بۇل مەكتەپتىڭ جەكە تاريحىنىڭ ايتارلىقتاي ءۇش ەرەكشەلىگى بار. ءبىرىنشىسى – وسىدان 40 جىل بۇرىن, ياعني 1977 جىلى قىركۇيەك ايىندا شەۆچەنكو (قازىرگى اقتاۋ) قالاسىندا العاش اشىلعان قازاقتىلدى مەكتەپ بولۋى. 51 سىنىپپەن اشىلعان مەكتەپ العاشقى وقۋ جىلىن 1357 وقۋشىمەن باستاعان ەدى.
«قازاقشا العان ءبىلىم ساپاسىز, سوندىقتان باسقا تىلدەردە وقىتۋ قاجەت» دەگەن قاساڭ قاعيدانىڭ تاس-تالقانىن شىعارعان جاس ءبىلىم وشاعى ءبىلىم بەرۋدە تىڭعىلىقتىلىعى مەن ۇستازدارىنىڭ ءوز ىسىنە دەگەن ىقىلاسىنىڭ ارقاسىندا بىردەن الدىڭعى قاتارلىلاردىڭ ساناتىنان تابىلدى. وسى ابىروي, وسى سەنىم مەكتەپتى 2008 جىلى اقتاۋ قالاسى اكىمىنىڭ شەشىمىمەن «№11 مامانداندىرىلعان فيزيكا-ماتەماتيكا مەكتەبى» اتاندىردى. مەكتەپ ۇجىمى وقۋشىلارعا فيزيكا مەن ماتەماتيكانى تەرەڭدەتە وقىتۋ باعىتىندا ىسكە كىرىستى. بۇل – مەكتەپتىڭ ەكىنشى ەرەكشەلىگى ەدى.
ۋاقىت جىلجىپ, تاۋەلسىز قازاقستان الەم ەلدەرىنىڭ وزىق ۇلگىلەرىن ءوز تاجىريبەسىنە ەنگىزگەن سايىن, باسقا سالالار سەكىلدى ءبىلىم بەرۋ سالاسىندا دا ءبىراز جاڭالىقتار قولدانىسقا ەندى. ول جاڭاشىلدىقتى ەنگىزۋ مەكتەپ ۇستازدارىنا زور جاۋاپكەرشىلىك جۇكتەدى.
– قازاقستاننىڭ الەمدىك ۇردىستەرگە كىرىگۋى, دامىعان ەلدەردىڭ ستاندارتتارىنا دەگەن ۇمتىلىسى ءبىلىم بەرۋ جۇيەسىنىڭ جانا ساپالىق دەڭگەيگە ءوتۋ قاجەتتىلىگىن تۋىنداتۋدا. وسىعان وراي قازىرگى كەزدە ءبىلىم بەرۋ جۇيەسىندە جاسالىپ جاتقان ماقساتتى مۇددەگە ساي وقۋشىلار شىعارماشىلىعىنىڭ قالىپتاسۋىندا تابىستى ىستەر از ەمەس. مەكتەبىمىز «دارىن» باعدارلاماسى بويىنشا ەرەكشە تالانتتى, دارىندى جاس زەرتتەۋشىلەردى تاڭداۋ ارقىلى ءتۇرلى باعىتتا جۇمىس جۇرگىزىپ كەلەدى. جەكە تۇلعانىڭ شىعارماشىلىق الەۋەتىن جانە قابىلەتىن دامىتۋعا, زەرتتەۋ بىلىگى مەن داعدىلارىن قالىپتاستىرۋعا باعىتتالعان قازىرگى يننوۆاتسيالىق-پەداگوگيكالىق تەحنولوگيالاردىڭ ءبىرى – وقۋشىلاردىڭ عىلىمي-زەرتتەۋ جۇمىسى. وسىعان وراي ءبىلىم مەكەمەسىنىڭ وقۋشىلارى قالالىق, وبلىستىق, رەسپۋبليكالىق دەڭگەيدەگى شارالارعا بەلسەنە ارالاسۋدا, – دەيدى ءبىلىم ورداسىنىڭ باسشىسى گۇلزادا ەڭسەگەنوۆا.
مەكتەپ ديرەكتورىنىڭ ايتۋىنشا, ءار بالانىڭ جەكە قابىلەت ەرەكشەلىگىن اشۋ ءۇشىن پاندەر بويىنشا وتكىزىلەتىن وليمپيادالاردىڭ ورنى ەرەكشە. وتكەن وقۋ جىلىندا اتالمىش مەكتەپتەن قالالىق دەڭگەيدە وتكىزىلگەن پاندەر وليمپياداسىنا 57 وقۋشى قاتىستىرىلىپ, ونىڭ 28-ءى جۇلدەلى ورىنعا يە بولسا, رەسپۋبليكالىق وليمپيادادان اسەل يحسانوۆا, زامان قۇرمەت اتتى وقۋشىلار جۇلدەلى ورالعان. ءوز ءبىلىمىن دالەلدەگەن اسەل ۇلتتىق بىرىڭعاي تەستىلەۋ قورىتىندىسىمەن وبلىس بويىنشا جوعارى ۇپاي سانالعان 135 بالدى جيناپ, «التىن بەلگىسىن» ابىرويمەن قورعاپ شىقتى. مەكتەپتەر, وقۋشىلار مەن ۇستازدار اراسىنداعى قالالىق, وبلىستىق سايىستاردا بۇل مەكتەپتىڭ توپ جارعان كەزدەرى از ەمەس, بىراق ونى ءتىزۋدىڭ مۇمكىندىگى دە, قاجەتى دە جوق.
