فوتو: سەرىك مايەمەروۆ
بۇگىن ايماق باسشىسى ەرالى توعجانوۆ «جەتىباي-جاڭاوزەن» اۆتوجولىن قايتا جاڭارتۋ جۇمىسىنا قاتىستى. جولدىڭ ۇزىندىعى - 73 شاقىرىم. جالپى قۇنى 25 ملرد.تەڭگەنى قۇرايتىن جوباعا ازيا دامۋ بانكىسى قاراجات بولۋدە.
«بۇگىن جالپىۇلتتىق كوپىر اياسىندا ۇلكەن كاسىپورىندار ىسكە قوسىلدى. قازاقستان بويىنشا 25 ۇلكەن جوبانىڭ ىشىندە وزدەرىڭىز كۋا بولعانداي, «شەتپە-جەتىباي-اقتاۋ» جولى بۇگىن ەلباسىعا تاپسىرىلدى. سوندىقتان وسى نىساننىڭ جۇزەگە اسىرىلۋىنا اتسالىسقان بارلىق ازاماتتارعا العىسىمدى ايتامىن. مىنە, قازىر سول ءىرى جوبانىڭ جالعاسى رەتىندە جەتىباي مەن جاڭاوزەننىڭ اراسىنداعى جولدىڭ باستاماسىن باستاعالى تۇرمىز. بۇل ءجاي عانا باستاما ەمەس, بۇل الدىمەن ادامداردىڭ قاۋىپسىزدىگى. قازىر اقتاۋ مەن جەتىباي, جەتىباي مەن شەتپە اراسىنداعى اۆتوجولدا جول اپاتى بىرنەشە پايىزعا دەيىن تومەندەگەن. ياعني, جولدىڭ ساپاسى حالىقتىڭ ءومىرىن قامتاماسىز ەتۋمەن تىكەلەي بايلانىستى. ەكىنشىدەن, جولدىڭ بويىندا كاسىپكەرلەر كاسىبىن جۇرگىزە الادى. ۇشىنشىدەن, قانشاما ازامات جۇمىسپەن قامتىلدى. مىنا قۇرىلىس جۇمىستارىنا 600 ادام تارتىلدى. قازاقستاننىڭ تاريحىندا العاش رەت باتىس قىتاي مەن باتىس ەۋروپا اراسىن جالعاستىرۋعا مۇمكىندىك تۋدى. سونىڭ جولى اشىلدى. ەلباسىنىڭ ۇلكەن باستاماسىنىڭ العاشقى ساتىسى جۇزەگە استى. قازاقستان - ەۋرازيالىق كولىكتىك-لوگيستيكالىق حابقا اينالاتىن كۇن الىس ەمەس قوي دەپ ويلايمىن»,- دەدى ەرالى توعجانوۆ.
ايتا كەتەيىك, 1-ۋچاسكە بويىنشا جولدىڭ 35 شاقىرىمىنا دەيىن جوندەۋ جۇمىستارىن «اق جول قۇرىلىس» جشس مەن «اككورد» اق جۇرگىزەدى, ال ءارى قاراي 2-ۋچاسكە بويىنشا 73 شاقىرىمعا دەيىن «دجەنگيز ينشاات» اف اق جۇمىس جاسايدى.
گۇلايىم شىنتەمىرقىزى,
«ەگەمەن قازاقستان».
ماڭعىستاۋ وبلىسى
