سالتاناتتى جيىنعا قر مەملەكەتتىك حاتشىسى گۇلشارا ابدىقالىقوۆا جانە ەڭبەك جانە حالىقتى الەۋمەتتىك قورعاۋ ءمينيسترى تامارا دۇيسەنوۆا قاتىستى. اتالعان شارا اياسىندا ەڭبەك كۇنىنە ارنالعان فوتوكورمە, «ەڭبەك جولى» مەن «الەۋمەتتىك قورعاۋ جۇيەسىنىڭ ۇزدىك قىزمەتكەرى» بايقاۋلارىنىڭ جەڭىمپازدارىن ماراپاتتاۋ ءراسىمى ءوتىپ, ەڭبەك ارداگەرلەرىنە قۇرمەت كورسەتىلدى.
ەسكە سالا كەتۋ كەرەك, قازاقستان رەسپۋبليكاسى پرەزيدەنتىنىڭ «قازاقستاندى الەۋمەتتىك جاڭعىرتۋ: جالپىعا ورتاق ەڭبەك قوعامىنا قاراي جيىرما قادام» اتتى ماقالاسىندا بەرىلگەن تاپسىرمالاردى ىسكە اسىرۋ اياسىندا مەملەكەت باسشىسىنىڭ جارلىعىمەن ەڭبەك كۇنى مەرەكەسى بەكىتىلدى. اتالعان مەرەكە ءوزىنىڭ ادال ەڭبەگىمەن ەگەمەن قازاقستان ەكونوميكاسىنىڭ دامۋى مەن قالىپتاسۋىنا ۇلەس قوسقان ەڭبەككەرلەرگە العىس بىلدىرۋگە ارنالعان.
فورۋم بارىسىندا قازاقستان ەكونوميكاسىنىڭ وركەندەۋىنە زور ۇلەس قوسقان 8 ارداگەر «ەڭبەك ارداگەرى» مەدالىمەن ماراپاتتالدى. قر مەملەكەتتىك حاتشىسى گۇلشارا ابدىقالىقوۆا العاش بولىپ كسرو حالىق ءارتىسى, كسرو جانە قازاقستاننىڭ مەملەكەتتىك سىيلىعىنىڭ لاۋرەاتى بيبىگۇل تولەگەنوۆاعا «ەڭبەك ارداگەرى» مەدالىن تابىستادى.
– ءبىز 2014 جىلدان باستاپ ەڭبەك كۇنىن اتاپ وتەمىز. بۇل مەرەكە – وتانىمىزدىڭ ءوسىپ-وركەندەۋىن قامتاماسىز ەتەتىن حالىقتىڭ ەڭبەگىنە دەگەن قۇرمەتتىڭ بەلگىسى. سونداي-اق بۇل كۇن الەۋمەتتىك جانە ەكونوميكالىق جەتىستىكتەرىمىزدى دارىپتەۋگە ارنالعان. ەلىمىزدىڭ ءاربىر ازاماتى ادال, رياسىز, ءونىمدى ەڭبەكتىڭ ماڭىزدىلىعىن ساناسىنا ءسىڭىرۋى كەرەك. سوندا عانا قازاقستان الەمدەگى وزىق ەلدەردىڭ قاتارىنا قوسىلادى. كەلەشەكتە ۇلتتىڭ تابىستىلىعى ادامي كاپيتالدىڭ ساپاسىمەن ولشەنەدى, – دەدى مەملەكەتتىك حاتشى.
كەلەسى ماراپاتتالعان مەديتسينالىق عىلىمدارىنىڭ پروفەسسورى ماقاش الياقپاروۆ دەنساۋلىق ساقتاۋ سالاسىندا 49 جىل ەڭبەك ەتىپ, كوپتەگەن عىلىمي ەڭبەكتەر جازعان. بۇل ماراپاتقا, سونداي-اق, قانشاي جولدىباەۆا, سەرىكبول وڭالوۆ, ءانۋار تۇكەنوۆ, جاكەن تايماعامبەتوۆ, نيكولاي ۋدالوۆ, سەرگەي چەكالين ءتارىزدى اعا بۋىن وكىلدەرى يە بولدى. وسىدان سوڭ, ەڭبەك جانە حالىقتى الەۋمەتتىك قورعاۋ ءمينيسترى تامارا دۇيسەنوۆا ءسوز الدى.
