وسى كۇنگە دەيىن اۋەزوۆ تەاترىنىڭ مۇراعاتىندا 200 مىڭعا جۋىق قۇندى جادىگەر جيناقتالسا, ونىڭ ەڭ باستى ەرەكشەلىگى – الماتى مۋزەيىمەن ءبىرىنشى رەت وتكىزىلىپ وتىرعان كورمەگە ەكسپوناتتاردىڭ 100 تۇپنۇسقاسى قويىلعان. ءبىر جاعىنان, قالا مۋزەيى دە ءوز تاراپىنان كورمەگە مادەنيەت ءبولىمىنىڭ قورىندا ساقتالعان 50 دۇنيەنى قوسىپ وتىر.
ايتقانداي, بۇل كورمەنىڭ ءبىر بولىگى «عاسىر جاساعان ۇلت تەاترى» گاسترولدىك ساپارلارىمەن بىرگە قوستاناي, قاراعاندى, تۇركىستان, تاراز, شىمكەنت شاھارلارىنا دا بارىپ قايتقان ەكەن. جىلجىمالى كورمەنىڭ كەشەندى بولىگى رەسپۋبليكا سارايىنداعى تەاتردىڭ 100 جىلدىعىنا وراي ۇيىمداستىرىلعان اۋقىمدى مادەني شارادا سالتانات قۇردى.
ءجۇز جىلدىق تاريحتى الماتى مۋزەيىندەگى اياداي كورمەگە سىيدىرۋ قيىن دەسەك تە, تەاتردىڭ نەگىزگى شەجىرەسى جي كومەگىمەن جاسالعان بەينەباياندار ارقىلى مۋزەيدىڭ ءتورت ۇلكەن ەكرانىندا شىر كوبەلەك اينالادى.
ەڭ قۇندى جادىگەرلەرگە كەلەتىن بولساق, سوناۋ 30-جىلداردان بەرى ساقتالعان ىشىك پەن توقىلعان شاپان جانىندا ءبىر ساتكە بولسا دا ايالداتىپ, ويعا شومدىرماي قويمايدى. بۇل شاپانداردا جۇمات شانين, قاليبەك قۋانىشباەۆ, امىرە قاشاۋباەۆ, يسا بايزاقوۆ سىندى ساحنا ساڭلاقتارىنىڭ تەرى مەن ءيىسى سىڭگەنىنە كۇمانىڭىز بولماسىن.
ونىڭ بەر جاعىندا ۇلتتىق مادەنيەتكە جانكەشتىلىكپەن قىزمەت ەتكەن ءانۋار مولدابەكوۆ, ىدىرىس نوعايباەۆ, ءازىربايجان مامبەتوۆ, حابيبا ەلەبەكوۆا, حاديشا بوكەەۆا, ءسابيرا مايقانوۆا, فاريدا ءشارىپوۆا, تورعىن تاسىبەكوۆا, ءاسانالى ءاشىموۆ سياقتى كورنەكتى ونەر مايتالماندارىنىڭ جارقىراعان بەينەلەرىن, قويىلىمدارداعى كوستيۋمدەرىن تاماشالاۋعا بولادى.
مىسالى, ءانۋار مولدابەكوۆتىڭ «ۆانيا اعاي» سپەكتاكلىندەگى, شولپان جانداربەكوۆانىڭ «اقان سەرى – اقتوقتى», زامزاگۇل ءشارىپوۆانىڭ «وتەللو» سپەكتاكلىندە دەزدەمونا رولىندە كيگەن, تۇڭعىشباي جامانقۇلوۆتىڭ ابىلاي حان بەينەسىندەگى ساحنالىق كيىمدەرى كوزىمىزگە وتتاي باسىلادى.
ءبىر سوزبەن ايتقاندا, كورمەدە الماتى مۋزەيى مەن م. اۋەزوۆ اتىنداعى قازاق ۇلتتىق دراما تەاترى مۋزەيىنىڭ قورىنان الىنعان تەاتر تاريحىنا قاتىستى بىرەگەي ارحيۆتىك قۇجاتتار مەن فوتوسۋرەتتەر, 40-جىلداردان بۇگىنگە دەيىنگى سپەكتاكل افيشالارى, سارعايعان باعدارلامالار, ءتىپتى رەپەرتۋاردان ءتۇسىپ قالعان قويىلىمداردىڭ كورىنىستەرىن تاماشالاۋعا بولادى.
الماتى
