تۇڭعىش رەت ۇيىمداستىرىلىپ وتىرعان شارانىڭ ماقساتى – مەملەكەت باسشىسى نۇرسۇلتان نازارباەۆتىڭ «بولاشاققا باعدار: رۋحاني جاڭعىرۋ» باعدارلامالىق ماقالاسىنداعى باستامالاردى ىسكە اسىرۋ اياسىندا جاستارعا رۋحاني تاربيە بەرەتىن يگىلىكتى شارالاردى ۇيىمداستىرا وتىرىپ, وتاندىق عالىمداردىڭ ۇلاعاتتى ىستەرىن وسكەلەڭ ۇرپاققا ناسيحاتتاۋ.
حيميا عىلىمدارىنىڭ دوكتورى, پروفەسسور ە. مەڭلىعازيەۆتىڭ 75 جىلدىق, حيميا عىلىمدارىنىڭ دوكتورى, پروفەسسور ب. جيەمباەۆتىڭ 70 جىلدىق مەرەيتويىنا ورايلاستىرىپ ۇيىمداستىرىلعان القالى جيىنعا قوعام قايراتكەرلەرى, ەلىمىزدەگى عىلىمي مەكەمەلەردىڭ باسشىلارى, وتاندىق جانە شەتەلدىك تانىمال عالىم-زەرتتەۋشىلەر قاتىستى.
قىزدار ۋنيۆەرسيتەتىنىڭ جاراتىلىستانۋ فاكۋلتەتىنىڭ دەكانى قاجىمۇقان كىشىباەۆ وقۋ ورنىنىڭ رەكتورى گاۋحار الدامبەرگەنوۆانىڭ شاراعا قاتىسۋشىلارعا جولداعان قۇتتىقتاۋ حاتىن وقىدى.
– قۇرمەتتى كونفەرەنتسياعا قاتىسۋشىلار, ەلىمىزدەگى پەداگوگ كادرلار دايارلايتىن ىرگەلى وقۋ ورداسى – قازاق مەملەكەتتىك قىزدار پەداگوگيكالىق ۋنيۆەرسيتەتىنە قوش كەلدىڭىزدەر! رۋحاني جاڭعىرۋ – بۇل ادام سانا-سەزىمىنىڭ, سەنىمى مەن ساپاسىنىڭ, ءبىلىمى مەن ءومىر ءسۇرۋ ءتاسىلىنىڭ كورسەتكىشى. قوعامدىق سانانى جاڭعىرتۋدىڭ باستى فاكتورى – ساپالى ءبىلىم, باسەكەگە قابىلەتتىلىك. وسى ورايدا قازاقستاندىق عالىمداردىڭ شىعارماشىلىق, عىلىمي-زەرتتەۋ جۇمىستارىن ناسيحاتتاۋ مەن ونى كەڭ كولەمدە جاريالاۋدا, جاستاردى جوبالىق زەرتتەۋ ءىس-ارەكەتتەرىنە تارتۋدا جانە ءبىلىم بەرۋ ءۇردىسىنىڭ تيىمدىلىگىن كوتەرۋ مەن قولدانبالى عىلىمعا دەگەن قىزىعۋشىلىقتارىن دامىتۋدا وسى تاقىلەتتەس جيىنداردىڭ ءمانى مەن ماڭىزى قانشالىقتى زور ەكەندىگى ايتپاسا دا تۇسىنىكتى. كونفەرەنتسيا قاتىسۋشىلارىنا جەمىستى جۇمىس تىلەيمىن, – دەلىنگەن قۇتتىقتاۋ حاتتا.
كونفەرەنتسيا جۇمىسى 4 سەكتسيا بويىنشا جۇرگىزىلدى. اتاپ ايتقاندا, جيىنعا قاتىسۋشىلار «قازىرگى تاڭداعى حيميا جانە حيميالىق تەحنولوگيانىڭ وزەكتى ماسەلەلەرى», «بيولوگيا, وسىمدىكتەر فيزيولوگياسى, بيوتەحنولوگيا جانە ەكولوگيا سالالارىنىڭ يننوۆاتسيالىق جەتىستىكتەرى», «گەوگرافيالىق عىلىم جانە ءبىلىم: قازىرگى جاعدايى, ماسەلەلەرى جانە بولاشاعى» جانە «يننوۆاتسيالىق ءبىلىم بەرۋ – پەداگوگيكالىق شەبەرلىكتى دامىتۋدىڭ نەگىزى» باعىتتارى بويىنشا تىڭ ويلارىمەن ءبولىسىپ, پايىمدى پىكىرلەرىن ايتتى. بايانداما جاساعاندار قاتارىندا «عارىش-ەكولوگيا» عىلىمي-زەرتتەۋ ورتالىعىنىڭ باس ديرەكتورى, تەحنيكا عىلىمدارىنىڭ دوكتورى جايلاۋباي جۇباتوۆ, تۇركيانىڭ ومەر حاليسدەمير ۋنيۆەرسيتەتىنىڭ پروفەسسورى تورعاي دۋگەن, ستامبۋل ۋنيۆەرسيتەتىنىڭ پروفەسسورى مەحمەت ارسلان سىندى بەدەلدى عالىمدار بار.
سونداي-اق, كونفەرەنتسيا اياسىندا قازاقستاندىق ىزدەنۋشىلەردىڭ عىلىمي ەڭبەكتەرىنىڭ كورمەسى وتكىزىلىپ, عالىمداردىڭ ستۋدەنتتەرگە ارنالعان شەبەرلىك سىنىپتارى جۇرگىزىلدى.
كونفەرەنتسياعا كەلىپ تۇسكەن ماتەريالدار نەگىزىندە ارنايى جيناق شىعارۋ كوزدەلىپ وتىر. بۇل ءوز كەزەگىندە ەلىمىزدەگى ىزدەنۋشى جاستارعا, عىلىمي جۇمىستارمەن اينالىساتىن عالىمدار ءۇشىن ماڭىزدى تەوريالىق جانە ادىستەمەلىك كومەكشى قۇرالى بولماق.
