كەزدەسۋ بارىسىندا ەڭبەك كودەكسى مەن ۇجىمدىق ەڭبەك شارتىن ساپالى جۇزەگە اسىرۋ, كاسىپوداق قوزعالىسىنداعى الەۋمەتتىك ارىپتەستىكتى دامىتۋ ماسەلەلەرى ءسوز بولدى. الماتى قالاسىنداعى حالىقتى جۇمىسپەن قامتۋ ورتالىعىندا بولعان تامارا دۇيسەنوۆا, ورتالىقتىڭ جاڭعىرتۋ الدىنداعى جۇمىسىمەن تانىستى.
بەيىمدەۋ جانە وڭالتۋ ورتالىعىنداعى «كەڭەس» مۇگەدەكتەر قوعامدىق بىرلەستىگى ەڭبەك جانە حالىقتى الەۋمەتتىك قورعاۋ مينيسترىنە «بالالار دەنساۋلىعى دامۋىنىڭ بۇزىلۋىنا ەرتە ارالاسۋ – سابيلەردىڭ اۋىر مۇگەدەكتىگى مەن ەرتە جەتىم قالۋىنىڭ الدىن الۋدىڭ كەپىلى» اتتى قاناتقاقتى جوبانى تانىستىردى.
قاناتقاقتى جوبانى سىناقتىق جۇزەگە اسىرۋ بارىسىندا تاربيەسىندەگى بالا دامۋىندا ەرەكشەلىگى بار 520 وتباسى مامان كەڭەسىن الىپ ۇلگەردى. ورتالىق ماماندارىنىڭ بولجامى بويىنشا, جوباعا قاتىسقان بالالاردىڭ 70%-دان استامى, بولاشاقتا بالالار باقشاسى مەن جالپى ءبىلىم بەرەتىن مەكتەپتەردەگى قالىپتى ورتاعا ارالاسىپ كەتۋگە تولىق دايىن بولادى.
«كەڭەس» ورتالىعى پسيحونەۆرولوگيالىق اۋىتقۋى بار بالالار مەن ولاردىڭ وتباسىلارىنىڭ قۇقىقتارى مەن مۇددەلەرىن قورعاۋعا باعىتتالعان الەۋمەتتىك جوبالار مەن باعدارلامالاردىڭ دامۋىنا ەلەۋلى ۇلەس قوسىپ كەلەدى. تامارا دۇيسەنوۆا ورتالىقتىڭ جۇمىس ناتيجەسىنە وڭ باعاسىن بەرىپ, ەلىمىزدىڭ وزگە دە وڭىرلەرىندە ءدال وسىنداي ورتالىقتاردى اشۋدىڭ ماڭىزدىلىعىنا توقتالدى.
سونىمەن قاتار, جۇمىس ساپارى بارىسىندا, الماتى قالاسىنىڭ اكىمى ب.بايبەكتىڭ قاتىسۋىمەن الەۋمەتتىك-ەڭبەك سالاسىنىڭ ماسەلەلەرى بويىنشا جيىن ءوتتى. ءوز سوزىندە ت.دۇيسەنوۆا مينيسترلىكتىڭ الەۋمەتتىك-ەڭبەك سالاسىن جاڭعىرتۋ بارىسىنداعى جۇمىس ناتيجەلەرى جايلى اڭگىمەلەدى.
ەستەرىڭىزگە سالا كەتەيىك, 2018 جىلدىڭ 1 قاڭتارىنان باستاپ, ەلباسىنىڭ «ۇلت جوسپارى – 100 ناقتى قادام» يدەياسى مەن حالىققا جولداۋىنان تۋىندايتىن تاپسىرمالاردى جۇزەگە اسىرۋ ماقساتىندا الەۋمەتتىك-ەڭبەك سالاسىن جاڭعىرتۋعا باعىتتالعان كەشەندى شارالار جۇزەگە اسادى.
مينيستر بۇگىنگى تاڭداعى ەڭ باسىم باعىتتىڭ ءبىرى – از قامتىلعان وتباسىلارعا شارتسىز جانە شارتتى تۇردە بەرىلەتىن جاڭا سيپاتتاعى اتاۋلى الەۋمەتتىك كومەكتىڭ ەنگىزىلۋى ەكەنىنە نازار اۋداردى.
ەگەر قازىرگى تاڭدا ااك (اتاۋلى الەۋمەتتىك كومەك) تابىسى كۇنكورىس دەڭگەيىنەن 40% تومەن ادامدار مەن وتباسىلارعا قارجىلاي كومەك رەتىندە بەرىلەتىن بولسا, جاڭا جىلدان باستاپ ااك الەۋمەتتىك كەلىسىمشارت جاساسقان جاعدايدا بەرىلەتىن بولادى.
سونىمەن بىرگە, جاڭا جىلدان باستاپ تولەنەتىن ااك - قازىرگى تاڭداعى ااك, بالالار جاردەماقىسى جانە ارنايى مەملەكەتتىك جاردەماقى سەكىلدى 3 الەۋمەتتىك تولەمنىڭ ورنىنا بىرىڭعاي جاردەماقى تۇرىندە تولەنەتىن بولادى. ەڭ باستى ەسكەرەتىن جايت, جاڭا ااك مولشەرى جوعارىدا اتالعان 3 ءتۇرلى جاردەماقىنىڭ جالپى سوماسىنان جوعارى بولادى.
«سوندىقتان, جاڭا ااك تەك قانا قارجىلاي جاردەماقى عانا ەمەس, كەدەيلىك دەڭگەيىنەن شىعۋدىڭ كەشەندى شاراسى بولماق. جاردەماقىنىڭ قولجەتىمدىلىگى مەن بيزنەس-پروتسەستەردى وڭتايلاندىرۋ ماقساتىندا جاردەماقىنى ءبىر تەرەزە جۇيەسىمەن جۇمىسپەن قامتۋ ورتالىقتارى ارقىلى جۇرگىزۋ ۇسىنىلادى», - دەدى مينيستر.
مينيستر الدا تۇرعان ماقساتتاردى ەسكەرە وتىرىپ, جۇمىسپەن قامتۋ ورتالىقتارىن كۇشەيتۋ ارقىلى جۇمىسپەن قامتۋ مەن الەۋمەتتىك باعدارلامالار بولىمدەرىندە قوسىمشا جۇمىس ورىندارىن اشىپ, ماتەريالدىق-تەحنيكالىق جابدىقتالۋى مەن مامان دايارلاۋ ىسىنە اسا ءمان بەرۋ كەرەك ەكەنىن اتاپ ءوتتى.
