دوڭگەلەك ۇستەل وتىرىسىنا كوميتەت مۇشەلەرى ميحايل بورتنيك, مۇراتباي جولداسباەۆ, ءالىمجان قۇرتاەۆ, ماناپ كوبەنوۆ, ەدىل مامىتبەكوۆ, ەرىك سۇلتانوۆ, سالالىق مينيسترلىكتەر مەن مەكمەلەردىڭ باسشىلارى, بيزنەس قاۋىمداستىقتارىنىڭ وكىلدەرى قاتىستى.
دوڭگەلەك ۇستەل وتىرىسىن اشا كەلىپ ا. بەيسەنباەۆ, مەملەكەت باسشىسىنىڭ «قازاقستاننىڭ ءۇشىنشى جاڭعىرۋى: جاھاندىق باسەكەگە قابىلەتتىلىك» جولداۋىندا باسەكەگە قابىلەتتى ەكسپورتتىق ءوندىرىستى دامىتۋ جانە 2025 جىلعا دەيىن شيكىزاتتىق ەمەس ەكسپورتتى بىرتە-بىرتە ۇلعايتۋ نەگىزگى باسىمدىقتاردىڭ ءبىرى رەتىندە بەلگىلەنگەنىن اتاپ ءوتتى.
كوميتەت توراعاسى سونداي-اق ەكونوميكاعا تۇسەتىن ەكسپورتتىق ءتۇسىمنىڭ كەيىننەن ينۆەستيتسيادا مۋلتپليكاتيۆتىك اسەرى بولاتىنىن اتاپ ءوتتى. ەكسپورت كاپيتالدىڭ حالىقارالىق قوزعالىسىنا, جاڭعىرتۋدى ارتتىرۋعا, ءوندىرىستى ىلگەرىلەتۋگە, باسەكەلەستىكتى ۇدەتۋگە, عىلىمي-تەحنيكالىق دامۋدى جەدەلدەتۋگە جاردەمدەسەتىن بولادى. ەكونوميكانىڭ كولىك, قارجى, تۋريزم, ءبىلىم بەرۋ, مەديتسينا, عارىشتىق قىزمەت جانە عارىش اپپاراتتارىن سىناقتان وتكىزۋ سەكىلدى سەكتورلارى باسەكەلەستىكتە ارتىقشىلىقتارعا يە جانە ەكسپورتتى ورىستەتۋدە الەۋەتى زور. كولىك قىزمەتىن كورسەتۋدىڭ دە ەكسپورتتىق الەۋەتى مول.
ۇلتتىق ەكونوميكا ءمينيسترى تيمۋر سۇلەيمەنوۆ سەناتورلاردىڭ الدىندا «قازاقستان رەسپۋبليكاسىنىڭ 2018-2022 جىلدارعا ارنالعان ۇلتتىق ەكسپورتتىق ستراتەگياسىنىڭ» نەگىزگى كورسەتكىشتەرى تۋرالى بايانداما جاسادى. ونىڭ بايانداماسىندا ەلىمىزدە شيكىزاتتىق ەمەس ونىمدەر مەن قىزمەت كورسەتۋلەر ەكسپورتى كولەمىنىڭ ۇلعايۋى 2022 جىلعا قاراي 31,8 ميلليارد اقش دوللارىن قۇرايتىنى اتاپ ءوتىلدى. قازاقستاننىڭ 10 جىلداعى ەكسپورتىنىڭ جالپى كولەمىنىڭ 99 پايىزىنان استامىن قۇرايتىن تاۋار كورسەتكىشتەرىنىڭ 667 تۇرىنەن «ەكسپورتتىق قورجىنداعى» كەلەشەگى بار تاۋارلار مەن قىزمەت كورسەتۋلەردى ايقىنداۋ ناتيجەسىندە قازىرگى كەزدەگى 76 جانە جاڭا 40 تاۋار ءتۇرى بەلگىلەندى. ءمينيستردىڭ ايتۋىنشا, اگروونەركاسىپ سالاسىنىڭ ەكسپورتتىق ساياساتى اۋىل شارۋاشىلىعىنىڭ ونىمدەرىن الەۋەتتى نارىقتارعا نىسانالى تۇردە جىبەرۋدى قولداۋ نەگىزىندە قالىپتاساتىن بولادى.
