2011 جىلى قارقارالى اۋدانىنداعى تالدى-2 قورىمىن زەرتتەۋ ناتيجەسىندە تابىلعان ارحەولوگيالىق جادىگەرلەر نەگىزىندە جاڭا ەكسپوزيتسيا «ساق مادەنيەتى» زالى دا بۇگىندە بىرەگەي ورىن بولىپ تابىلادى.
سونىمەن مەرەيتويعا وراي مۋزەيدە «XXI عاسىردىڭ مۋزەيى: مۋزەيلەردىڭ دامۋىنداعى قازىرگى زامانعى تەندەنتسيالار جانە پەرسپەكتيۆالار» اتتى رەسپۋبليكالىق عىلىمي-تاجىريبەلىك كونفەرەنتسيا بولدى. جانە دە «سارىارقانىڭ تاريحي-مادەني قۇندىلىقتارى» اتتى عىلىمي كاتالوگ پەن «تاريح جانە مۋزەي» اتتى مونوگرافيانىڭ تۇساۋكەسەر ءراسىمى ۇيىمداستىرىلدى.
– ءبىز مەرەيتويعا وراي ءتۇرلى ۋاقىتتاردا بىزگە دەيىنگى قىزمەتكەرلەر جۇرگىزگەن زەرتتەۋلەردى بىرىكتىرىپ, عىلىمي جيناق دايارلادىق. مىنا مونوگرافيا قاراعاندى وبلىسىنىڭ مۇراجاي ءىسى, ءوڭىر تاريحى تۋرالى. سونداي-اق ىشىنە 300-دەن اسا باعالى جادىگەر ەنگەن عىلىمي كاتالوگتى باسىپ شىعاردىق, – دەيدى وبلىستىق تاريحي-ولكەتانۋ مۇراجايىنىڭ ديرەكتورى ەرجان نۇرماعانبەتوۆ.
مەرەيتوي قۇرمەتىنە وراي ۇيىمداستىرىلعان سالتاناتتى شاراعا قازاقستاننىڭ ءتۇرلى ايماقتارىنان مۋزەي ماماندارى, عالىمدار مەن مادەني-عىلىمي ورتالىق وكىلدەرى شاقىرىلعان.
شارا بارىسىندا وبلىستىق تاريحي-ولكەتانۋ مۇراجايىنىڭ ۇزدىك قىزمەتكەرلەرىنە قۇرمەت گراموتالارى مەن العىس حاتتار تابىستالدى.
سونىمەن قاتار سالتاناتتى شارا بارىسىندا اۋديوگيدتىڭ تۇساۋكەسەرى ءوتتى.
– اۋديوگيد – بۇل ءتۇرلى تىلدەردە جازىلعان ەكسكۋرسيا, ونى جادىگەر ءنومىرى ارقىلى تىڭداۋعا بولادى. ءبىز اۋديوگيدتەردى قازاق, ورىس جانە اعىلشىن تىلدەرىندە دايىندادىق. بۇل جۇمىستارعا شامامەن ءبىر جىلداي ۋاقىت كەتتى. جالپى, قازاقستاندا اۋديوگيدتەر ءبىر جارىم جىل بۇرىن پايدا بولدى. ءبىز بۇل قۇرىلعىلاردى وزىمىزدە جينايمىز, جابدىقتاردى قىتايدان اكەلەمىز. باعدارلامالىق قامسىزداندىرۋدى ءوزىمىز جازامىز, – دەيدى «نۇرلى عالام» جشس وكىلى نۇرلان گارافيەۆ.
«نۇرلى عالام» جشس دايىنداعان اۋديوگيدتەر بۇگىندە قازاقستاننىڭ ءۇش قالاسىندا – استانا, قاراعاندى جانە پاۆلوداردا بار. وبلىستىق تاريحي-ولكەتانۋ مۇراجايىندا تانىستىرىلعان اۋديوگيدكە جەتى تىلدە 350 فايل جۇكتەۋگە بولادى. مۇراجايعا كەلۋشىگە بيلەت ساتىپ العاندا قۇرىلعى بەرىلەدى. ول تىڭدايتىن ءتىلى مەن جادىگەر ءنومىرىن ەنگىزىپ, ەكسكۋرسيانى تىڭداي الادى.
كومپانيا قاراعاندى وبلىسى ءۇشىن بارلىعى وسىنداي 160 اۋديوگيد ازىرلەگەن. ولاردىڭ 40-ى وبلىستىق تاريحي-ولكەتانۋ مۇراجايىنا ارنالعان. قالعاندارىن جەزقازعان, بالقاش, قارقارالى مۇراجايلارى, وبلىستىق بەينەلەۋ ونەرى مۇراجايى, تەمىرتاۋداعى تۇڭعىش پرەزيدەنت مۇراجايى مەن دولينكاداعى ساياسي قۋعىن-سۇرگىن قۇرباندارىن ەسكە الۋ مۇراجايى ءوزارا ءبولىستى.
ميراس اسان,
«ەگەمەن قازاقستان».
قاراعاندى وبلىسى
