ورتالىق عىلىمي كىتاپحانادا ۇيىمداستىرىلعان كەلەلى جيىنعا بەلگىلى قوعام قايراتكەرلەرى, تۇركىتانۋشى-عالىمدار جانە زيالى قاۋىم وكىلدەرى قاتىستى.
دوڭگەلەك ۇستەلدى جۇرگىزىپ وتىرعان اكادەميا باسشىسى دارحان قىدىرالى شارانىڭ ماقساتىنا توقتالدى. ەلباسى نۇرسۇلتان نازارباەۆتىڭ «رۋحاني جاڭعىرۋ» باعدارلاماسىندا كوتەرىلگەن اۋقىمدى ماسەلەلەر تۋرالى ايتا كەلە, سول مىندەتتەردى جۇزەگە اسىرۋ ماقساتىندا ءارى باۋىرلاس ەلدەر اراسىنداعى عىلىمي ىنتىماقتاستىقتى ارتتىرۋ ءۇشىن اكادەميا تاراپىنان اتقارىلعان ءىس-شارالار رەتىمەن دە تانىستىرىپ ءوتتى. سونىمەن بىرگە, كوپشىلىككە ۇيىمنىڭ قىزمەتى مەن عىلىمي جوبالارى جونىندە باياندادى.
بۇدان وزگە, كەزدەسۋدە ءسوز العان قازاقستان رەسپۋبليكاسىنىڭ ۇلتتىق عىلىم اكادەمياسىنىڭ پرەزيدەنتى مۇرات جۇرىنوۆ, تۇركى كەڭەسى اقساقالدار كەڭەسىنىڭ مۇشەسى ءادىل احمەتوۆ, قىرعىزستانداعى ماناس قىرعىز-تۇرىك ۋنيۆەرسيتەتىنىڭ پروفەسسورى قادىرالى قوڭقاباەۆ جانە ا.بايتۇرسىن ۇلى اتىنداعى ءتىل ءبىلىمى ينستيتۋتىنىڭ ديرەكتورى ەردەن قاجىبەك قۇندى ويلارىمەن, پايىمدى پىكىرلەرىمەن ءبولىستى.
شارا بارىسىندا تانىمال اكادەميكتەر, عىلىم مايتالماندارى ش. سارىباي, ءا. قايدار جانە ر. سىزدىقتى اكادەميا تاراپىنان ارنايى ماراپاتتاۋ ءراسىمى دە ءوتتى. سونداي-اق, 2014 جىلى تۇركى اكادەمياسىنىڭ كىتاپحاناسىنا ايگىلى ماجار تۇركىتانۋشىسى يشتۆان قوڭىر ماندوكيدىڭ 16 مىڭنان استام جەكە كىتاپ قورى مەن قۇندى قولجازبالارىن تاپسىرعان عالىمنىڭ جارى وڭايشا ماقسۇمقىزىنا سىي-سياپات كورسەتىلدى.
ايتا كەتۋ كەرەك, القالى شارا شەڭبەرىندە كوپشىلىككە اكادەميانىڭ عىلىمي جوبالارى نەگىزىندە جارىق كورگەن جاڭا ەڭبەكتەر تانىستىرىلىپ, كىتاپ كورمەسى ۇيىمداستىرىلدى.
