«نۇر وتان» پارتياسىنىڭ استانا قالاسى ەسىل اۋداندىق فيليالى توراعاسىنىڭ ورىنباسارى احمەت سەيىتوۆ پەن فيليال كەڭەسشىسى ەرلان احمەدي قاتىسىپ, بايانداما جاساعان شارادا ەلباسىنىڭ «بولاشاققا باعدار: رۋحاني جاڭعىرۋ» باعدارلامالىق ماقالاسىنداعى لاتىن الىپبيىنە كوشىرۋ ماسەلەسى قامتىلدى. فيليال توراعاسىنىڭ ورىنباسارى بۇگىنگە دەيىن قوعامدىق سانانى جاڭعىرتۋ جونىندەگى ۇلتتىق كوميسسياعا 300-گە جۋىق جوبانىڭ ۇسىنىلعانىن ايتتى.
ول لاتىن گرافيكاسىن جاساۋمەن ا.بايتۇرسىنوۆ اتىنداعى ءتىل ءبىلىمى ينستيتۋتى مەن ش.شاياحمەتوۆ اتىنداعى تىلدەردى دامىتۋدىڭ رەسپۋبليكالىق ۇيلەستىرۋ-ادىستەمەلىك ورتالىعى بەلسەندى اينالىسىپ جاتقانىن ايتا كەلىپ, بۇل ماسەلەدە حالىق پىكىرى دە ەسكەرىلىپ جاتقانىن باسا ايتتى. «وزگە ەلدەر لاتىن الىپبيىنە وتكەندە حالىقتىڭ پىكىرىمەن ساناسقان جوق», دەدى ول. ا.سەيىتوۆ لاتىن الىپبيىنە كوشۋ كەزەڭمەن-كەزەڭمەن ىسكە اساتىنىن, بۇل تۇرعىدا قوعامنىڭ ەشقانداي مۇشەسىنىڭ دە الاڭداۋىنا نەگىز جوق ەكەنىنە توقتالدى.
ال «نۇر وتان» پارتياسى استانا قالاسى ەسىل اۋداندىق فيليالىنىڭ كەڭەسشىسى ەرلان احمەدي ءبىز لاتىن الىپبيىنە كوشپەيتىنىمىزدى, وعان ورالاتىنىمىزدى باسا ايتتى. ويتكەنى لاتىن ءالىپبيىن قولدانۋ تاجىريبەسى قازاق دالاسىندا بولعان. ول سونداي-اق كورشى ەلدەردىڭ تاريحىنان مىسالدار كەلتىردى. ماسەلەن, باۋىرلاس تۇركيا ەلى اتاتۇرىك ەل بيلەگەن تۇستا 800 جىلدىق اراب جازۋىنان ءۇش ايدىڭ ىشىندە بۇتىندەي باس تارتىپ, لاتىن گرافيكاسىنا نەگىزدەلگەن جازۋعا كوشكەنىن باياندادى. ونىمەن سالىستىرعاندا جەتى-سەگىز جىلدىڭ ىشىندە كەزەڭ-كەزەڭمەن لاتىن الىپبيىنە كوشۋ اسا كوپ قيىندىق تۋدىرماۋى ءتيىس دەگەن پىكىر ايتتى.
ايگۇل سەيىل,
«ەگەمەن قازاقستان»
