەدى سەناتور.
وسى تەتىكتىڭ جاڭالىعىن ەسكەرە وتىرىپ دەپۋتاتتار دامۋعا رەسمي كومەك تۋرالى زاڭنىڭ قانشالىقتى ءتيىمدى جۇزەگە اسىرىلعانى جانە ول ەلدىڭ اتاق-ابىرويىنا پايداسى تۋرالى اقپارات سۇرادى.
«دامۋعا رەسمي كومەك تۋرالى» زاڭدى ىسكە اسىرۋ اياسىندا اتقارىلعان جۇمىستار تۋرالى سىرتقى ىستەر ءمينيسترىنىڭ ورىنباسارى ەرجان اشىقباەۆ بايانداما جاسادى. ول سەناتورلاردان دامۋعا رەسمي كومەك سالاسىندا «KazAID ۇلتتىق وپەراتورىن قۇرۋدى قولداۋدى سۇرادى.
«KazAID» اگەنتتىگىنىڭ قۇرىلۋى دامۋعا رەسمي كومەكتىڭ ۇلتتىق جۇيەسىنىڭ قاجەتتى جانە ماڭىزدى سالاسى بولىپ تابىلادى. «KazAID» كومپانياسىنىڭ ءتيىمدى قىزمەتى ايماقتاعى ەلدەر اراسىندا قازاقستاننىڭ ابىرويىن نىعايتادى جانە كورشى ەلدەردەگى ەكونوميكالىق جاعدايدىڭ جاقسارۋىنا ىقپال ەتەدى», - دەدى ە.اشىقباەۆ.
سەناتورلار دارحان كالەتاەۆ, سەرىك جاقسىبەكوۆ, نۇرجان نۇرسيپاتوۆ, تولەۋبەك مۇقاشەۆ وسى سالانى جەتىلدىرۋ بويىنشا بىرقاتار ەسكەرتۋلەر مەن ۇسىنىستار جاسادى.
كەزدەسۋدى قورىتىندىلاي كەلىپ, داريعا نازارباەۆا حالىقارالىق كومەك كورسەتۋدىڭ ماڭىزدىلىعىنا توقتالدى جانە ءتۇسىندىرۋ جۇمىسىنداعى كەمشىلىكتەردى اتاپ ءوتتى. «قازاقستاننىڭ گۋمانيتارلىق جانە دامۋعا رەسمي كومەك كورسەتۋ سالاسىنداعى كۇش-جىگەرى الەمدە سونشالىقتى تانىمال ەمەس. بۇل ورايدا سىرتقى ىستەر مينيسترلىگى جەتكىلىكتى تۇردە جۇمىس ىستەمەيدى. بۇل ءبىزدىڭ ەلىمىزدىڭ ابىرويى, سول ارقىلى ءبىزدىڭ ەلىمىزدى حالىقارالىق قوعامداستىقتىڭ جاسامپاز مۇشەسى رەتىندە سيپاتتايدى. قازاقستان سياقتى دامىپ كەلە جاتقان ەل ءۇشىن 450 ميلليون اقش دوللارى كولەمىندەگى كومەك اجەپتاۋىر جاردەم. نەلىكتەن بۇل تۋرالى نە قازاقستاندىقتار, نە الەم قوعامداستىعى بىلمەيدى؟ بۇل ءسىم مەن ۇكىمەتتىڭ جۇمىسىنداعى وتە ۇلكەن ولقىلىق», - دەدى كوميتەت توراعاسى.