الايدا مەكتەپتىڭ اتى وزىپ, بالاپانداي باپتاعان شاكىرتتەرىنىڭ تەرەڭ ءبىلىم الۋىنا تەر توگىپ جۇرگەن رەسپۋبليكالىق «ۇزدىك پەداگوگ» سايىسىنىڭ جۇلدەگەرى, «جىل ادامى» اتانعان ماتەماتيك مارجان اسىلباەۆا, وقۋشىلارى ءاردايىم رەسپۋبليكالىق پاندىك وليمپيادالاردان جۇلدەلى ورالاتىن ورىس ءتىلى ءپانىنىڭ وقىتۋشىسى قىمبات كوبەنوۆا, شاكىرتتەرى حيميادان قالالىق, وبلىستىق سايىستاردا جەڭىسپەن قۋانتاتىن حيميا ءپانىنىڭ مۇعالىمى رايحان شاراۋوۆا, سونداي-اق فيزيكانى اعىلشىن تىلىندە وقىتىپ جۇرگەن جاس مامان جازيرا ىقىلاسوۆا سىندى ۇستازداردىڭ ەسىمىن ريزاشىلىقپەن اتاۋعا مىندەتتىمىز. ۇستازداردىڭ ەڭبەگى ناتيجەسىندە 2016-2017 وقۋ جىلىندا مەكتەپ تۇلەكتەرىنىڭ 70 پايىزى مەملەكەتتىك گرانت يەگەرلەرى اتاندى.
قازاقستان رەسپۋبليكاسىندا ءبىلىم بەرۋدى دامىتۋدىڭ 2011-2020 جىلدارعا ارنالعان مەملەكەتتىك باعدارلاماسى جانە ءبىلىم بەرۋدى دامىتۋدىڭ 2014-2016 جىلدارعا ارنالعان باسىم باعىتتارىن جۇزەگە اسىرۋ اياسىندا قازاقستاندا ورتا ءبىلىم مازمۇنىن جاڭارتۋ جۇمىستارى جالعاسۋدا. وسىنىڭ اياسىندا جاڭا مەملەكەتتىك جالپىعا مىندەتتى باستاۋىش ءبىلىم بەرۋ ستاندارتى, باستاۋىش مەكتەپكە ارنالعان ۇلگىلىك وقۋ جوسپارلارى جانە وقۋ باعدارلامالارىن اپروباتسيالاۋ جۇرگىزىلۋدە. ەل ۇكىمەتى جاڭارتىلعان ءبىلىم بەرۋ مازمۇنىنا كوشۋدىڭ تۇجىرىمدامالىق تاسىلدەمەلەرىن ماقۇلداپ, 2015 جىلى ەلىمىزدەگى 30 مەكتەپتە ءبىلىم بەرۋدىڭ جاڭارتىلعان مازمۇنىن ەنگىزۋ جۇمىستارىن جۇرگىزۋ تۋرالى شەشىم قابىلداعان بولاتىن. ءبىزدىڭ مەكتەبىمىزگە رەسپۋبليكا بويىنشا 30 مەكتەپتىڭ قۇرامىنا ەنۋ مۇمكىندىگى تۋدى, دەيدى مەكتەپ باسشىسى بىزبەن اڭگىمەسىندە. ۇستازدار ەندى جاڭارتىلعان ءبىلىم مازمۇنىن ءوز بويلارىنا ءسىڭىرىپ, ونى ۇرپاق تاربيەسىنە ەنگىزۋ ءۇشىن ەڭبەكتەنۋدە.
2008-2009 وقۋ جىلىندا مەكتەپكە مەملەكەت جانە قوعام قايراتكەرى, 1973 جىلى قۇرىلعان وبلىسقا باسشى بولىپ كەلگەن ازامات, 1973-1980 جىلدارى ماڭعىستاۋ وبلىستىق پارتيا كوميتەتىنىڭ ءبىرىنشى حاتشىسى بولىپ تابىستى ەڭبەك ەتكەن تۇتقاباي اشىمباەۆتىڭ ەسىمى بەرىلىپ, مەكتەپ اۋلاسىنا قايراتكەردىڭ ءبيۋستى قويىلعان بولاتىن. سول جىلى مەكتەپ ىشىنەن ت.اشىمباەۆتىڭ مۇراجايى اشىلىپ, كۇنى بۇگىنگە دەيىن جاس ۇرپاققا كەشەگى اعا بۋىننىڭ ونەگەلى ءىسىن ناسيحاتتايتىن ۇلگىلى ورىن قىزمەتىن اتقارۋدا. الايدا مەكتەپتىڭ ءۇشىنشى ەرەكشەلىگى سانالاتىن بۇل باستاما اياقسىز قالىپ, ءالى رەسمي كۇشىنە ەنبەگەن كۇيىندە تۇر ەكەن.
...مەكتەپ ءدالىزى وقۋشىلاردىڭ سىڭعىر ءۇنى مەن بالعىن كۇلكىسىنە تولى. ول – ادالدىقتىڭ ۇياسى, بالالىق شاقتىڭ بەسىگى, ونىڭ ەسىگىنەن اتتاماعان ادام جوق جانە ول سونىسىمەن بارلىق ادامعا ىستىق, قادىرلى, كيەلى بولىپ قالا بەرەدى.
گۇلايىم شىنتەمىرقىزى,
«ەگەمەن قازاقستان»
ماڭعىستاۋ وبلىسى
