وسىعان وراي, «ازاماتتىق باستامالاردى قولداۋ ورتالىعى» كوممەرتسيالىق ەمەس اكتسيونەرلىك قوعامى گرانت الۋشىلاردىڭ بەنەفيتسيارلار الدىنداعى اشىقتىعىن قامتاماسىز ەتۋ ءۇشىن تۇراقتى تۇردە جاڭا مەحانيزمدەر ەنگىزىپ كەلەدى. «ۇكىمەتتىك ەمەس ۇيىمدارعا گرانت بەرۋ جانە جۇزەگە اسىرىلۋىنىڭ مونيتورينگىن جاساۋ ەرەجەسىنە» وزگەرتۋلەر ەنگىزىلدى. بايقاۋ كوميسسياسىنىڭ ءتىزىمى جاسالۋدا, سونداي-اق, گرانت الۋشىلاردىڭ ونلاين-ەسەبى ورتالىقتىڭ سايتىندا جاريالاندى.
2017 جىلدىڭ 9-10 قاراشاسى كۇنى ساعات 10:00-دە «نۇر وتان» ورتالىق اپپاراتىنىڭ كونفەرەنتس-زالىندا گرانت الۋشىلار جوبانىڭ جۇزەگە اسۋى مەن ناتيجەسى تۋرالى ەسەپ بەرەدى.
جيىنعا ءدىن ىستەرى جانە ازاماتتىق قوعام مينيسترلىگى, ءبىلىم جانە عىلىم مينيسترلىگى, دەنساۋلىق ساقتاۋ مينيسترلىگى, ەڭبەك جانە الەۋمەتتىك قورعاۋ مينيسترلىگى, ەنەرگەتيكا مينيسترلىگى, سونداي-اق مادەنيەت جانە سپورت مينيسترلىگى وكىلدەرىمەن قاتار, ازاماتتىق سەكتور, قوعامدىق كەڭەس, ۇكىمەتتىك ەمەس ۇيىمدار مەن حالىقارالىق ۇيىمدار وكىلدەرى, 3 بايقاۋدىڭ ساراپتامالىق كوميسسياسىنىڭ مۇشەلەرى, گرانت يەگەرلەرى جانە باسقا دا مۇددەلى ۇيىمدار قاتىسادى.
ءدىن ىستەرى جانە ازاماتتىق قوعام مينيسترلىگى جانىنان قۇرىلعان «ازاماتتىق باستامالاردى قولداۋ ورتالىعى» كوممەرتسيالىق ەمەس اكتسيونەرلىك قوعامى 2017 جىلى گرانتتىق قارجىلاندىرۋ سالاسىندا 12 باعىت بويىنشا 618,5 ملن. تەڭگەگە 57 جوبانى جۇزەگە اسىرىپ جاتىر.
«ازاماتتىق باستامالاردى قولداۋ ورتالىعى» كەاق (بۇدان ءارى – ورتالىق) قازاقستانداعى ۇكىمەتتىك ەمەس ۇيىمدار مەن مەملەكەتتىڭ قارىم-قاتىناسىنىڭ مەحانيزمىن جەتىلدىرۋگە, گرانت بەرۋ سالاسىنىڭ اشىقتىعىن قامتاماسىز ەتۋ ماقساتىندا قۇرىلعان. ورتالىق ۇەۇ-عا مەملەكەتتىك جانە مەملەكەتتىك ەمەس گرانتتاردى بەرۋمەن جانە ولاردىڭ جۇزەگە اسۋىن باقىلاۋمەن اينالىسادى.
ورتالىق الەۋمەتتىك ماسەلەلەردى شەشۋدە مەملەكەت, بيزنەس, ۇەۇ جانە حالىقارالىق قاۋىمداستىقتىڭ يننوۆاتسيالىق تاسىلدەرىن ەنگىزە وتىرىپ, نىق دامىپ كەلە جاتقان ۇيىم.
قازاقستاندا مەملەكەتتىك قولداۋدىڭ ءبىر ءتۇرى – گرانتتىق مەحانيزمگە دەگەن قىزىعۋشىلىقتىڭ جىل ساناپ ارتىپ كەلە جاتقانىن مىنا كورسەتكىشتەن-اق بايقاۋعا بولادى. 2016 جىلى جۇمىسىن باستاعان ورتالىققا العاشقى جىلى 88 ءوتىنىش تۇسسە, 2017 جىلى بۇل كورسەتكىش 512-گە جەتتى, ونىڭ ىشىندە 237 ءوتىنىش ەلىمىزدىڭ ايماقتارىنان تۇسكەن.
بيىل ورتالىق مەملەكەتتىك گرانتتاردى بەرۋ ءۇشىن 3 بايقاۋ وتكىزدى. ناتيجەسىندە ەلىمىزدىڭ 49 ۇەۇ 618, 595 ملن. تەڭگەگە 57 گرانتتىق جوبانى جۇزەگە اسىرىپ جاتىر. الەۋمەتتىك سالانىڭ 11 باعىتى قامتىلدى. جالعىز دونور – ءدىن ىستەرى جانە ازاماتتىق قوعام مينيسترلىگى.
ارالىق ەسەپ بويىنشا, گرانتتىق جوبالار اياسىندا 19 كەشەندى زەرتتەۋ, 8 الەۋمەتتىك قىزمەت, 5 ۆەب-رەسۋرس اشىلىپ, 4 سەنىم تەلەفونى حالىققا قىزمەت كورسەتۋدە. 9000-داي ادام قاتىسقان 378-گە جۋىق ءىس-شارا ۇيىمداستىرىلىپ, 39 ۇلتتىق جانە 7 حالىقارالىق ساراپشى تارتىلدى.
بۇگىندە ورتالىق گرانتتارعا باقىلاۋ جۇرگىزۋدىڭ ءتۇرلى مەحانيزمدەرىن قولدانادى: ۇسىنىلعان ەسەپتەردى تەكسەرۋ جانە ساراپتاما جاساۋ, گرانتتاردىڭ ناتيجەسى مەن جۇزەگە اسىرىلۋى تۋرالى ورتالىقتىڭ سايتىندا (cisc.kz) تۇراقتى تۇردە اقپارات جاريالاپ وتىرۋ, مونيتورينگتىك ساپار, بەنەفيتسيارلارمەن سۇحبات جۇرگىزۋ, باق-قا ساراپتاما جاساۋ جانە ت.ب.