ت. سۇلەيمەنوۆ سىرتقى ساۋدا كەدەرگىلەرىن جويۋ ماقساتىندا ارتىقشىلىققا يە ساۋدا تۋرالى كەلىسىم جاساۋ تۋرالى, سونداي-اق ۆەتەرينارلىق جانە كارانتيندىك (فيتوسانيتارلىق) تالاپتار بويىنشا ەكىجاقتى كەلىسسوزدەر جۇرگىزۋ كوزدەلىپ وتىرعانى جايىندا حاباردار ەتتى. اشىق ءتۇستى مۇناي ونىمدەرىن ەكسپورتتاۋدى ىنتالاندىرۋ جانە قارا ءتۇستى مۇناي ونىمدەرىن ودان ءارى وڭدەۋ ماقساتىندا ەكسپورتتىق كەدەن باجدارىن تۇرلەندىرۋ تۋرالى ماسەلەنى پىسىقتاۋعا تۋرا كەلەدى.
ينۆەستيتسيا جانە دامۋ مينيسترلىگى 2017 جىلى 10 ساۋدا ميسسياسى جوسپارلانعانىن, وتاندىق تاۋار وندىرۋشىلەردىڭ شەتەلدەردەگى 40 سالالىق كورمەلەرگە قاتىسقانى, 4 كورمەدە سۋرەتتى-بەزەندىرۋ سيپاتىنداعى ۇلتتىق قابىرعا تۇرىندە جانە 7 جارنامالىق-تانىستىرۋ شارالارى ۇيىمداستىرىلعانىن حابارلادى.
اۋىل شارۋاشىلىعى مينيسترلىگىنىڭ ەسەبىندە اۋىل شارۋاشىلىعى ونىمدەرىنىڭ ەكسپورتى مەن ولاردىڭ وڭدەلۋى 2017 جىلعى قاڭتار-تامىز ايلارىندا 1 347,9 ميلليون اقش دوللارىن قۇراعانى اتاپ ءوتىلدى.
قارجى مينيسترلىگى 2017 جىلعى تامىز سوڭىنداعى جاعداي بويىنشا شيكىزاتتىق ەمەس تاۋارلاردىڭ ەكسپورتتىق اينالىمداعى ۇلەسى 31 پايىزدى قۇراعانىن جەتكىزدى.
پىكىرلەسۋگە «اتامەكەن» ۇلتتىق كاسىپكەرلەر پالاتاسىنىڭ جانە «KazakhExport» ەكسپورتتىق ساقتاندىرۋ كومپانياسى» اكتسيونەرلىك قوعامىنىڭ وكىلدەرى دە قاتىستى.
دوڭگەلەك ۇستەلدى قورىتىندىلاي كەلىپ, سەنات كوميتەتىنىڭ توراعاسى اسقار بەيسەنباەۆ ايتىلعان وزەكتى ماسەلەلەر ۇلتتىق ەكسپورت ستراتەگياسىندا جانە ەلىمىزدىڭ زاڭناماسىندا شەشىمدەرىن تابۋى ءتيىس ەكەنىن اتاپ ءوتتى. شاراعا پارلامەنت سەناتى دەپۋتاتتارىنىڭ, مەملەكەتتىك ورگانداردىڭ, بيزنەس پەن ساراپشىلار قاۋىمداستىقتارى وكىلدەرىنىڭ بەلسەندى قاتىسۋى ەلىمىزدىڭ سىرتقى ساۋدا قىزمەتىن دامىتۋعا باعىتتالعان وڭتايلى ۇسىنىستاردى ازىرلەۋگە ىقپال ەتەتىنىنە سەنىم ءبىلدىردى.
