قازاقستان مەن رەسەي جوعارى وقۋ ورىندارى رەكتورلارىنىڭ فورۋمى قارساڭىندا قىزدار ۋنيۆەرسيتەتىنىڭ رەكتورى گاۋحار الدامبەرگەنوۆا مەن وڭتۇستىك ورال مەملەكەتتىك گۋمانيتارلىق-پەداگوگيكالىق ۋنيۆەرسيتەتىنىڭ رەكتورى ۆلاديمير سادىرين ءوزارا كەلىسىم ورناتىپ, بىرلەسىپ جۇمىس اتقارۋعا ۋاعدالاستى.
قۇجات اكادەميالىق ۇتقىرلىق باعدارلاماسى اياسىندا ستۋدەنتتەر, پروفەسسور-وقىتۋشىلار مەن عىلىمي قىزمەتكەرلەر الماسۋدى, بىرلەسىپ عىلىمي-زەرتتەۋ جوبالارىن ازىرلەپ, جۇزەگە اسىرۋدى, ءبىلىم بەرۋ مەن مادەني بايلانىستاردى ارتتىرۋعا باعىتتالعان كونفەرەنتسيالار, سەمينارلار مەن جيىنداردى ۇيلەستىرۋدى قاراستىرادى.
سونداي-اق, مەموراندۋمدا اكادەميالىق اقپاراتتارمەن, وقۋ-ادىستەمەلىك قۇرالدارمەن جانە ماتەريالدارمەن ءبولىسۋ, ءوزارا كەلىسىم-شارتتار نەگىزىندە باسقا دا اكادەميالىق ىنتىماقتاستىقتار ورناتۋ كوزدەلگەن.
كەزدەسۋدە قازاق مەملەكەتتىك قىزدار پەداگوگيكالىق ۋنيۆەرسيتەتىنىڭ رەكتورى گاۋحار الدامبەرگەنوۆا قوس جوعارى وقۋ ورنىنىڭ ورتاق ۇقساستىعى جايىندا ءسوز قوزعاپ, تاراپتار عىلىمي-مادەني قارىم-قاتىناستاردى نىعايتۋعا باعىتالعان ءوزارا ءتيىمدى ەكىجاقتى دامىتۋ ماسەلەلەرىن تالقىلادى.
– تاعىلىمدى تاربيە مەن ءورىستى ءبىلىمنىڭ ىرگەلى ورداسى اتانعان, كوپشىلىك قاۋىم «ىزەتتىلىك پەن ۇلگى-ونەگە وتاۋى» دەپ ات قويىپ, ايدار تاققان قازاق مەملەكەتتىك قىزدار پەداگوگيكالىق ۋنيۆەرسيتەتى پەداگوگيكالىق كادرلاردىڭ قالىڭ شوعىرىن دايىنداۋعا سۇبەلى ۇلەس قوسىپ كەلە جاتقان ۇلاعات ۇياسى. 70 جىلدان استام ۋاقىت بەلەسىندە عاسىرلارعا تاتيتىن اسا اۋقىمدى وزگەرىستەر بولدى. قوعامدىق قاتىناستار الماستى, قۇندىلىقتار جاڭاردى. مىنە, وسىنداي تاريح تەزىنەن وتكەن, ءبىلىم مەن عىلىمدى دامىتۋ جانە قىزدارعا پەداگوگيكالىق ءبىلىم بەرۋ, بەلسەندى ازاماتتىق ۇستانىمى بار ماماندار دايارلاۋ باستى ميسسياسى بولىپ تابىلاتىن وقۋ ورنىنىڭ 6 فاكۋلتەتىندە 43 باكالاۆر ماماندىق بويىنشا, ماگيستراتۋرادا 23 ماماندىق بويىنشا, 4 PhD ماماندىعى بويىنشا 9 مىڭعا جۋىق ستۋدەنت, ماگيسترلەر مەن دوكتورانتتار ءبىلىم الۋدا. ولارعا 55 عىلىم دوكتورى, 230-دان استام عىلىم كانديداتى مەن 90-عا جۋىق عىلىم ماگيسترى ءدارىس بەرەدى, – دەپ اتاپ ءوتتى گاۋحار تورەمۇراتقىزى.
قازىرگى تاڭدا قىزدار ۋنيۆەرسيتەتى الەم ەلدەرىنىڭ 19-دان استام جوعارى وقۋ ورىندارىمەن ىنتىماقتاستىق ورناتقان. ولاردىڭ قاتارىندا اقش, ءۇندىستان, فرانتسيا, قىتاي, گەرمانيا سىندى مەملەكەتتەردىڭ بەدەلدى ۋنيۆەرسيتەتتەرى بار.
ءوز كەزەگىندە وڭتۇستىك ورال مەملەكەتتىك گۋمانيتارلىق-پەداگوگيكالىق ۋنيۆەرسيتەتىنىڭ رەكتورى ۆلاديمير سادىرين ەكى ەلدىڭ جوعارى وقۋ ورىندارى اراسىنداعى بايلانىستىڭ ارتا تۇسەتىندىگىنە سەنىم ءبىلدىرىپ, ىنتىماقتاستىقتى دامىتۋعا نيەتتى ەكەندىگىن جەتكىزدى.
ايتا كەتەيىك, كەشە رەسەيدىڭ چەليابى قالاسىندا قازاقستان مەن رەسەي جوعارى وقۋ ورىندارى رەكتورلارىنىڭ فورۋمى ءوتتى. قازاقستان مەن رەسەي پرەزيدەنتتەرىنىڭ قاتىسۋىمەن وتەتىن XIV ايماقارالىق ىنتىماقتاستىق فورۋمى اياسىندا ۇيىمداستىرىلىپ وتىرعان القالى جيىنعا قازاقستان مەن رەسەيدىڭ ءبىلىم جانە عىلىم مينيسترلەرى, 49 قازاقستاندىق جانە 77 رەسەيلىك جوعارى وقۋ ورىندارىنىڭ باسشىلارى قاتىستى. كەڭەس جۇمىسى ء«بىلىم – ادامي كاپيتال ساپاسىنىڭ باسەكەگە قابىلەتتىلىگىن ارتتىراتىن نەگىزگى فاكتور», «زاماناۋي جوعارى وقۋ ورنىنىڭ يننوۆاتسيالىق قىزمەتىن دامىتۋ جانە ىنتالاندىرۋ», «قازاقستان مەن رەسەي جوعارى وقۋ ورىندارىنىڭ ستراتەگيالىق ارىپتەستىك قارىم-قاتىناسىن دامىتۋ: جوعارى ءبىلىم بەرۋدىڭ حالىقارالىق ولشەمى» اتتى باعىتتار بويىنشا جۇرگىزىلدى.
