ءبىر ەمەس, بىرنەشە وليمپياداعا, الەم چەمپيوناتتارىنا بارعان جيھانكەز جۋرناليست ەڭ اۋەلى ءوزى تۋىپ-وسكەن سارجىرا اۋىلىنداعى مەكتەپتە ەلدى مەكەن جۇرتشىلىعىمەن, ءبىلىم ورداسىنىڭ ۇستازدارىمەن جانە وقۋشىلارمەن كەزدەسىپ, ەمەن-جارقىن اڭگىمە-دۇكەن قۇردى.
«قايدا جۇرسەم دە سارجىرامدى اڭساپ تۇرامىن. بالا كەزىمىزدە مىنا ىرگەدەگى موجىك وزەنىنە بارىپ سۋعا تۇسەتىنبىز», دەپ بالالىق بال شاعىن ساعىنا ەسكە الىپ, مەكتەپ كىتاپحاناسىنا ءوزىنىڭ جانە باسقا دا اقىن-جازۋشىلاردىڭ 50 كىتابىن سىيعا تارتتى. ءبىر جىلدارى اۋىل مەكتەبىنە جابىلۋ قاۋپى تونگەندە ارىپتەسىمىز ءبىلىم ورداسىن امان ساقتاپ قالۋعا ۇلەس قوسقان ەكەن. سودان دا بولار پەرزەنتتىك پارىزىنا ادال قالامگەردى اۋىلداستارى قۇشاق جايا قارسى الىپ, جىلى لەبىزدەرىن ءبىلدىرىپ, سىي-قۇرمەت كورسەتتى. ال الاقانداي عانا اۋىل سارجىرانىڭ وقۋشىلارى كەزدەسۋدى ءۇش تىلدە جۇرگىزىپ, شالعايدا بولسا دا وركەنيەت كوشىنەن قالماي كەلە جاتقاندىقتارىن اڭعارتقانداي بولدى.
تۋعان اۋىلىنان كەيىن جۋرناليست زايسان قالاسىنداعى م.داۋلەنوۆ اتىنداعى ورتا مەكتەپتە اۋدان جۇرتشىلىعىمەن جۇزدەسىپ, شىعارماشىلىعىنىڭ ەستە قالارلىق ساتتەرىنەن سىر شەرتتى. سيدنەي وليمپياداسىندا جەلدەي جۇيتكىگەن جەڭىل اتلەت ولگا شيشيگينانىڭ جەڭىسىنە ەلىمىزدەن بارعان دەلەگاتسيا ىشىنەن جالعىز ءوزى كۋا بولىپ, ەڭ العاش بولىپ قۇتتىقتاعانىن تەبىرەنە ەسكە الىپ, ۋنيۆەرسيتەتتە وركەستر قۇرامىندا جۇرگەندە ەسكەندىر حاسانعاليەۆ پەن نۇرعالي ءنۇسىپجانوۆتان ءدارىس تىڭداعانىن اڭگىمەلەپ, قولىنا دومبىراسىن الىپ, كۇمبىرلەتىپ كۇي تارتىپ بەردى. جۋرناليسپەن وسكەمەننەن بىرگە كەلگەن قول كۇرەسىنەن الەمنىڭ ءۇش دۇركىن, ازيانىڭ 10 دۇركىن چەمپيونى, ەلىمىزدەگى قول كۇرەسى مەن گىر سپورتىنىڭ نەگىزىن قالاۋشى مۇقان اعزاموۆ كەزدەسۋدە ونىڭ سپورت سالاسىنا سىڭىرگەن ەڭبەگىنىڭ زور, مۇنىڭ جاس ۇرپاققا بەرەر ۇلگى-ونەگەسى مول ەكەندىگىن تىلگە تيەك ەتتى.
جىلى راۋىشتە وربىگەن جۇزدەسۋدە ءسوز العان اۋدان اكىمى تەمىربەك قاسىمجانوۆ تاعىلىمدى شارانىڭ ەلباسىنىڭ «رۋحاني جاڭعىرۋ» باعدارلاماسى اياسىندا وتكىزىلىپ وتىرعانىن ايتىپ, جىل بويى زايساننان شىققان ەلگە تانىمال تۇلعالاردىڭ قاتىسۋىمەن بىرقاتار كەزدەسۋ ۇيىمداستىرىلعانىن جەتكىزدى. كەزدەسۋ بارىسىندا و.ەلۋبايدىڭ بيىل الماتىدا وتكەن قىسقى ۋنيۆەرسيادا جايىندا سىر شەرتەتىن «الاتاۋدى دۇبىرلەتكەن 11 كۇن» اتتى كىتابىنىڭ تۇساۋكەسەرى ءوتتى.
ازامات قاسىم,
«ەگەمەن قازاقستان»
شىعىس قازاقستان وبلىسى,
زايسان اۋدانى
