گەكتارىنا 300-350 تسەنتنەردەن ءونىم الىپ وتىرعان «ادەليا» جىلىجايى 16 گەكتار جەرگە قىزىناق پەن قيار ەگىپ, جىلىنا ەكى رەت ءونىم الىپ وتىر. ورداباسى اۋدانى, بادام اۋىلىندا ورنالاسقان جىلىجاي قوجالىعىنىڭ جۇمىسىمەن باق وكىلدەرى مەن بلوگەرلەر اۋقىمى كەڭ جۇمىستىڭ قىر-سىرىمەن تانىسىپ قايتتى.
جىلىجايدا فرانتسۋز كومپانياسىنىڭ زاماناۋي قوندىرعىلارى ورناتىلعان. مۇندا جىلىتۋدان باستاپ تامشىلاتىپ سۋارۋعا دەيىنگى بارلىق پروتسەسس كومپيۋتەرمەن باقىلانادى.
كاسىپكەردىڭ ايتۋىنشا, مۇنداعى وسىرىلەتىن كوكونىستەر ەكولوگيالىق تازا ءونىم. ولاردى وسىرۋدە قولدانىلاتىن تەحنولوگيا سۋ مەن تىڭايتقىشتاردى جانە باسقا دا رەسۋرستاردى ۇنەمدەۋگە مۇمكىندىك بەرەدى. ال جوبانىڭ ءوزى ەلىمىزدىڭ ەكسپورتتىق الەۋەتىن ارتتىرۋعا مۇمكىندىگى مول. جينالعان ءونىمنىڭ باسىم بولىگى رەسەيگە ەكسپورتتالسا, قالعانى قازاقستاننىڭ الماتى, استانا قالالارىنا جىبەرىلەدى.
يندۋستريالاندىرۋ كارتاسى اياسىندا ىسكە اسقان بۇل جوبانى «قازاگروقارجى» اكتسيونەرلىك قوعامى قارجىلاندىرعان. اتالمىش ۇيىم 2011 جىلى 440 ميلليون تەڭگە كولەمىندە جەڭىلدەتىلگەن نەسيە بەرسە, 2013 جىلى 2,2 ميلليارد تەڭگە كولەمىندە قارجى بولگەن.
جالپى وبلىس اۋماعىنداعى جىلىجايدىڭ جالپى كولەمى 900 گەكتاردان اسادى. بۇل - قازاقستانداعى جىلىجاي شارۋاشىلىعىنىڭ شامامەن 80 پايىزىن قۇراپ وتىر.
