جيىنعا قازاقستان مەن شەت ەلدەردىڭ ۇلتتىق عىلىم اكادەميالارى, عىلىمي زەرتتەۋ ينستيتۋتتارى مەن ديپلوماتيالىق ميسسيا باسشىلارى, بەلگىلى مەملەكەت جانە قوعام قايراتكەرلەرى مەن تۇركىتانۋشى عالىمدار قاتىستى.
حالىقارالىق تۇركى اكادەمياسىنىڭ پرەزيدەنتى دارحان قىدىرالى القالى جيىننىڭ مەملەكەت باسشىسىنىڭ «بولاشاققا باعدار: رۋحاني جاڭعىرۋ» باعدارلاماسى اياسىندا وتكىزىلىپ وتىرعانىن جەتكىزىپ, اتالعان باعدارلاماداعى ۇلتتىق بىرەگەيلىكتى ساقتاۋ, ءبىلىمنىڭ سالتانات قۇرۋى, سانانىڭ اشىقتىعى, تاريحقا بەتبۇرىس سىندى تاقىرىپتاردى تۇركى الەمى ۇلكەن قىزىعۋشىلىقپەن قابىل العانىن اتاپ ءوتتى.
«2015 جىلى استانادا وتكەن تۇركى كەڭەسىنىڭ V سامميتىندە قازاقستان پرەزيدەنتى نۇرسۇلتان نازارباەۆ تۇگەل تۇركىنىڭ رۋحاني مۇراسىن جيناپ, ناسيحاتتايتىن ورتاق جوبا باستاۋدى تاپسىرعان بولاتىن. «اتالار ميراسى» پورتالى – سول باستاما نەگىزىندە ىسكە اسىرىلعان ىرگەلى جوبا. وسىدان سوڭ تۇركى ەلدەرىنىڭ ۇلتتىق عىلىم اكادەميالارى جانە ادەبي ينستيتۋتتارىنىڭ باسشىلارىمەن جينالىپ, جوبانى قالاي جۇزەگە اسىرۋعا بولاتىندىعى تۋراسىندا اقىلداسقان بولاتىنبىز. تۇركىتىلدەس حالىقتاردىڭ مۇراسى نەگىزىندە 100 تومدىق كىتاپ شىعارۋ جونىندە دە ۇسىنىس قارالدى. الايدا ءدال قازىرگى ۋاقىتتا كىتاپ شىعارۋ ءىسى, اۋدارما جۇمىستارى قىمباتقا تۇسەتىنى بەلگىلى. وسى ورايدا تۇركيا تاراپىنان مۋلتيمەديالىق قور رەتىندە جاساۋ بويىنشا ۇسىنىس ءتۇستى. سول كۇننەن باستاپ حالىقارالىق تۇركى اكادەمياسى ارنايى پورتال جاساقتاۋ جۇمىستارىنا كىرىسىپ كەتتى», دەدى ۇيىم باسشىسى د.قىدىرالى. د.قىدىرالىنىڭ ايتۋىنشا, پورتالداعى اقپاراتتار مەكتەپ وقۋشىسىنان باستاپ ۋنيۆەرسيتەت ستۋدەنتتەرىنە, جالپى تۇركى الەمىنە قاتىستى مالىمەت العىسى كەلگەن كەز-كەلگەن ىزدەنۋشىگە جەڭىلدىك تۋعىزادى ءارى ءتۇبى ءبىر تۇركى جۇرتىنا ورتاق مادەني مۇرا ۋيكيپەدياسى بولماق.
حالىقارالىق تۇركى اكادەمياسىنىڭ قىزمەتكەرى, بەلگىلى تۇركىتانۋشى ءناپىل بازىلحان مۋلتيمەديالىق قوردىڭ جۇمىس ىستەۋ تارتىبىنە قىسقاشا شولۋ جاساپ, تانىستىرىپ ءوتتى. ونىڭ ايتۋىنشا, پورتالدا تۇركىتىلدەس حالىقتاردىڭ, ۇلىستار مەن ەتنيكالىق توپتاردىڭ ەجەلگى زاماننان بۇگىنگە دەيىنگى رۋحاني مۇرالارى توپتاستىرىلعان. عىلىمي ەڭبەكتەردىڭ تۇپنۇسقالىق ترانسكريپتسياسى, اۋدارماسى, فوتوسۋرەتتەرى, فاكسيميلەسى قاتار ۇسىنىلىپ وتىر.
«تۇركى الەمىنىڭ باي مۇراسىنىڭ قورى رەتىندە جاسالعان پورتال قازاق, تۇرىك, اعىلشىن, ورىس تىلىندە مالىمەت تاراتادى. مىسالى, موڭعوليانىڭ التايىندا جارتاستاعى پەتروگليف سانى 100 مىڭنان اسسا, قازاقستانداعى تاڭبالار سانى 2 مىڭ شاماسىندا. وسى سياقتى ارنايى تۇسىنىكتەمەسىمەن جۇكتەلگەن تۇركى الەمىنە ورتاق مۇرالاردى اتالعان پورتالدان وڭاي كورۋگە بولادى», دەيدى ن.ءبازىلحان.
پورتالداعى دەرەكتەر تاقىرىبىنا قاراي تۇركى حالىقتارىنىڭ جازۋ تاريحى, ەجەلگى جازبا مۇرالارى, ەونە تۇرىك بىتىك جازۋلارى, حالىق قازىناسى, ورتاق جازبا ادەبيەت نۇسقالارى, ۇلتتىق ادەبيەت ۇلگىلەرى, ارحەولوگيالىق ەسكەرتكىشتەر, ەتنوگرافيالىق جادىگەرلەر جانە گازەت-جۋرنالدار اتتى توعىز بولىمگە جيناقتالعان. الداعى ۋاقىتتا اكادەميا پورتالدى عىلىمي-تانىمدىق اقپاراتتارمەن ۇدايى تولىقتىرىپ وتىرادى.
ايا ءومىرتاي,
Cۋرەتتى تۇسىرگەن ەرلان ومار,
«ەگەمەن قازاقستان»
