كەزدەسۋ بارىسىندا تاراپتار انا مەن بالا ءولىمىن ازايتۋ, گەندەرلىك تەڭدىكدى ساقتاۋ, تۇرمىس جاعدايىنداعى زورلىق-زومبىلىقتى بولدىرماۋ جونىندە ءوزارا پىكىر الماستى. سونداي-اق تىعىز قارىم-قاتىناستا جۇمىس ىستەۋ ماقساتىندا وڭتۇستىك قازاقستان وبلىسىنان اتالعان قوردىڭ وكىلدىگىن اشۋ ماسەلەلەرىن تالقىلادى. ءوز كەزەگىندە ءسوز العان ءوڭىر باسشىسى دجۋليا ۆاللەزەنى جاڭا قىزمەتىمەن قۇتتىقتاپ, الداعى اتقارار جۇمىستارىنا ساتتىلىك تىلەدى.
«وڭتۇستىك قازاقستان وبلىسى قازاقستانداعى دەموگرافيالىق احۋالى وتە جوعارى ءوڭىر سانالادى. بىزدە جىلىنا 80 مىڭعا جۋىق ءسابي دۇنيەگە كەلەدى. قازاق حالقىنىڭ نەگىزگى شوعىرى دا بىزدە ورنالاسقان. 3 ميلليونعا جۋىق حالقى بار وڭىردە انالاردىڭ ۇلەس سالماعى 50 پايىزدى قۇرايدى. سوندىقتان وبلىسىمىزدا انا مەن بالا ءولىمىن ازايتۋ ماسەلەسىنە ەرەكشە ءمان بەرىلىپ كەلەدى. وسى رەتتە ءسىز باسقارىپ وتىرعان قوردىڭ وڭتۇستىك قازاقستان وبلىسىندا وڭىرلىك وكىلدىگىن اشۋدى ۇسىنعان بولار ەدىم», - دەدى جانسەيىت قانسەيىت ۇلى.
ءوز كەزەگىندە ءسوز العان دجۋليا ۆاللەزە قوردىڭ انا مەن بالانىڭ رەپرودۋكتيۆتى دەنساۋلىعىن جاقسارتۋ, گەندەرلىك تەڭدىك پەن دەموگرافيالىق ماسەلەلەردى قامتۋ سالالارىنداعى نەگىزگى ميسسيالارىن بايانداپ بەردى.
ء«بىز ءمان بەرەتىن نەگىزگى ماسەلەنىڭ ءبىرى – انا مەن بالا دەنساۋلىعىن ساقتاۋ. وسى رەتتە انالاردىڭ بوسانۋ كەزىندەگى قاۋىپتىلىگىن قامتاماسىز ەتىپ, جوسپارلى جۇكتىلىك ماسەلەسىنە ءمان بەرەمىز. جاستاردىڭ انا بولۋعا دەگەن دايىندىق جۇمىستارىن كۇشەيتىپ, گەندەرلىك تەڭدىكتى ساقتاۋعا, حالىقتىڭ دەموگرافيالىق وسىمىنە ساراپتاما جاساپ وتىرۋدى ماقسات تۇتامىز. جوعارىدا ايتىلعان جۇمىستاردى بىرلەسىپ اتقارۋ ماقساتىندا ىنتىماقتاستىقتا بىرىگىپ جۇمىس ىستەۋگە نيەت ءبىلدىرىپ وتىرعاندارىڭىزعا العىس بىلدىرەمىن», - دەدى دجۋليا ۆاللەزە.
كەزدەسۋ بارىسىندا وڭتۇستىك قازاقستان وبلىسى اكىمدىگى مەن بۇۇ حالىقتىڭ قونىستانۋى سالاسىنداعى يۋنفپا قورى اراسىندا ءوزارا تۇسىنىستىگى جايلى مەموراندۋمعا قول قويىلدى. تاراپتار جەرگىلىكتى دەنساۋلىق ساقتاۋ جۇيەسىنىڭ الەۋەتىن, انا مەن بالا دەنساۋلىعىن قورعاۋ بويىنشا كەشەندى باعدارلامانى بىرلەسىپ ىسكە اسىرۋ جونىندە مامىلەگە كەلدى. سونداي-اق تاراپتار گەندەرلىك زورلىققا ۆەدومستۆوارالىق ارەكەت ەتۋ جۇيەسىن ەنگىزۋ ارقىلى تۇرمىستىق زورلىقتىڭ الدىن الۋ بويىنشا باسقارۋ الەۋەتىن نىعايتۋعا ۋاعدالاستى.
