جالپىۇلتتىق تەلەكوپىر اياسىندا ەلباسى نۇرسۇلتان نازارباەۆ جاڭا ءوندىرىستى ىسكە قوستى. بۇل كاسىپورىنداردا وتاندىق ءونىم شىعارىلىپ, قازاقستاندىق ماماندار جۇمىس ىستەيتىن بولادى.
قازاقستان تاۋەلسىزدىكتىڭ 26 جىلىندا جاھاندىق رەفورمالار مەن اۋقىمدى جاڭارۋ جولىنان ءوتتى. جوسپارلى ەكونوميكادان باس تارتىپ, نارىقتىق ەكونوميكاعا تۇبەگەيلى بەت بۇردى.
ەلباسى نۇرسۇلتان نازارباەۆ الەمدىك داعدارىسقا جاۋاپ رەتىندە قازاقستاندى الىپ قۇرىلىس الاڭىنا اينالدىرىپ, يندۋستريالىق-يننوۆاتسيالىق دامىعان ەل قالىپتاستىردى. قازاقستان شەتەلدىك ينۆەستيتسيا تارتۋدان ايماقتىق كوشباسشىعا اينالدى. ەلىمىز جاھاندىق ءوندىرىس تىزبەگىنە ەنۋدى جالعاستىرىپ جاتىر. مەملەكەت باسشىسى بۇگىن دە اۋقىمدى جوبالاردىڭ كەلەسى كەزەڭىن جالعاستىردى. بۇل جولى باستى نازار - تەحنولوگيالىق قايتا جابدىقتاۋ مەن تسيفرلى تەحنولوگيالارعا كوشۋ جىلدامدىعىنا اۋدارىلدى.
پرەزيدەنت نۇرسۇلتان نازارباەۆ جالپىۇلتتىق تەلەكوپىر شەڭبەرىندە ماڭعىستاۋ وبلىسى, قاراقيا اۋدانى قۇرىق اۋىلىنداعى پاروم كەشەنىنىڭ ءىى كەزەڭىن ىسكە قوستى. جوبانىڭ قۇنى - 97,7 ملرد. تەڭگەنى قۇراپ, پورتتىڭ قۋاتتىلىعى جىلىنا 7 ملن تونناعا جەتتى. قۇرىق پورتى ارقىلى ەكسپورتتىق جانە ترانزيتتىك جۇكتەردى ترانسكاسپي دالىزىندە الەمدىك نارىققا تاسىمالداۋ جوسپارلانىپ وتىر.
تەلەكوپىردە «قازاقستان تەمىر جولى» ۇلتتىق كومپانيا» اق ينفراقۇرىلىمدىق جوبالار بويىنشا ۆيتسە-پرەزيدەنتى باۋىرجان ورىنباساروۆ ءسوز الدى.
«قۇرمەتتى نۇرسۇلتان نازارباەۆ! قۇرىق پورتى - ترانسكاسپي حالىقارالىق كولىك باعدارىنىڭ ماڭىزدى ءتۇيىنى. 2017 جىلى قۇرىق پورتىندا 1 ملن. 200 مىڭ توننادان استام جۇك تيەلدى. جاڭا ىسكە قوسىلعان اۆتوكولىك پارومى – قوسىمشا 2 ملن. توننا جۇك ارتۋعا مۇمكىندىك بەرمەك. بۇگىن ءبىز ەۋروپا ەلدەرى مەن تۇركياعا جاڭا باعىتتاردى جىبەرمەكپىز»,- دەدى.
جاڭادان اشىلعان جانە ءبىر نىسان "شەتپە-اقتاۋ" اۆتوموبيل جولى. جوبانىڭ قۇنى - 92 956 ملن. تەڭگەنى قۇرايدى. 2020 جىلعا قاراي جۇك تاسىمالداۋ كولەمى "بەينەۋ-اقتاۋ" اۆتوجولىنىڭ ۋچاسكەسىندە 16 200-30 700 مىڭ توننانى قۇرايدى دەيدى, سالا ماماندارى. وسىلايشا, كولىكتىك-لوگيستيكالىق ورتالىقتاردى قۇرۋ ارقىلى شەكارالاس جاتقان وزبەكستان, تۇركىمەنستان ەلدەرىمەن قارىم-قاتىناستى نىعايتىپ, كاسپي ماڭى ايماعىنىڭ دامۋىنا, ءوڭىر ەكونوميكاسىنىڭ وسۋىنە "بەينەۋ-اقتاۋ" اۆتوجولى ىقپال ەتپەك.
