«تاۋاريح-تامشىلار» جيناعىنان وقىرمان قازاق حالقىنىڭ قالىپتاسۋ جانە ەتنوستىق اتاۋىمەن مەملەكەتتىگىن قۇرۋ تاريحى, ءبىر ورتالىقتاندىرىلعان كۇشتى حاندىق جاساقتاۋعا تالپىنعان ارەكەتى, سونداي-اق وتارلانۋ كەزەڭدەرى, پاتشالىق تۇسىنداعى ازاتتىق اڭساعان كوتەرىلىستەر, كەڭەستىك داۋىردەگى ۇلتتىق-مەملەكەتتىك مەجەلەۋ شىندىقتارى, توتاليتارلىق كەزەڭنىڭ قىلمىسى جانە الاشتىق يدەيانىڭ ومىرشەڭدىگى جايىندا اۆتوردىڭ ءار جىلدارى جازىپ, مەرزىمدىك ءباسپاسوز بەتتەرىندە جاريالاعان زەرتتەۋ ماقالالارى مەن سۇحباتتارىمەن تانىسا الادى.
«تۇلعالار تۇزگەن تاۋاريح» جيناعىنداعى قازاق تاريحىندا ەلەۋلى ورنى بار ماقاش اكىم, بالۋان شولاق, ۇلت-ازاتتىق قوزعالىسقا قاتىسقان شايكە مولدا, ۇلت كوسەمى ءاليحان بوكەيحان, كەڭەس زامانىنداعى مەملەكەت, عىلىم, ونەر قايراتكەرلەرى جۇمابەك تاشەنوۆ, رامازان سۇلەيمەنوۆ, ساۋىق تاكەجانوۆ, احمەت جۇبانوۆ سەكىلدى بەلگىلى تۇلعالار, بايسەيىت جانە دىنمۇحامەد ادىلوۆتەر, حانسۇلتان ءسۇيىنىشالين ءتارىزدى ساياسي رەپرەسسيا قۇرباندارى, سونداي-اق توتاليتاريزم داۋىرىندە ورىن العان ساياسي قۋعىن-سۇرگىن تابيعاتى, باستالعانىنا بيىل 80 جىل تولعان ۇلكەن تەررور, ونىڭ قاسىرەتتى سالدارلارى تۋرالى زەرتتەۋ ماقالالار ەلىمىزدىڭ كۇردەلى شەجىرەسىنىڭ ماڭىزدى بەتتەرىن قۇرايدى.
ۇزاق جىلدارعا سوزىلعان وتارلىق زاماننان سوڭ قازاقتىڭ ەلدىگىن تۇڭعىش جاڭعىرتقان الاشوردانىڭ 100 جىلدىعىنا وراي جارىق كورىپ وتىرعان بۇل كىتاپتار زەرتتەۋشىلەرگە, تاريحشىلارعا, ستۋدەنتتەر مەن وقۋشىلارعا, بارلىق وتان تاريحىمەن اۋەستەنەتىندەرگە, كوپشىلىك قاۋىمعا ارنالىپ وتىر.
«ەگەمەن-اقپارات»
