بەلگىلەنگەن مەرزىمدى وتكەرگەن جانە زاپاسقا بوساتىلاتىن اسكەري قىزمەتشىلەر, اسكەري ابىروي, ار-نامىس پەن داڭقتىڭ سيمۆولى – جاۋىنگەرلىك تۋمەن قوشتاستى. سالتاناتتى ساپ تۇزەۋدە ءبولىم كومانديرلەرى ولارعا ساتتىلىك, ال وتباسىلارىنا بەيبىت اسپان تىلەدى. بۇدان كەيىن قىزمەتتىك جاۋىنگەرلىك تاپسىرمالاردى ادال ورىنداعانى ءۇشىن ساربازدار ماقتاۋ قاعازدار, العىس حاتتار, قىزمەت تۋرالى فوتوالبومدار جانە ەستەلىك سىيلىقتارمەن ماراپاتتالدى.
سالتاناتتى راسىمدە زاپاسقا بوساتىلعان اسكەري قىزمەتشىلەر سوڭعى رەت وزدەرىنىڭ بولىمدەرىنىڭ الاڭقايىندا ساپ تۇزەپ ءجۇرىپ ءوتتى. «قىزمەتىمىزدى جىلى سەزىممەن جانە جاقسى اسەرلەرمەن ەسكە الىپ وتىراتىن بولامىز. ءبىز ءۇشىن تەڭىز جاياۋ اسكەرى تۋعان ۇيىمىزگە اينالدى, تەڭىز جاياۋ اسكەرىنىڭ جالىنى جۇرەگىمىزدە وت بولىپ لاۋلاپ تۇرادى. بىزگە دەمەۋ بولىپ, قولعابىس جاساعان, وقىتقان, بۇل جولدان وتۋگە كومەكتەسكەن بارشالارىڭىزعا العىس بىلدىرەمىز», دەدى №25744 اسكەري ءبولىمى تەڭىز جاياۋ اسكەرلەرىنىڭ ساربازدارى اتىنان ءسوز سويلەگەن قاتارداعى جاۋىنگەر ەركىنبەك اڭسار.
دەسانتتىق-شابۋىلداۋ اسكەرلەرىنىڭ جاۋىنگەرلەرى ۆيتالي روديونوۆ, ناريمان دۋمانوۆ پەن جانىبەك ءابىلدين قارۋلى كۇشتەردىڭ قازبات بولىمشەسىندە قىزمەت ەتكەندەرىن ماقتان تۇتادى. ولاردىڭ ايتۋىنشا, ءدال وسى جەردە, ياعني اسكەردە ەڭ جاقسى ادامي جانە كاسىبي قاسيەتتەردى بويلارىنا جۇقتىرعان. «ادال قىزمەتتەرىڭ ءۇشىن ۇلكەن العىس بىلدىرەمىن. ساپتا تۇرعان ارقايسىلارىڭ وزدەرىڭنىڭ قاجىرلى ەڭبەكتەرىڭمەن اعا بۋىننىڭ ءداستۇرىن لايىقتى تۇردە جالعاستىرا وتىرىپ, وتانعا دەگەن ادالدىقتارىڭدى دالەلدەدىڭدەر. ومىردەگى ءوز جولدارىڭدى تابۋلارىڭا تىلەكتەسپىن. بۇعان دەسانتتىق-شابۋىلداۋ اسكەرلەرىندە جيناقتاعان تاجىريبەلەرىڭ سەپتىگىن تيگىزەرىنە سەنىمدىمىن», دەدى سالتاناتتى شارا بارىسىندا دەسانتتىق-شابۋىلداۋ اسكەرلەرى قولباسشىسىنىڭ ورىنباسارى پولكوۆنيك ۆيكتور جيتنيك.
ەسكە سالساق, 2017 جىلى بارلىعى 5 مىڭعا جۋىق مەرزىمدى اسكەري قىزمەتشى زاپاسقا بوساتىلادى.
قايرات جۇنىس ۇلى
