قازاقستان مەن فرانتسيا اراسىندا ءتۇرلى سالادا تىعىز بايلانىس ورناپ, دامىعانىن ايتقان ايماق باسشىسى ەكى ەلدىڭ ساۋدا-ەكونوميكالىق ارىپتەستىك بايلانىسى بويىنشا 5-ورىندا كەلەتىنىن اتاپ ءوتتى.
«قازاقستان نەگىزىنەن مۇناي, مەتالل مەن مەتالل ونىمدەرىن, حيميالىق ونىمدەر, اۋىل شارۋاشىلىعى ازىق-ت ۇلىگىن ەكسپورتتاۋدا. ال فرانتسيادان مەملەكەتىمىز ەلەكتروندى جانە مەحينيكالىق جابدىقتار, تۇتىنۋشىلىق تاۋارلار, ءدارى-دارمەك پەن كوسمەتيكا, اۆتوكولىكتەر, تاعام ونىمدەرى مەن قۇرىلىس ماتەريالدارىن يمپورتتايدى. فرانتسيانىڭ قازاقستان ەكونوميكاسىنا 2005 جىلدان باستاپ 2016 جىلدىڭ جارتىسىنا دەيىن قۇيعان قارجىسى 12,7 ملرد دوللاردى قۇرادى. ءبىزدىڭ ەلىمىزدە فرانتسۋز كاپيتالى بار 135 كاسىپورىن جۇمىس ىستەۋدە. ولاردىڭ اراسىندا «توتال», «ارەۆا», «دانون», «ۆيكات», «پەجو», «الستوم» جانە باسقا دا كومپانيالار بار»,- دەدى جانسەيىت تۇيمەباەۆ.
بۇدان بولەك, وبلىس اكىمى وڭىردە ينۆەستورلارعا قولايلى جاعداي جاسالعانىن اتاپ ءوتىپ, وڭتۇستىك قازاقستان وبلىسى ءتۇرلى سالادا قارىم-قاتىناستى دامىتۋعا ءازىر ەكەنىن جەتكىزدى.
ءوز كەزەگىندە فرانتسۋز ەلشىسى وقو مەن فرانتسيا ايماقتارى اراسىنداعى ءوزارا ءتيىمدى ساۋدا-ەكونوميكالىق, ينۆەستيتسيالىق, سونداي-اق, مادەني-گۋمانيتارلى ارىپتەستىكتى دامىتۋدىڭ الەۋەتى زور ەكەنىن ايتتى.
«ەكى ەل اراسىنداعى ىسكەرلىك قارىم-قاتىناستى ودان ءارى دامىتۋ ماقساتىندا ءبىزدىڭ ايماقتار اراسىندا يمپورت جانە ەكسپورتى كوپ سالالاردى انىقتاۋ باعىتىندا بىرگە جۇمىس جاساۋدى ۇسىنامىن. سول سالالار بويىنشا بىرىككەن جاڭا ءوندىرىس ورىندارىن اشۋعا بولادى دەپ ويلايمىن. ءبىز ءوزارا ارىپتەستىگىمىزدى ۇزاق مەرزىمدە جالعاستىرۋعا سەنەمىز, - دەدى فيليپپ مارتينە.
فرانتسيا بۇگىنگى تاڭدا دامىعان يندۋستريالدى-اگرارلى ەل سانالادى. بۇل ەل وندىرىستىك ونەركاسىپ كولەمى بويىنشا الەمدە الدىڭعى قاتاردا كەلەدى. ماسەلەن, وڭدەۋ ونەركاسىبىنىڭ ماشينا جاساۋ, اۆتوكولىك جاساۋ, ەلەكتر-تەحنيكالىق جانە ەلەكتروندى ءوندىرىس, اۆياتسيا, كەمە جانە ستانوكتار جاساۋ سەكىلدى سالالارى جاقسى دامىعان. سونداي-اق, فرانتسيا – الەمدەگى ەڭ ءىرى حيميالىق جانە مۇناي حيميالىق ونىمدەر, قارا جانە ءتۇستى مەتالل شىعارۋشى مەملەكەتتىڭ ءبىرى سانالادى.
وڭتۇستىككە جاساعان ساپارى بارىسىندا فرانتسۋز ەلشىسى مەن فرانتسۋز اليانسى پرەزيدەنتىنىڭ قاتىسۋىمەن فرانتسۋز اليانسىنىڭ يناۋگۋراتسياسى وتەدى دەپ جوسپارلانۋدا. ەلشى بۇعان قوسا وبلىستاعى ۋران ءوندىرۋ كاسىپورىندارىنىڭ جۇمىسىمەن تانىساتىن بولادى.
