ينستيتۋتتىڭ بالالار بولىمشەسىنىڭ وفتالمولوگتارى جانە رەزيدەنت-وفتالمولوگتار 7 مەن 17 جاس ارالىعىنداعى 200-دەن اسا وقۋشىنىڭ كوزىن تەكسەرىپ, زەرتتەۋ جۇمىستارىن جۇرگىزدى. بىرنەشە اپتاعا سوزىلعان اۋقىمدى جۇمىستىڭ ناتيجەسىندە مەكتەپ تاريحىندا العاش رەت بالالاردىڭ جاسى, دياگنوزى, جۇرگىزىلگەن وپەراتسيالار سانى, قوسالقى اۋرۋلارى جانە ءارى قاراي نە ىستەۋ كەرەكتىگى جازىلعان ەلەكتروندى بازا جاساقتالدى. تەكسەرىس بارىسىندا بالالار اراسىندا الداعى ۋاقىتتا كوزگە رەفراكتسيالىق تۇزەتۋ جۇرگىزۋ ماقساتىندا كوز اۋرۋلارى عىلىمي-زەرتتەۋ ينستيتۋتىندا لازەرلىك جانە حيرۋرگيالىق ەمدەۋدى قاجەت ەتەتىن 120 جاعداي انىقتالدى.
بۇل مەكتەپ 1932 جىلى الماتى قالالىق حالىق كوميسسارياتىنىڭ شەشىمىمەن اشىلىپ, 1957 جىلى زاعيپ جانە كوزى ناشار كورەتىن بالالارعا ارنالعان وقۋ ورنىنا نيكولاي وستروۆسكيدىڭ اتى بەرىلدى. 1971 جىلى مەكتەپ قازىرگى عيماراتىنا كوشىپ كەلدى. الماتى قالاسىنداعى كوزى ناشار كورەتىن جانە مۇلدە كورمەيتىن بالالاردى وقىتاتىن بىردەن-ءبىر ارنايى وقۋ ورنىندا ۇزاق جىل بويى ورتا ءبىلىمدى مەديتسينالىق قىزمەتكەرلەردەن بولەك, وفتالمولوگ دارىگەرلەر جۇمىس ىستەپ كەلگەن ەدى. الايدا سوڭعى جىلدارى ەلىمىزدە تۇرعان جەرىنە بايلانىستى ەمدەلۋ مۇمكىندىگى تۋىندادى دەگەن سىلتاۋمەن وفتالمولوگتىڭ ورنى قىسقارىپ, «ەرەكشە» بالالار دارىگەرلەر تاراپىنان جۇرگىزىلەتىن قاجەتتى كاسىبي باقىلاۋدان ايىرىلىپ قالدى.
قازىرگى تاڭدا وقۋ ورنىندا 32 سىنىپ بار. وندا 221 بالا ءبىلىم الادى جانە سىنىپتاردىڭ 11-ىندە قازاق تىلىندە ساباق وتكىزىلەدى. مەكتەپتە زاماناۋي تەحنيكامەن جابدىقتالعان, ينتەراكتيۆتى تاقتالار ورناتىلعان 15 كابينەت, 2 كومپيۋتەرلىك سىنىپ, ءۇش شەبەرحانا, سپورتتىق زال, كىتاپحانا, وقۋ جانە ويىن زالى جۇمىس ىستەپ تۇر.
حالىقارالىق «اق تاياق» كۇنى 1970 جىلى 15 قازاندا حالىقارالىق زاعيپتار فەدەراتسياسىنىڭ قولداۋىمەن بەكىتىلگەن. اق تاياق – زاعيپ جاننىڭ نىشانى – قوعامداعى دەنى ساۋ ادامدارعا ورتامىزدا مۇمكىندىگى شەكتەۋلى جانداردىڭ ءومىر ءسۇرىپ جاتقانىن, ولارعا ءبىزدىڭ تاراپىمىزدان كومەك كەرەك ەكەنىن ەسكە سالاتىن قاسىرەتتىڭ بەلگىسى. اق تاياقتىڭ تاريحى سوناۋ 1921 جىلدان باستالادى. سول جىلى كورۋ قابىلەتىنەن ايىرىلعان اعىلشىن دجەيمس بيگس كوشەدەگى كادىمگى تاياق ۇستاۋشىلاردان ەرەكشەلەنىپ كورىنۋ ءۇشىن قولىنا ۇستايتىن تاياعىن اق تۇسكە بوياتىپ الادى. سونىمەن بىرگە ءوزى سياقتى زاعيپ جاندارعا تاياقتارىن اق تۇسكە بوياۋعا كەڭەس بەرەدى. سودان ون جىل وتكەننەن كەيىن عانا انگليا ۇكىمەتى كوزى كورمەيتىن جانداردى اق تاياقپەن قامتاماسىز ەتە باستايدى. كەيىننەن اق تاياق فرانتسياعا جەتەدى. ال بۇگىندە اق ءتۇستى تاياق الەم بويىنشا زاعيپ جانداردىڭ بەلگىسى بولىپ ەسەپتەلەدى.
«اق تاياق» كۇنى – جارىق دۇنيەنى ەمىن-ەركىن كورە المايتىن, مۇمكىندىگى شەكتەۋلى بالالارعا قوعامنىڭ نازارىن اۋدارىپ, ولارعا قولىمىزدان كەلگەنشە جاردەم بەرىپ, جاناشىرلىقتى سەزدىرىپ, بولاشاققا ءۇمىتى مەن سەنىمىن نىعايتىپ, جاقسىلىققا جەتەلەۋدىڭ ءبىر مۇمكىندىگى. كۇن سايىن تاڭنىڭ اتقانى مەن كۇننىڭ باتقانىن تاماشالاي الاتىن جانداردى كۇن ساۋلەسىن كورۋدى اڭسايتىن زاعيپ بۇلدىرشىندەرگە قول ۇشىن بەرۋگە شاقىرۋ. ويتكەنى مۇنداي بالالار ءبىزدىڭ قامقورلىعىمىز بەن كومەگىمىزگە مۇقتاج.
ماقسات رامازان ۇلى,
جۋرناليست
الماتى
