ۇكىمەتارالىق كوميسسيا وتىرىسىندا ءبىرىنشى بولىپ ءسوز العان ا.مامين قازاقستان مەن رەسەي اراسىندا ورتا مەرزىمدەگى يندۋستريالىق-يننوۆاتسيالىق ىنتىماقتاستىقتى دامىتۋ قاجەتتىلىگىنە ەكپىن ءتۇسىردى. بۇل ءۇشىن قۇنى 4,5 ميلليارد اقش دوللارىنا تەڭ بىرلەسكەن جوبا ازىرلەنۋى ءتيىس. وسى تۇرعىدا ول ەكى تاراپتىڭ ساراپشىلارىنا ونى جۇزەگە اسىرۋدىڭ ەكىجاقتى مۇددەلەرىن بىلدىرە الاتىن باعدارلاما جوباسىن ازىرلەۋدى ۇسىندى. ونىڭ مالىمدەۋىنشە, قازاقستان مەن رەسەي اراسىنداعى ستراتەگيالىق ارىپتەستىك جونىندەگى باعىت وزگەرىسسىز قالا بەرۋىمەن بىرگە, الداعى ۋاقىتتا ءوزىنىڭ جاڭا ارناسىن تابۋى قاجەت.
بۇگىنگى كۇنى وتىن-ەنەرگەتيكا كەشەنىندە رەسەيلىك كومپانيالار قازاقستاندىق مۇناي-گاز كوندەنسات ورىندارىن يگەرۋدە ەكى جاققا دا ءتيىمدى قارىم-قاتىناستار شەڭبەرىندە بەلسەندى ءىس-قيمىل تانىتىپ كەلەدى. سونىڭ ىشىندە ءۇشىنشى ەلدەر باعىتىنا قاراي مۇناي تاسىمالداۋ ىسىندە ەكى ەل مۇددەلەرى تولىقتاي ەسكەرىلگەن. رەسەي مەن قازاقستان اراسىندا كولىك ءترانزيتىن ۇدايى ۇلعايتا ءتۇسۋ دە جەتەكشى ورىن الادى دەي كەلە قازاقستان ۇكىمەتى باسشىسىنىڭ ورىنباسارى اقتوبەدەگى كەزدەسۋدە بۇل ماسەلەلەر جونىندەگى كەلىسىمدەر ودان ءارى شەگەندەلە تۇسكەنىن جەتكىزدى.
ءوز كەزەگىندە ي.شۋۆالوۆ اقتوبە ايماعىنداعى جىلى قابىلداۋ ءۇشىن ءوز ريزاشىلىعىن ءبىلدىردى. ونىڭ پىكىرىنشە, قازاقستاننىڭ بۇل وبلىسى – ناقتى جەتىستىكتەر مەن تابىستارعا قول جەتكىزە بىلگەن ەرەكشە ءوڭىر. وسىنداي ەكونوميكالىق الەۋەتى مول ءوڭىردىڭ رەسەيمەن شەكارالاس ورنالاسۋى وتە ماڭىزدى. مۇنداعى اقتوبە رەلس-ارقالىق زاۋىتى اتقارىپ وتىرعان ۇلكەن جوبالار ءبىز ءۇشىن دە وتە قاجەت. ءبىز ونى بىرلەسكەن جوبالار قاتارىنا قوسا الامىز. ويتكەنى زاۋىت ونىمدەرىنىڭ كەيبىر بولىكتەرى مەن بولشەكتەرى رەسەيدە شىعارىلادى, دەدى ي.شۋۆالوۆ.
سونداي-اق ۇكىمەتارالىق كوميسسيا وتىرىسىندا رەسەي مەن قازاقستان اراسىنداعى تاۋار الماسۋدا بەلگىلى ءبىر شەكتەۋلەر مەن ء«بىر قايناۋى ىشىندەگى» جوبالار بار ەكەندىگى دە تىلگە تيەك ەتىلدى. الداعى ۋاقىتتا مۇنداي شەكتەۋلەر الىنىپ تاستالۋى كەرەك. سوندىقتان دا ەكى ەلدىڭ ۇكىمەتتىك دەڭگەيدەگى ساراپشىلارى بۇعان بارلىق كۇش-جىگەرى مەن رەسۋرستىق مۇمكىندىكتەرىن جۇمساۋى قاجەتتىگى دە وتىرىس قورىتىندىسىنا ارنالعان حاتتامادان كورىنىس تاپتى.
باسقوسۋدا اقتوبە وبلىسىنىڭ اكىمى بەردىبەك ساپارباەۆ ءسوز الىپ, ۇكىمەتارالىق كوميسسيا وتىرىستارىنىڭ ىقپالى مەن اسەرى, ونىڭ شەكارالاس وڭىرلەرگە ناقتى تيگىزەتىن كومەگىنە قاتىستى وي-تۇجىرىمدارىن العا تارتتى. وبلىس باسشىسى سونىڭ ءبىر مىسالى رەتىندە وتكەن توعىز ايدا شەكارالاس وڭىرلەردىڭ اراسىنداعى تاۋار اينالىمى 146 پايىزعا وسكەنىن مالىمدەدى.
تەمىر قۇسايىن,
«ەگەمەن قازاقستان»
اقتوبە وبلىسى
