مۇندا قۇرعاق جانە كليماتتىق قويمالاردان بولەك, كونتەينەرلىك تەرمينال, كەدەندىك رەسىمدەۋ ايماعى مەن ىلەسپەلى قۇرىلىمدارى بار.
تەلەكوپىرگە وڭتۇستىك قازاقستان وبلىسىنىڭ اكىمى جانسەيىت تۇيمەباەۆ پەن «قازاقستان تەمىر جولى» ۇك »اق ۆيتسە-پرەزيدەنتى سانجار ەلۋباەۆ جانە ورتالىق قىزمەتكەرلەرى قاتىستى. ەلباسىعا جاڭا نىساننىڭ ماڭىزدىلىعى تۋرالى ۆيتسە-پرەزيدەنت باياندادى.
«قۇرمەتتى پرەزيدەنت! ءبىز شىمكەنت قالاسىندا مۋلتيمودەلدى كولىك-لوگيستيكالىق ورتالىقتىڭ قۇرىلىسىن اياقتادىق. جىل سايىن شامامەن 1 ملن توننا جۇك وتكىزىلەدى. ءبىزدىڭ ورتالىق - شىعىس-باتىس, وڭتۇستىك-سولتۇستىك اعىنىنا قىزمەت ەتەتىن كەدەن ايماعى مەن تولىق سەرۆيستىك جەلىسى قامتىلعان زاماناۋي كەشەن. نۇرسۇلتان ءابىش ۇلى, وسى ينفراقۇرىلىمدىق جوبانى ىسكە قوسۋعا رۇقسات ەتىڭىز!», -دەپ سۇرادى «قازاقستان تەمىر جولى» ۇك» اق ۆيتسە-پرەزيدەنتى سانجار ەلۋباەۆ.
مامانداردىڭ ايتۋىنشا, «باتىس ەۋروپا - باتىس قىتاي» ماگيسترالى مەن تەمىرجول جەلىسىنە جاقىن ورنالاسقان «Continental Logitics Shymkent» جاڭا كولىكتىك-لوگيستيكالىق ورتالىعىنىڭ گەوگرافيالىق تۇرعىدان ءتيىمدى ورنالاسۋىندا. بۇل ءوڭىردى كولىكتىك-لوگيستيكالىق حاب رەتىندە قالىپتاستىرۋعا جانە قازاقستاننىڭ اۋماعى ارقىلى اينالىمدى ۇلعايتۋعا كۇشتى سەرپىن بەرەتىن جۇكتەردى شوعىرلاندىرۋ جانە كونسوليداتسيالاۋ ورتالىعى رەتىندە دامىتۋعا ىقپال ەتەدى.
ايتا كەتۋ كەرەك, ايماقتىڭ جۇك جونەلتۋشىلەر ءۇشىن ارتىقشىلىعى Cross Docking مۋلتيمودالدى قىزمەت كورسەتۋ جۇيەسىن ەنگىزۋى. بۇل جۇيە قويمالارداعى قاراپايىم جۇكتەردى قوسپاعاندا, اسىرەسە, ۇلكەن كولەمدە وزبەكستان, تاجىكستان, قىرعىزستان مەن رەسەيدەن جەتكىزىلەتىن جەمىس-كوكونىس ونىمدەرى سياقتى بۇزىلاتىن تاۋارلار ءۇشىن وتە ماڭىزدى بولىپ تابىلادى.
قازىرگى كەزدە جالپى اۋماعى 92 گەكتاردى قۇرايتىن «وڭتۇستىك» كولىك-لوگيستيكالىق ورتالىعىندا ينۆەستيتسيا قۇنى 35,6 ملرد تەڭگە بولاتىن 8 جوبا جۇزەگە اسىرىلۋدا. اۋماعى – 242 500 شارشى مەتردى قۇرايدى. مۇندا كەدەندىك راسىمدەۋ, فيتوسانيتارلىق جانە ۆەتەرينارلىق باقىلاۋ قىزمەتتەرى ءبىر تەرەزە قاعيداسىمەن جۇرگىزىلسە, بۇعان قوسا ۋاقىتشا ساقتاۋ قىزمەتى دە قاراستىرىلعان.
شىمكەنتتەگى اتالعان كلو حالىقارالىق جانە رەسپۋبليكالىق جۇك اعىمىنا قىزمەت كورسەتۋ, سونداي-اق, تاۋارلاردىڭ قالا مەن وڭىرلەرگە تاراتىلۋى ءۇشىن قويما جانە ىلەسپە قىزمەتتەر ۇسىنۋ ماقساتىندا قۇرىلعان.
