– 1963 جىل ەدى, – دەپ ەسكە الادى امانگەلدى اعامىز. – مەن وندا الماتى قالاسىنداعى اتاقتى №12 مەكتەپتە ون ءبىرىنشى سىنىپتا وقيتىنمىن. ۇمىتپاسام, داڭقتى پارتيزاننىڭ كەزەكتى كىتابى جارىق كوردى. سوعان بايلانىستى مەكتەبىمىزدە ول كىسىمەن كەرەمەت كەزدەسۋ بولىپ, قاسىم اعا ۋكراينا جەرىندەگى جورىق جولدارى جايلى, قازاق جاۋىنگەرلەرىنىڭ ەرلىگى تۋرالى اسەرلى اڭگىمە ايتتى. مۇنان كەيىن كەڭەستىك كەزدەگى ءداستۇر بويىنشا پيونەر قاتارىنا قابىلداندى. بۇل سۋرەت سول ساتتە تۇسىرىلگەن. سول جاقتا وتىرعان كىسىنى ۇمىتىپپىن, ايتەۋىر, نە «جۇلدىز» جۋرنالىنان, نە «قازاق ادەبيەتى» گازەتىنەن, قاسىم اعامەن بىرگە كەلگەن. ال وڭ جاقتاعى ءبىزدىڭ سىنىپ جەتەكشىمىز ساۋلە قابدولوۆا. مەكتەپتىڭ بەلسەندىسى رەتىندە قۇتتىقتاپ, تۇرەگەپ تۇرعان مەن. بۇگىندە بۇل سۋرەت ۇيىمدە وتە قىمبات قازىنامداي ساقتاۋلى.
75 جاستاعى امانگەلدى اعا تولىنبەكوۆ كەزىندە قىرعىزستانداعى وش پەداگوگيكالىق ينستيتۋتىنىڭ فيلولوگيا فاكۋلتەتىن بىتىرگەن. قازىر جامبىل اۋىلدىق وكرۋگى ارداگەرلەر كەڭەسىنىڭ توراعاسى. قاشان كورسەڭ دە انا جۇمىس, مىنا جۇمىس دەپ تىنىم تاپپاي جۇگىرىپ جۇرگەنى. قيمىلى شيراق, ءجۇرىسى تەز. ويتكەنى سوناۋ كسرو-نىڭ كەزىندە-اق, ەركىن كۇرەستەن سپورت شەبەرى اتانعان...
بەرىكباي قادىقوۆ,
جۋرناليست
الماتى وبلىسى,
قاراساي اۋدانى