«قۇرمەتتى ەلباسى! «اقتاۋ-شەتپە» جول بولىگى «استراحان-اتىراۋ-اقتاۋ-تۇرىكمەنستان شەكاراسى» حالىقارالىق ترانزيتتىك ءدالىزىنىڭ قۇرامىنا كىرەدى. بۇل – رەسەي جانە شىعىس ەۋروپانى ورتالىق ازيا ەلدەرىمەن بايلانىستىراتىن ەڭ قىسقا جول. جۇك تاسىمالىنىڭ كولەمى جىلىنا 3 ميلليون توننانى قۇراپ, اقتاۋ مەن قۇرىق تەڭىز پورتتارىنىڭ مۇمكىندىگىن ارتتىرادى»,- دەدى قر يدم اۆتوكولىك جولدار كوميتەتىنىڭ توراعاسى مەرەكە پىشەمباەۆ.
ءارى قاراي تەلەكوپىر اياسىندا ماڭعىستاۋدا «ارتسەللور ميتتال» كومپانياسىنىڭ ءتۇيىستىرىپ دانەكەرلەۋ قۇبىرلارىن ءوندىرۋ تسەحى پايدالانۋعا تاپسىرىلدى.
«سايكەسىنشە, ترانسكاسپي باعىتىمەن قىتايدان قۇرىق ارقىلى ازەربايجانعا, گرۋزياعا جانە تۇركياعا جىبەرىلەتىن جۇكتەر – قارا تەڭىز پورتىنا شىعاتىن جولدار ءدال وسى قۇرىق ارقىلى جۇزەگە اسىرىلادى. سوندىقتان دا, ءبىز اتالعان پورتقا ەرەكشە ماڭىز بەرەمىز, جانە ونى پايدالانۋعا بەرۋ كەزىندە الدىن الا جوسپارلانعان ماقساتتى كورسەتكىشتەرگە قول جەتكىزەمىز دەگەن سەنىمدەمىز», - دەدى رومان سكليار.
جوبانىڭ قۇنى شەتەلدىك ينۆەستورلاردىڭ قاتىسۋىمەن 6,8 ملرد. تەڭگەنى قۇراپ وتىر. زاۋىت بارلىق كاسپيدىڭ بۇكىل وڭىرىندە بىرەگەي, تەحنولوگيالىق جاعىنان تولىققان ونەركاسىپ كەشەنى بولىپ تابىلادى. ءوندىرىس قۋاتى جىلىنا 300 شاقىرىم قۇبىر شىعارۋعا قابىلەتتى. ءوندىرىستىڭ ءار بولىگى اۆتوماتتاندىرىلعان جانە قۇبىردىڭ ساپاسىنىڭ جوعارىلىعىن تەكسەرەتىن باقىلاۋدان وتەدى.
ەلباسى اتالعان جوبالاردىڭ ىسكە اسۋىنا ساتتىلىك تىلەپ, كاسىپورىن ۇجىمىمەن تىلدەستى.
جالپىۇلتتىق تەلەكوپىر شەڭبەرىندە 25 نىساننىڭ 10 مىڭعا تارتا جۇمىسشىسى جاڭا يندۋستريالدى سەرپىلىستىڭ تىكەلەي كۋاگەرى بولىپ, شارانى 18 ميلليون قازاقستاندىق تاماشالادى. ماڭعىستاۋ وبلىسى اكىمى ءباسپاسوز قىزمەتىنىڭ حابارلاۋىنشا, جىل باسىنان بەرى ماڭعىستاۋدا جالپى قۇنى 1 ملرد. 847 ملن. تەڭگە قۇرايتىن 3 جوبا پايدالانۋعا بەرىلىپ, 195 جاڭا جۇمىس ورنى اشىلعان.
گۇلايىم شىنتەمىرقىزى,
«ەگەمەن قازاقستان».
ماڭعىستاۋ وبلىسى
