«بۇگىنگى تاڭدا قازاقستان ەكسپورتتاۋشى ەلدەردىڭ ىشىندە 52-ءشى ورىنعا يە. الەمنىڭ 113 ەلىنە 800-دەن استام وندىرىستىك ءونىم شىعارامىز. ءبىز ۋران, مىس, تيتان, فەرروقورىتپا, سارى فوسفور, ۇن, ماقتا مايى, بيداي, زىعىر تۇقىمىن جەتكىزۋ بويىنشا الەمدىك كوشباسشىلارىمىز. سوڭعى 5 جىلدا ەكسپورتتىڭ ساپالىق قۇرىلىمى ەداۋىر جاقساردى, ال شەت ەلدەرگە جەتكىزىلەتىن ءونىمنىڭ ۇشتەن ءبىرى ەكونوميكانىڭ شيكىزاتتىق ەمەس سەكتورىنا تيەسىلى», - دەپ توقتالدى ج. قاسىمبەك.
ونىڭ ايتۋىنشا, 2017 جىلدىڭ 9 ايىنىڭ قورىتىندىسى بويىنشا وڭدەلگەن تاۋارلار ەكسپورتى 22 پايىزعا ارتىپ, 11,1 ملرد اقش دوللارىن قۇرادى. فەرروقورىتپالاردى, مۇناي ونىمدەرىن, مىس, مەتالل بۇيىمدارى, پروپان مەن بۋتان, مىرىش جەتكىزىلىمدەرى ۇلعايدى.
«ەكسپورتتىڭ جالپى كولەمىندەگى وڭدەلگەن تاۋارلاردىڭ ۇلەسى 32 پايىزدى قۇرايدى, بۇل 2012 جىلمەن سالىستىرعاندا 7 پايىزعا جوعارى»,- دەپ ناقتىلادى مينيستر.
ۆەدومستۆو باسشىسىنىڭ مالىمەتىنشە, قازاقستان العاش رەت ەلەكتروۆوزداردى, تەپلوۆوزداردى تۇرىكمەنستان, تاجىكستان, ازەربايجان, قىرعىزستان, ۋكراينا ەلدەرىنە ەكسپورتتايدى.
«قازاقستاندا جينالعان اۆتوكولىكتەر تاجىكستانعا, وزبەكستانعا, قىرعىزستانعا, قىتايعا ەكسپورتتالادى. جولاۋشىلار ۆاگوندارى, رەلستەر مەن قازاقستاندىق اسكەري-ونەركاسىپ كەشەنىنىڭ ونىمدەرىن ەكسپورتقا شىعارۋ بويىنشا جۇمىستار جۇرگىزىلۋدە. وتاندىق ءوندىرىستىڭ ترانسفورماتورلارىن جەتكىزۋ كولەمى 60 پايىزعا ءوستى. ەكسپورت كولەمى 21 ملن اقش دوللارىن قۇرايدى. جاقىندا ىسكە قوسىلعان ورال ترانسفورماتور زاۋىتى ءوز ونىمدەرىنىڭ 96 پايىزىن شەتەلگە ەكسپورتتايدى. سونداي-اق, اككۋمۋلياتورلاردىڭ 1,2 ملن داناسىن ەكسپورتقا ۇلعايتۋ ءۇردىسى بايقالادى, شامامەن 35 ملن اقش دوللارى. اككۋمۋلياتورلاردى تاياۋ شىعىس, كاۆكاز جانە بەلارۋس ەلدەرىنە ەكسپورتتاۋعا كىرىستى», - دەدى جەڭىس قاسىمبەك.