– بۇگىن ەلىمىزدىڭ ەكونوميكاسىنىڭ ءتۇرلى سالالارىندا قىزمەت ەتىپ كەلە جاتقان 8,5 ملن استام ازاماتتاردىڭ ايتۋلى مەرەكەسى. ەلباسى ءوزىنىڭ «جالپىعا ورتاق: ەڭبەك قوعامىنا جيىرما قادام» اتتى ماقالاسىندا الەمدىك وركەنيەتتىڭ بارلىق قۇندىلىعى, بارلىق ەكونوميكالىق جانە مادەني بايلىعى ۆيرتۋالدى قارجى ينستيتۋتتارىنىڭ ەمەس, ادامنىڭ ەڭبەگىمەن جاسالادى دەگەن بولاتىن. راسىندا دا, ەگەمەندىگىمىزدى العاننان كەيىنگى شيرەك عاسىرعا كوز جۇگىرتەتىن بولساق, ەلىمىزدە 7,5 مىڭ شاقىرىم جول سالىنىپ, 113 ملن شارشى مەتردەن استام تۇرعىن ءۇي قولدانىسقا بەرىلسە, 3000-عا جۋىق مەكتەپ پەن دەنساۋلىق ساقتاۋ نىساندارى سالىندى. ال وندىرىلگەن جالپى ىشكى ءونىمنىڭ كولەمى 1993 جىلعى 29,4 ملرد تەڭگەدەن بىلتىر 47 ترلن تەڭگەگە دەيىن جەتتى. وسى ناتيجەلەردىڭ ارقاسىندا بۇگىندە قازاق ەلىن الەمدىك قوعامداستىق نارىقتىق ەكونوميكاداعى مەملەكەت رەتىندە تانىپ وتىر. بۇل مەرەكە ەڭبەكشى ازاماتتاردىڭ عانا ەمەس, بۇگىندە بەينەتىنىڭ زەينەتىن كورىپ وتىرعان 2,5 ميلليوننان استام ەڭبەك ارداگەرلەرىنىڭ دە ءتول مەرەكەسى, – دەدى مينيستر.
«جالپىعا ورتاق ەڭبەك قوعامى» يدەياسىن ىلگەرىلەتۋ ءۇشىن, 2016 جىلى مينيسترلىك ەڭبەك اۋلەتتەرى مەن ءوندىرىس ەڭبەككەرلەرىنىڭ اراسىندا وتكىزىلەتىن «ەڭبەك جولى» رەسپۋبليكالىق بايقاۋىن جاريالاعانى بەلگىلى. سالتاناتتى جيىندا بايقاۋ اياسىنداعى «ۇزدىك ەڭبەك اۋلەتى» بولىپ اقتوبە وبلىسىنداعى تەمىرجول سالاسىندا 423 جىل شەجىرەسى قالىپتاسقان جۇبانىشەۆتار اۋلەتى اتانسا, «جاس ۇرپاقتى ەڭبەككە ەرەكشە باۋلىعانى ءۇشىن» ارنايى اتاعىن قازاقستاننىڭ ەڭبەك ەرى يۆان ساۋەر باتىس قازاقستان ءوڭىرىنىڭ ەلەكتر مامانى تىلەك حارينگە تابىستادى. ء«وندىرىستىڭ ۇزدىك جاس جۇمىسكەرى» اتاعى مەكتەپ مۇعالىمى نۇرسۇلتان ابباسينگە بەرىلدى. «جۇمىسشى جاستاردىڭ ۇزدىك تالىمگەرى» اتاعىن وڭتۇستىك قازاقستان وبلىسىنداعى «قايرات» بالاباقشاسىنىڭ مەڭگەرۋشىسى نۇرجامال تولەۋوۆا ەنشىلەدى. سونىمەن قاتار, مەرەكەلىك شارادا, ەڭبەك كۇنى قارساڭىندا الەۋمەتتىك ساقتاندىرۋ جۇيەسىنىڭ ۇزدىك قىزمەتكەرلەرى دە نازاردان تىس قالمادى. ولار «زەينەتاقى جۇيەسىنىڭ ۇزدىك قىزمەتكەرى», «الەۋمەتتىك ساقتاندىرۋ جۇيەسىنىڭ ۇزدىك قىزمەتكەرى», «ۇزدىك الەۋمەتتىك قىزمەتكەر», «مەديتسينالىق-الەۋمەتتىك مەكەمەنىڭ ۇزدىك قىزمەتكەرى», «ۇزدىك الەۋمەتتىك ۇكىمەتتىك ەمەس ۇيىم», «جۇمىسپەن قامتۋ ورتالىعىنىڭ ۇزدىك قىزمەتكەرى», «الەۋمەتتىك سالانىڭ ۇزدىك ۇيىمداستىرۋشى-مەنەدجەرى», «مەديتسينالىق-الەۋمەتتىك ساراپتامانىڭ ۇزدىك قىزمەتكەرى» جانە «ۇزدىك مەملەكەتتىك ەڭبەك ينسپەكتورى» اتتى توعىز اتالىم بويىنشا ماراپاتتالدى.
الەۋمەتتىك قورعاۋ جۇيەسى قىزمەتكەرلەرى كۇنى مەملەكەت باسشىسىنىڭ 2011 جىلدىڭ 20 قازانىنداعى جارلىعىمەن بەكىتىلگەن بولاتىن. بۇل ەلباسىنىڭ زەينەتكەرلەردىڭ يگىلىگىنە قىزمەت ەتىپ, مۇمكىندىگى شەكتەۋلى ادامدارعا, كوپ بالالى, از قامتىلعان وتباسىلارعا باعا جەتپەس كومەك كورسەتىپ وتىرعان ازاماتتارعا دەگەن قۇرمەتى مەن قامقورلىعى سانالادى. جالپى العاندا, رەسپۋبليكالىق فورۋمعا ەلىمىزدىڭ بارلىق ايماقتارىنان 700-دەن اسا ادام قاتىستى.
