سونداي-اق ولار وڭىرلىك جانە جاھاندىق قاۋىپسىزدىك ماسەلەلەرى بويىنشا پىكىر الماستى. تاراپتار قازاقستان مەن اقش اراسىنداعى كەڭەيتىلگەن ستراتەگيالىق سەرىكتەستىكتى ودان ءارى دامىتۋعا بەيىلدىلىگىن راستادى. بەيبىتشىلىك كەڭەسىن قۇرۋ جونىندەگى امەريكاندىق باستاماعا جانە وسى فورماتقا قازاقستاننىڭ قۇرىلتايشى ەل رەتىندە قاتىسۋىنا ەرەكشە نازار اۋدارىلدى. بۇعان قوسا وسى جىلى جەلتوقساندا مايامي قالاسىندا وتەتىن G20 سامميتىنە قازاقستاننىڭ قاتىسۋىنا دايىندىق ماسەلەلەرى ءسوز بولدى.
مينيستر ەلدىڭ ەنەرگيا رەسۋرستارى مەن اسا ماڭىزدى مينەرالداردىڭ جاھاندىق جەتكىزۋ تىزبەكتەرىنىڭ تۇراقتىلىعىن قامتاماسىز ەتۋدەگى ستراتەگيالىق ءرولىن اتاپ ءوتىپ, بۇل سالاداعى ىنتىماقتاستىقتى اقش-پەن ءوزارا ءىس-قيمىلدىڭ نەگىزگى باعىتتارىنىڭ ءبىرى رەتىندە كورسەتتى.
ءوز كەزەگىندە, اقش ديپلوماتى قازاقستاندى ورتالىق ازياداعى جانە حالىقارالىق ارەناداعى سەنىمدى سەرىكتەس رەتىندە اتاپ ءوتىپ, الداعى بايلانىستار ەكىجاقتى قاتىناستار مەن پراكتيكالىق ىنتىماقتاستىقتى دامىتۋعا قوسىمشا سەرپىن بەرەتىنىنە سەنىم ءبىلدىردى.
كەلىسسوزدەر بارىسىندا پرەزيدەنت قاسىم-جومارت توقاەۆتىڭ ۆاشينگتونعا ساپارى مەن «س5+1» ءسامميتىنىڭ قورىتىندىسى بويىنشا شامامەن 17 ملرد اقش دوللارىن قۇرايتىن بۇرىن قول جەتكىزىلگەن كەلىسىمدەر مەن ينۆەستيتسيالىق جوبالاردى ىسكە اسىرۋ ماسەلەلەرىنە ەرەكشە كوڭىل ءبولىندى.
كەزدەسۋ قورىتىندىسىندا تاراپتار قولدانىستاعى ىنتىماقتاستىق فورماتتارى اياسىندا, سونداي-اق جاڭا تەتىكتەر مەن باستامالاردى ىسكە قوسۋ ارقىلى ەكىجاقتى ءوزارا ءىس-قيمىلدى نىعايتۋعا ۋاعدالاستى.
بۇعان قوسا سىرتقى ىستەر ءمينيسترى اقش مەملەكەتتىك حاتشىسى ماركو رۋبيونىڭ شاقىرۋىمەن العاشقى ماڭىزدى مينەرالدار جونىندەگى كونفەرەنتسياعا قاتىستى.
50-دەن استام ەلدىڭ وكىلدەرى مەن قازاقستاندىق تاۋ-كەن كومپانيالارىنىڭ باسشىلارى قاتىسقان ءىس-شارادا اقش ۆيتسە-پرەزيدەنتى دجەي دي ۆەنس ءسوز سويلەدى.
ءىس-شارا بارىسىندا ماڭىزدى پايدالى قازبالاردىڭ جاھاندىق جەتكىزۋ تىزبەكتەرىن ءارتاراپتاندىرۋ جانە نىعايتۋ, سونداي-اق ولاردى ءوندىرۋ, وڭدەۋ جانە لوگيستيكا سالالارىنداعى حالىقارالىق ىنتىماقتاستىقتى دامىتۋ ماسەلەلەرى بويىنشا پىكىر الماسۋ ءوتتى.
وتىرىستىڭ شەڭبەرىندە ە.كوشەرباەۆ قاتىسۋشىلاردى ماڭىزدى مينەرالدار سالاسىنداعى قازاقستاننىڭ الەۋەتى جانە ەلدىڭ سەنىمدى ءارى تۇراقتى جاھاندىق جەتكىزۋ تىزبەكتەرىن قالىپتاستىرۋعا پراكتيكالىق ۇلەس قوسۋعا دايىندىعى تۋرالى ايتتى. ول قازاقستاننىڭ مينەرالدىق-شيكىزاتتىق رەسۋرستارىنىڭ اۋقىمدى قورىنا, ولاردى وڭدەۋ بويىنشا دامىعان ونەركاسىپتىك بازاسىنا, زاماناۋي ينفراقۇرىلىمىنا, تۇراقتى ساياسي جۇيەسىنە جانە بولجامدى رەتتەۋشى ورتاعا يە ەكەنىن تىلگە تيەك ەتتى.
قازاقستان گەولوگيالىق قىزمەتىنىڭ (USGS) تىزبەسىنە ەنگىزىلگەن 60 ماڭىزدى مينەرالدىڭ 20-سى بويىنشا دايىن ءونىم تۇرىندە جەتكىزىلىمدەردى قامتاماسىز ەتۋگە قابىلەتتى ەكەنى اتالىپ ءوتتى. بۇل ونىمدەر الەمدىك ەكونوميكانىڭ ستراتەگيالىق سالالارىندا جوعارى سۇرانىسقا يە.
قازاقستان مەن اقش اراسىندا ماڭىزدى مينەرالدار سالاسىنداعى ىنتىماقتاستىق تۋرالى مەموراندۋمدى ىسكە اسىرۋعا ەرەكشە نازار اۋدارىلدى. اتالعان قۇجات مەملەكەت باسشىسىنىڭ 2025 جىلعى قاراشادا ۆاشينگتونعا جاساعان ساپارىنىڭ قورىتىندىسى بويىنشا قول قويىلعان جانە ورتالىق ازياداعى وسىنداي فورماتتاعى العاشقى كەلىسىم سانالادى. مەموراندۋم قازاقستان اۋماعىندا وڭدەۋ قۋاتتارىن دامىتۋ, تەحنولوگيالار ترانسفەرتى جانە قازاقستاندىق ءونىمنىڭ اقش نارىعىنا قولجەتىمدىلىگىن كەڭەيتۋدى كوزدەيدى.
كونفەرەنتسياعا G7 ەلدەرى مەن Pax Silica باستاماسىنا قاتىسۋشى مەملەكەتتەردىڭ سىرتقى ساياسي ۆەدومستۆولارى مەن سالالىق قۇرىلىمدارىنىڭ 30-دان استام باسشىسى, سونداي-اق جەتەكشى حالىقارالىق كومپانيالاردىڭ وكىلدەرى قاتىستى.
