ەلباسىنىڭ تاپسىرماسىمەن «نۇر وتان» پارتياسى ماڭىزدى مەملەكەتتىك باعدارلامالاردىڭ جۇزەگە اسىرىلۋ بارىسىنا ۇدايى باقىلاۋ جۇرگىزىپ كەلەدى. پارتيا توراعاسى ءبىرىنشى ورىنباسارىنىڭ ايماققا ارنايى كەلۋىنىڭ دە ماقساتى – مەملەكەتتىك قارجىنىڭ ءتيىمدى جۇمسالۋىنا كوز جەتكىزۋ. «نۇرلى جول» باعدارلاماسى بويىنشا 2017 جىلى ماڭعىستاۋ وبلىسىنا 80 ميلليارد تەڭگە كولەمىندە قاراجات ءبولىندى. بۇگىندە بۇل قارجىعا تۇرعىن ءۇي-كوممۋنالدىق شارۋاشىلىق نىساندارى جاڭعىرتىلىپ, مەكتەپتەر مەن بالاباقشالار سالىنۋدا جانە ءوڭىردىڭ كولىك ينفراقۇرىلىمى دا قارقىندى دامۋدا.
وسىنداي مەملەكەتتىك قولداۋدىڭ جارقىن كورىنىسى رەتىندە «كاسپي» سۋ تۇشىتۋ زاۋىتىن ايتۋعا بولادى. مۇحتار قۇل-مۇحاممەد پەن ماڭعىستاۋ وبلىسىنىڭ اكىمى ەرالى توعجانوۆ زاۋىتتىڭ جۇمىس بارىسىمەن تانىستى. كەلەسى جىلى كاسىپورىننىڭ وندىرىستىك قۋاتى تاۋلىگىنە 40 مىڭ تەكشە مەتر سۋ وندىرۋگە جەتپەك. وسىلايشا وبلىس حالقى تۇتىناتىن اۋىزسۋدىڭ جارتىسىن ءوندىرۋ مۇمكىن بولماق.
مەملەكەتتىك قولداۋدىڭ ارقاسىندا ماڭعىستاۋ وبلىسىندا جەمىستى جۇمىس ىستەپ تۇرعان كاسىپورىنداردىڭ تاعى ءبىرى – «ماعاش نان» جشس. بۇل سەرىكتەستىك تەك وبلىستا عانا ەمەس, بۇكىل ەلىمىز بويىنشا ەڭ ءىرى نان كومبيناتى بولىپ تابىلادى. بۇگىندە مۇندا ۇننان دايىندالاتىن كونديتەرلىك, نان جانە ماكارون ونىمدەرىنىڭ 150-دەن استام ءتۇرى شىعارىلادى. كاسىپورىننىڭ ەڭبەك ۇجىمىمەن كەزدەسكەن مۇحتار قۇل-مۇحاممەد قازىرگى زامانعى نەمىس تەحنولوگياسىنىڭ جۇمىسىمەن تانىستى.
ماڭعىستاۋ وبلىسى ەلىمىزدەگى ەڭ باستى مۇناي وندىرەتىن وڭىرلەردىڭ ءبىرى ەكەنى بەلگىلى. سونىمەن قاتار بۇگىندە وبلىستا قايتا وندەۋ ءوندىرىسىنىڭ دە ءوسۋ قارقىنى انىق بايقالادى. تەك بيىلدىڭ وزىندە يندۋستريالىق-يننوۆاتسيالىق دامۋ مەملەكەتتىك باعدارلاماسى بويىنشا وبلىستا جالپى سوماسى 70 ميلليارد تەڭگەدەن اساتىن جەتى ءىرى جوبانى جۇزەگە اسىرۋ جوسپارلانىپ وتىر.
سونداي-اق «نۇر وتان» پارتياسى توراعاسىنىڭ ءبىرىنشى ورىنباسارى وڭىردەگى ءوندىرىس ورىندارىنا بىلىكتى ماماندار دايارلايتىن ماڭعىستاۋ پوليتەحنيكالىق كوللەدجىندە بولدى. قازىرگى تاڭدا بۇل ءبىلىم وشاعى ەلىمىزدەگى ەڭ ۇزدىك ون ورتا ارنايى وقۋ ورىندارىنىڭ قاتارىندا. مۇندا دانەكەرلەۋشى, توكار, مەتالل وڭدەۋشى سياقتى وبلىستا جوعارى سۇرانىسقا يە 20 ماماندىق بويىنشا ماماندار دايارلايدى. كوللەدجدە 71 وقۋ كابينەتى, 6 شەبەرحانا جانە 9 لابوراتوريا جۇمىس ىستەيدى. بارلىق كابينەت زاماناۋي قوندىرعىلارمەن جابدىقتالعان. سونىڭ ىشىندە بۇرعىلاۋ جۇمىسىنىڭ, ءاۆتوموبيلدىڭ جانە دانەكەرلەۋ ءىسىنىڭ ۆيرتۋالدى جاتتىعۋ قۇرالدارىن ەرەكشە اتاپ وتكەن ءجون. ودان بولەك, فرەزەر, توكار ستانوكتارى مەن 7 كومپيۋتەر سىنىبى جانە ينتەراكتيۆتى تاقتامەن جابدىقتالعان 64 كابينەت بار.
ەلباسى, «نۇر وتان» پارتياسىنىڭ توراعاسى نۇرسۇلتان نازارباەۆ ءاردايىم جاستارعا ەرەكشە كوڭىل ءبولىپ كەلەدى. تاياۋدا وتكەن پارتيا ساياسي كەڭەسىنىڭ كەڭەيتىلگەن وتىرىسىندا مەملەكەت باسشىسى جاستارعا زور سەنىم ارتىپ, ولاردىڭ قوعامدىق سانانى جاڭعىرتۋدىڭ الدىڭعى لەگىندە ءجۇرۋى كەرەكتىگىن ايتقان بولاتىن. وسى تاپسىرمانى باسشىلىققا العان پارتيا توراعاسىنىڭ ءبىرىنشى ورىنباسارى وڭىردەگى ورتا جانە جوعارى وقۋ ورىندارىنىڭ وقىتۋشىلارىمەن جانە ستۋدەنتتەرىمەن كەزدەستى. ءوز سوزىندە مۇحتار قۇل-مۇحاممەد ەلباسى الدىمىزعا قويىپ وتىرعان مىندەتتەردىڭ, سونىڭ ىشىندە قوعامدىق سانانى جاڭعىرتۋدىڭ ماڭىزى مەن مانىنە نازار اۋداردى. كەزدەسۋ بارىسىندا وبلىستاعى تالانتتى, قوعامدىق جۇمىستارعا بەلسەنە قاتىسىپ جۇرگەن, ءوز ىستەرىنىڭ ناعىز مايتالمان ماماندارى سانالاتىن ون جاس ازامات پارتيا قاتارىنا قابىلدانىپ, ولارعا پارتيالىق بيلەتتەرى سالتاناتتى جاعدايدا تاپسىرىلدى.
سونىمەن قاتار مۇحتار قۇل-مۇحاممەد پارتيانىڭ وبلىستىق اكتيۆىمەن كەزدەسىپ, وندا مەملەكەت باسشىسىنىڭ ساياسي كەڭەس وتىرىسىندا بەرگەن تاپسىرمالارىن جۇزەگە اسىرۋ جونىندە ۇيىمنىڭ الدىندا تۇرعان ناقتى مىندەتتەردى اتاپ ءوتتى.
گۇلايىم شىنتەمىرقىزى,
«ەگەمەن قازاقستان»
ماڭعىستاۋ وبلىسى
