قازىرگى تاڭدا قازاقستان مەن قىتاي ءوزارا اۋىل شارۋاشىلىعى سالاسىنداعى بايلانىسىن نىعايتا تۇسۋدە. بۇل قوس تاراپتىڭ اتالعان سالا بويىنشا ارىپتەستىكتى ودان ءارى دامىتۋعا دەگەن وڭ تالابىن اڭعارتادى.
اۋىل شارۋاشىلىعى ءمينيسترى اسقار مىرزاxمەتوۆتىڭ قىتايلىق ارىپتەسى حان چانفۋمەن كەزدەسۋىندە بەلگىلى بولعانداي, ەندى ەكى ەل اگروعىلىم سالاسىن ۇشتاستىرۋعا ەرەكشە باسىمدىق بەرمەك. قازاقستاندىق ارىپتەسىنىڭ بۇل جونىندەگى ۇسىنىسىن قىتاي ءمينيسترى قۇپتاپ وتىر. كورشىمىزدىڭ وسى باعىتتاعى وزىق تەحنولوگياسىن پايدالانۋ بىزگە دە ءتيىمدى. كەلەر جىلى ماسەلەنى پىسىقتاۋ ءۇشىن ەكى ەل عالىمدارىنىڭ كەزدەسۋى جوسپارلاندى.
قىتاي اۋىل شارۋاشىلىعى عىلىمدار اكادەمياسى دەپارتامەنتىنىڭ ديرەكتورى سيۋي ءميننىڭ ايتۋىنشا, ەكىجاقتى ىنتىماقتاستىقتى ىلگەرىلەتۋ, اسىرەسە اگروعىلىم سالاسىنداعى ارىپتەستىكتى جانداندىرۋ ەكى ەلگە دە ءتيىمدى.
جالپى, قىتايدا اۋىل شارۋاشىلىعى كووپەراتسياسى جاقسى دامىعان. كورشىمىز بۇل سالاداعى تاجىريبەسىمەن بولىسۋگە دايىن.
بەيجىڭدەگى جۇمىس ساپارى بارىسىندا اسقار مىرزاxمەتوۆ ساپانى قاداعالاۋ, ينسپەكتسيا جانە كارانتين جونىندەگى مەملەكەتتىك كوميتەتتىڭ ءمينيسترى چجي شۋپينمەن دە كەزدەستى. تاراپتار قازاقستاننان قىتايعا ساتىلاتىن جىلقى ەتىنە قويىلاتىن كارانتيندىك تالاپتاردىڭ حاتتاماسىنا قول قويدى. سونىمەن بىرگە قازاقستاندىق اگرووندىرىستىك كەشەنگە ينۆەستيتسيا تارتۋ مەن وسى سالاداعى ساۋدا-ساتتىقتى ارتتىرۋ بويىنشا بىرقاتار كەلىسسوز جۇرگىزىلدى.
بۇل تۋرالى قىتاي كومپانياcىنىڭ باسشىسى لي حۋنسين: ء«بىز ءۇشىن كەزدەسۋ جەمىستى اياقتالدى. 3 مەموراندۋم مەن ءبىر كەلىسىمشارتقا قول قويدىق. الداعى ۋاقىتتا قازاقستاندىق ارىپتەستەرىمىزبەن بىرلەسىپ اگروبيرجا قۇرماقپىز», دەيدى.
قىتاي تاراپى ينۆەستيتسيالىق جانە قارجىلىق قىزمەتتەرگە جاۋاپتى بولماق. تەxنيكالىق قولداۋ مەن قىزمەتكەرلەر دايىنداۋعا داليان بيرجاسى كومەك جاسايدى. ويتكەنى قازىر داليان اۋىل شارۋاشىلىعى ونىمدەرىن بيرجادا ساتۋدا الەمدە الدىڭعى ورىندا.
بۇدان بولەك, ەكىجاقتى كەزدەسۋ بارىسىندا قازاقستاندىق ديقانداردىڭ استىعىن الىپ ەلدىڭ نارىعىنا شىعارۋ ماسەلەسى دە ءسوز بولدى. تاياۋدا قىتايعا 20 مىڭ توننا بيداي مەن 2 مىڭ توننا وسىمدىك مايى جونەلتىلمەك. شىعىستاعى كورشىمىز قازاقستانداعى 2017-2024 جىلدارعا ارنالعان ءىرى قارا مالىن ءوسىرۋ جوباسىنا دا 600 ملن دوللار ينۆەستيتسيا سالۋعا كەلىسىپ وتىر. كورشى ەلدىڭ ينۆەستورلارى الداعى ۋاقىتتا وڭتۇستىك قازاقستان وبلىسىندا قۇنى 100 ملن اقش دوللارىن قۇرايتىن اگرويندۋستريالدى كەشەن سالماق. ءدال وسىنداي سوماعا جوعارى ساناتتى بيدايدى تەرەڭ وڭدەيتىن كاسىپورىندى ىسكە قوسۋ دا جوسپاردا بار كورىنەدى.
سونىمەن قاتار وسى ساپار بارىسىندا قازاقستاندىق جانە قىتايلىق كومپانيالار اراسىندا ساۋدا سالاسىندا جانە اگروونەركاسىپتىك كەشەنگە ينۆەستيتسيالار تارتۋ بويىنشا ىنتىماقتاستىق تۋرالى بىرقاتار كەلىسىمدەرگە قول قويىلدى. اتاپ ايتار بولساق, ولار: «قازاگرو» ۇبح» اق مەن «State Development and Investment Corporation» اراسىندا وڭتۇستىك قازاقستان وبلىسىندا اگروونەركاسىپ كەشەن سالۋ تۋرالى مەموراندۋم; «كازاگرو» ۇبح»اق جانە «Grand China Business Management Co.» كومپانياسى اراسىندا ءبىرىنشى كلاستى بيداي ونىمدەرىن ءوسىرۋدى ۇيىمداستىرۋ جوباسىن قارجىلاندىرۋ بويىنشا مەموراندۋم; «ازىق-ت ۇلىك كورپوراتسياسى» اق مەن Dalian Commodity Exchange اراسىندا كوتەرمە ساۋدا ورتالىقتارىنىڭ جەلىسىن قۇرۋ جانە تاۋار بيرجاسىن ۇيىمداستىرۋ تۋرالى مەموراندۋم; «ازىق-ت ۇلىك كەلىسىمشارت كورپوراتسياسى» اق مەن «Grand China Business Management»LTD اراسىندا 20 مىڭ توننا ءبىرىنشى كلاستى بيدايدىڭ ەكسپورتىنا قاتىستى كەلىسىم; «ازىق-ت ۇلىك كەلىسىمشارت كورپوراتسياسى» اق مەن «Grand China Business Management» LTD اراسىندا 2 مىڭ توننا وسىمدىك مايىن ەكسپورتتاۋ تۋرالى كەلىسىم; 2018-2024 جىلدارعا ارنالعان ينۆەستيتسيالىق باعدارلامانى ىسكە اسىرۋ تۋرالى «قازاقستاننىڭ ەت اسسوتسياتسياسى» قق جانە CITIC Construction اراسىندا قارا مال مەن سيىر ەتى ءوندىرىسى جانە ەكسپورتى ءۇشىن ينفراقۇرىلىم قۇرۋ تۋرالى كەلىسىم.
دايىنداعان
جولدىباي بازار,
«ەگەمەن قازاقستان»
