بۇعان دەيىن كوپتەگەن فيلمدەر تۇسىرگەن ءارى اقىن, ءارى رەجيسسەر تيۋلكين جۋرناليستەرگە بەرگەن سۇحباتىندا شىعىس قازاقستان وبلىسىنان تاعدىرى, بولمىسى ەشكىمگە ۇقسامايتىن, ءومىر ءۇشىن كۇرەستە ەرەكشە جانقيارلىق تانىتىپ عۇمىر كەشىپ جۇرگەن ادام ىزدەگەنىن ايتتى. بىلەتىندەر رەجيسسەرگە ەكى ادامدى نۇسقاعان – ءبىرى سۋرەتشى, ەكىنشىسى فەرمەر. ەكەۋى دە زاعيپ, ەكەۋى دە جانكەشتىلىكپەن ءومىر ءسۇرىپ جاتقان جاندار ەكەن. تيۋلكين فەرمەردى تاڭداپتى.
– شىعىس قازاقستاننىڭ سوناۋ ءبىر تۇكپىرىندە تۇراتىن فەرمەر سەرىك بودانباەۆتى ءتۇسىرۋ ءۇشىن تىكۇشاقپەن باردىق. ونىڭ تىرشىلىگىمەن تانىسىپ, سۇحبات الىپ, ون كۇن بويى جۇمىس جاسادىق. بىراق ماعان بىرنارسە جەتپەي قالعان سياقتى بولىپ تۇردى, – دەيدى رەجيسسەر.
كەزەكتى ءبىر اڭگىمە كەزىندە زاعيپ فەرمەر ايەلى اۋىرىپ قالعاندا قىستاۋدان اۋىلعا جاياۋ بارعانىن, بىراق قينالماي, اداسپاي جەتكەنىن باياندايدى. فەرمەردىڭ بۇل وقيعاسى – ءوزى جايلى دەرەكتى ءفيلمنىڭ كىلتى ەدى. دەرەكتى فيلمدە كەيىپكەر جول بويى ءوز ومىرىندەگى ەڭ ەلەۋلى وقيعالاردى ەسىنە تۇسىرەدى. رەجيسسەر جولدى ادامنىڭ ءومىر جولىمەن شەندەستىرىپ, كەيىپكەردىڭ باستان كەشكەن وقيعالارىن ومىرلىك ماقساتتارعا ۇمتىلىستار رەتىندە كورسەتكەن.
«13 كيلومەتر» دەرەكتى ءفيلمىنىڭ تۇساۋكەسەرى ەندى عانا ءوتىپ جاتقانىمەن, وسىدان كوپ جىل بۇرىن تۇسىرىلگەن فيلم ەكەنىن ايتىپ ءوتۋىمىز كەرەك. سونداي-اق بۇل دۇنيە وسىعان دەيىن برازيليادا وتكەن حالىقارالىق «ەڭسەرۋ» كينوفەستيۆالىندە جانە رەسەيدە وتكەن دەرەكتى فيلمدەر فەستيۆالىندە ارنايى جۇلدەلەرگە يە بولعان.
قولداعى بار اقپاراتتار بويىنشا, بۇل فەستيۆالعا 10 ەلدەن 280 ءوتىنىش تۇسكەن. قازىلار القاسى سونىڭ 31-ءىن عانا تاڭداپ الىپتى. ناتيجەسىندە, وتاندىق «13 كيلومەتر» ارنايى سىيلىق يەلەنگەن.
رەجيسسەر اماندىق بولسا, وسى جىلدىڭ جەلتوقسانىندا ۋفادا وتەتىن حالىقارالىق «كۇمىس اقبوزات» كينوفەستيۆالىنە دە دەرەكتى ءفيلمىنىڭ قاتىساتىنىن جەتكىزدى.
ايگۇل سەيىل,
«ەگەمەن قازاقستان
