بوكەي ورداسى اۋدانىنىڭ ورتالىعى – سايقىن اۋىلىنىڭ سۋ قۇبىرى نىسانى 2016 جىلعى 24 قاراشادا باستالعان بولاتىن. قۇرىلىستىڭ جالپى قۇنى 372 ملن 381 مىڭ 240 تەڭگە تۇرادى. 2016 جىلى نىسان قۇرىلىسىنا – 37, بيىل 147 ملن تەڭگە ءبولىندى. قازىرگى كەزدە قۇرىلىس-مونتاج جۇمىستارى جۇرگىزىلۋدە. نىسان تولىق اياقتالىپ, پايدالانۋعا بەرىلۋى ءۇشىن ءالى 88,5 ملن تەڭگەدەي قاراجات كەرەك. تارتىلاتىن سۋ قۇبىرىنىڭ ۇزىندىعى 47 كم 840 مەتردى قۇرايدى. قازىرگى كەزدە 40 كم سۋ قۇبىرى ءۇي اۋلاسىنا دەيىن جەتكىزىلدى. بۇگىنگە دەيىن سايقىن اۋىلىنداعى 937 اۋلانىڭ 530-ىنا سۋ قۇبىرى تارتىلعان.
اۋدانعا قاراستى ءبورلى اۋىلىندا سۋ قۇبىرى قۇرىلىسى نىسانى 2017 جىلدىڭ 24 ناۋرىزىندا باستالعان ەدى. قۇرىلىسشىلار جەدەل قيمىلداپ, 6,2 ايدىڭ ىشىندە قۇرىلىس-مونتاج جۇمىستارىن ءتامامداپ, قازان ايىندا سۋ قۇبىرىن ىسكە قوسىپ ۇلگەردى. بۇل نىساننىڭ جالپى قۇنى 215 ملن تەڭگەگە تاياۋ قارجىنى قۇرادى. ونىڭ 172 ملن تەڭگەدەيى رەسپۋبليكالىق, 42 ملن 702 مىڭ تەڭگەسى وبلىستىق بيۋدجەت ەسەبىنەن ءبولىندى. جوبا بويىنشا 22,8 كم سۋ قۇبىرى تولىعىمەن تارتىلىپ, تۇرعىن ۇيلەرگە جەتكىزىلگەن. شىنى كەرەك, وبلىس ورتالىعىنان دا, ءبىر بىرىنەن دە شالعاي جاتقان بۇل ەلدى مەكەندەرگە سۋ, گاز سەكىلدى يگىلىكتەردى جەتكىزۋ وڭاي ەمەس. ماسەلەن, سايقىن اۋىلى ورال قالاسىنان 600 كم بولسا, ءبورلى مەن سايقىننىڭ اراسى 130 شاقىرىم ەكەن.
بيىل تازا سۋعا قول جەتكىزىپ وتىرعان اۋىلدىڭ ءبىرى – كوكتەرەك. بۇل نىسان قۇرىلىسى دا بيىل كوكتەمدە, 24 ناۋرىزدا باستالعان بولاتىن. بۇگىندە قۇرىلىس-مونتاجداۋ جۇمىستارى جۇرگىزىلۋدە. قۇرىلىس مەرزىمىن 7,4 ايدا اياقتاۋ جوسپارلانعان. وسى ماقساتقا بولىنگەن 185 ملن 274 مىڭ تەڭگەنىڭ باسىم بولىگى, ياعني 148 ملن 345 مىڭ تەڭگەسى – رەسپۋبليكالىق, 37 ملن 929 مىڭى وبلىستىق بيۋدجەت قاراجاتى ەسەبىنەن ءبولىندى. نىسان قاراشا ايىندا پايدالانۋعا بەرىلەدى دەپ جوسپارلانعان. قازىردىڭ وزىندە 20,464 كم سۋ قۇبىرى تولىق تارتىلىپ تۇر. قۇرىلىس بىتكەن سوڭ كوكتەرەك جانە جامبىل ەلدى مەكەندەرىنە سۋ قۇبىرى قوسىلادى.
– اۋدانىمىزدىڭ 7 ەلدى مەكەنىنە – شوڭاي, جارمەڭكە, تايعارا, اجەن, قاراسۋ, ۇشتەرەك جانە كەڭوي اۋىلدارىنا سۋ قۇبىرىنىڭ قۇرىلىس نىساندارى بويىنشا ينجەنەرلىك-گەودەزيالىق, ينجەنەرلىك-گەولوگيالىق ىزدەۋ جۇمىستارى جۇرگىزىلۋدە. جوبالاۋ-سمەتالىق قۇجاتتاردى دايىنداۋ جۇمىسىنىڭ جالپى قۇنى 44 ملن تەڭگەگە جۋىق. بۇيىرسا, اتالعان جەتى اۋىل دا كوپ كەشىكپەي ورتالىقتاندىرىلعان تازا سۋمەن قامتىلاتىن بولادى, – دەيدى بوكەي ورداسى اكىمى نۇرلان راحىمجانوۆ.
باتىس قازاقستان وبلىسىنىڭ اكىمى التاي كولگىنوۆتىڭ ايتۋىنشا, 2018 جىلى وبلىستا تاعى 50 اۋىلعا سۋ تارتۋ جۇمىستارى جۇرگىزىلمەك. ءوڭىر تۇرعىندارى وسى كەزگە دەيىن ەلىمىز بويىنشا تازا اۋىز سۋمەن ناشار قامتىلعان ايماق سانالاتىن. بيىلعى كەشەندى جۇمىستار ناتيجەسىندە ءبىر جىل ىشىندە 55 اۋىلعا تازا سۋ قۇبىرى تارتىلىپ, وبلىس تۇرعىندارىنىڭ تازا سۋمەن قامتىلۋ كوەففيتسيەنتى 36%-دان 44%-عا جەتىپ وتىر.
قازبەك قۇتتىمۇرات ۇلى,
«ەگەمەن قازاقستان»
باتىس قازاقستان وبلىسى
سۋرەتتى تۇسىرگەن
ايباتىر نۇراش
