ونداعى نەگىزگى ماقسات – قالا اۋماعىنداعى ەلدى مەكەندەردىڭ الەۋمەتتىك, ەكونوميكالىق, ينفراقۇرىلىمدىق ماسەلەلەرى شەشۋ. بۇگىن بۇل تۋرالى وقو وڭىرلىك كوممۋنيكاتسيالار قىزمەتىندە وتكەن بريفينگتە وبلىستىق ساۋلەت جانە قالا قۇرىلىسى باسقارما باسشىسىنىڭ ورىنباسارى باقتىباي دۇيسەبەكوۆ ءمالىم ەتتى.
ونىڭ ايتۋىنشا, اگلومەراتسيا – ەكونوميكالىق, مادەني جانە تۇرمىستىق جاعىنان ءبىر-بىرىمەن تىعىز بايلانىستى ەلدى مەكەندەردىڭ شاعىن اۋماققا شوعىرلانۋى.
«شىمكەنت اگلومەراتسياسىنا 9 قالا, اۋدان اۋماقتارى كىرەدى. بولجامعا سايكەس, 2020 جىلعا قاراي اگلومەراتسياسىنىڭ حالقى 10,3 پايىزعا ارتادى دەپ كۇتىلۋدە. ال, 2030 جىلى اگلومەراتسيا حالقىنىڭ سانى بازالىق كەزەڭگە قاراعاندا 29,7 پايىزعا كوبەيەدى» , - دەدى باقتىباي ەلىك ۇلى.
سونىمەن قاتار, شىمكەنت اگلومەراتسياسى اۋماعىندا 2020 جىلدىڭ سوڭىنا قاراي مەكتەپكە دەيىنگى ۇيىمداردى 35 پايىزعا, ال ءبىلىم بەرەتىن مەكتەپتەردىڭ سانىن 17 پايىزعا ۇلعايتۋ جوسپارلانعان. بۇدان بولەك, ستاتسيونارلىق كومەك كورسەتەتىن ۇيىمداردىڭ سانى 2020 جىلعا قاراي 11 پايىزعا كوبەيەتىن بولادى. سونداي-اق «نۇرلى جەر» باعدارلاماسىنا سايكەس, جالدامالى تۇرعىن ءۇي قۇرىلىسىنىڭ كولەمى دە ارتپاق.
ازىرلەنگەن جوباعا سايكەس, حالىقتىڭ كوشى-قون اعىنىڭ ۇستاپ قالۋ ءۇشىن «كونترماگنيتتەر» دەپ اتالاتىن ءىرى ەلدى مەكەندەر دامىتىلادى. ول ءۇشىن وڭتۇستىك باعىتتا سارىاعاش, ال باتىس باعىتىندا ارىس قالاسى, سونداي-اق شىعىس باعىتىندا تۇرار رىسقۇلوۆ اۋىلى تاڭدالىپ الىنعان. حالىقتىڭ ىشكى كوشى-قون ورتالىقتارىن دامىتۋ ماقساتىندا سەرىكتەس ەلدى مەكەندەر رەتىندە لەڭگىر قالاسى, اقسۋ, قازىعۇرت, بادام, تەمىرلان, تورتكۇل, شايان ەلدى مەكەندەرى بەلگىلەنىپ وتىر.
ايتا كەتەيىك, جوبادا اگلومەراتسيا اۋماعىندا ءومىر ءسۇرۋدىڭ قولايلى جاعدايلارىن قامتاماسىز ەتۋگە باعىتتالعان ينجەنەرلىك, كولىكتىك, الەۋمەتتىك, رەكرەاتسيالىق ينفراقۇرىلىمدارىنىڭ كەشەندى دامىتۋ شارالارى قاراستىرىلعان.
