- ءبىز بۇگىن جوسپارىمىزدى تولىقتاي ورىنداپ, چەمپيوندىقتى شەشىپ قويۋدى ويلاپ ەدىك. بىراق قولىمىزدان كەلمەدى, جوسپارىمىزدى ورىنداي المادىق. ويىنشىلارىم ۇلكەن قىسىمنىڭ استىندا وينادى. ولارعا سەنىمدىلىك جەتىسپەگەنى كورىنىپ تۇردى.. ال ستاندارتتى جاعدايدان گول جىبەرۋىمىز... وكىنىشتى-اق. ءبىرىنشى گول سوعىلعاننان كەيىن ءوز ويىنىمىزدى جوعالتىپ الدىق.
- الدا «ماككابيگە» قارسى ماڭىزدى ويىن كۇتىپ تۇر. لوگۆينەنكونىڭ جاعدايى تۋرالى پىكىر بىلدىرسەڭىز.
- ول مۇرنىن سىندىرىپ العان سياقتى. الداعى ەكى ويىنعا قاتىسا المايتىنى انىق.
- بيىل «قايراتقا» قارسى ءتورت ويىننىڭ ۇشەۋىندە جەڭىلىپ قالدىڭىزدار. الماتىنىڭ كومانداسىن جەڭۋگە نە جەتپەيدى؟
- بۇرىن «قايراتتى» جەڭۋ كەرەك بولسا, جەڭەتىن ەدىك. بۇگىن قولىمىزدان كەلمەدى. بۇل جولى بىزگە سەنىمدىلىك جەتىسپەگەنى انىق. ءوز كەزەگىندە «قايرات» تا گول سوققانعا دەيىن ايتارلىقتاي قاۋىپ تۋدىرمادى. بۇگىنگى جەڭىلىسىمىزدى ءوز موينىما الامىن. دۇرىس شەشىم قابىلداماعان سەكىلدىمىن. 0:0 كەزىندە ويىن تەڭ دارەجەدە ءجۇرىپ جاتقان. ەشكىمنىڭ باسىمدىعى بىلىنبەگەن ەدى.
- «قايرات» ويىن سوڭىنا تامان قارقىنىن كۇشەيتتى...
- تاعى دا قايتالاپ ايتايىن, ءبىرىنشى گولدان كەيىن ءبىز ءوز-ءوزىمىزدى جوعالتىپ الدىق. وسىنىڭ سالدارىنان ۇيىمشىلدىعىمىز دا جوعالدى. ال ارى قاراي... مىنە, وسىدان كەيىن «قايراتتىڭ» دا ويىنى كۇشەيىپ كەتتى.
- شىمكەنتكە ەكىنشى قۇرامدى اپارىپ, اسىعىس شەشىم قابىلدادىم دەپ ويلامايسىز با؟
- ءبىز ءبىرىنشى قۇراممەن دە جەڭىلىپ قالۋىمىز مۇمكىن ەدىك. جوسپارىمىز باسقا ەدى. ەندى سوڭعى تۋرداعى «اقجايىقتى» ويلاۋىمىز كەرەك. ەگەر سوڭعى تۋرادا جەڭىسكە جەتسەك وسىعان دەيىنگى قۇرعان جوسپارىمىزدىڭ دۇرىس بولعانى. ال ەگەر كەرى جاعداي بولىپ جاتسا جىل بويعى العا قويعان ستراتەگيامىزدىڭ دۇرىس بولماعانى. «اقجايىقتى» جەڭۋ ءۇشىن قولىمىزدان كەلگەننىڭ ءبارىن جاسايمىز.
- «ماككابيگە» قارسى نەگىزگى قۇرامدى اپارسىز با, الدە «اتلەتيكومەن» وتكەن ويىن سەكىلدى باستى ويىنشىلارىڭىزعا دەمالىس بەرىپ, «اقجايىقتى» ويلايسىز با؟
- «قايراتپەن» ويىن جاڭا عانا اياقتالدى. قازىر ول تۋرالى ءالى ويلانبادىم. جىلدام شەشىم قابىلداۋ قيىن. ەكى ويىندى دا جوعارى دەڭگەيدە اياقتاۋعا تىرىسامىز. سونداي-اق كوپ نارسە ويىنشىلاردىڭ جاعدايىنا دا بايلانىستى بولماق.
ايان ءابدۋالي,
«ەگەمەن قازاقستان»
